MILONGI YA 18

Kulonga Kyambote o Jingivwidi

1 Kolindo 9:19-23

IHI I WA TOKALA O KUBHANGA?: Bhangesa o jingivwidi jé kumesena kwijiya dingi, kwatekesa-u kuxinganeka mudyâ mu maka u wa mu zwela, phala a tene kudívwa kwila a dilongo kima kya ubhe, kya valolo.

KYEBHI KI WA TOKALA O KUBHANGA?:

Sota kutendela se ihi yejiya kyá o jingivwidi jé. Mu veji dya ku bhitulula ngó o ima yejiya kyá, a kwatekese ku i mona mu ukexilu wengi, wa ubhe.

O jipondo jejiya kyá o jingivwidi jé, u tena kujitumbula ni lusolo, maji o jipondo já ubhe, wa tokala ku ji jimbulula kamwanyu-kamwanyu.
Wa tokala kutokwesa ni kuxinganeka. Se ki bhana, bandekesa milongi ya ubhe, mba ima ya bhiti kindala phala kujimbulula o jipondo já beta kota. Xinganeka mwene kyambote mu maka u wa sange, xinganeka we kyebhi ene kya lungu ni maka u wa mesena kutumbula.

Kyoso ki uya ni kutonginina o milongi i wa sange, sota kubandekesa o kwijiya kwé mu ku dibhwidisa kiki: ‘Ihi, mukonda dyahi, thembu-kuxi, kwebhi, nanyi ni kyebhi.’ Bhana nguzu mba mwenyu ku izwelu yé, mu kubhanga ibhwidisu, ni ku i tambwijila kyoso ki uya ni kubhanga o diskulusu mba o mbandu yé.
Londekesa kwila o njimbu yé yala ni valolo, i bhekela mbote. Londekesa kyebhi o jipondo já Mikanda Ikôla, ji tena kukwatekesa o jingivwidi mu kizwa ni kizwa. Wa tokala kutumbula ima yene mu bhita, mawukexilu ni ibhangelu ya-nda tula ku muxima wa jingivwidi jé.