DISÁ 10
Kyebhi o Yônge ya Jimbangi ja Jihova Itena Kukukwatekesa?
O kwila eye wayile kya mu kyônge kya Jimbangi ja Jihova? Se kiluwa, nange ukala ni hele mu kubanza kuya mu veji ya dyanga. Nange udibhwidisa: ‘Ihi yene mubhita mu yônge yiyi? Mukonda dyahi o yônge yiyi yala ni valolo? Mukonda dyahi ngabhingi kuyaku?’ Mu disá didi, wandadilonga kyebhi o yônge yiyi itena ku kuzukamesa dingi kwa Nzambi, ni ku kukwatekesa kizuwa ni kizuwa.
1. Mukonda dyahi o Jimbangi ja Jihova ene mu dyongeka?
Sayi musoneki wa Bibidya wambe: ‘Ngiximana Jihova, mu kyônge kya akwetu.’ (Jisálamu 26:12) Ni izwelu yiyi, mwene wa jimbulula se mukonda dyahi m’ukulu exile mu dyongeka: exile mu dyongeka phala kubheza Nzambi. Lelu kyene we kimoxi, o Jimbangi ja Jihova ku mundu woso, adyongeka semana joso phala kuximana Nzambi, kwimba ni kusamba. Sayi ithangana ku muvu, ene abhanga yônge ya makota, phala kubheza Nzambi. O Jimbangi ja Jihova awabhela kyavulu kuya mu yônge.
2. Ihi iwandadilonga mu yônge yetu?
O milongi yoso ya yônge yetu itunda mu Bibidya. Etu tutanga o maka a Nzambi ni “kulombolola kyambote o njimbu yê.” (Tanga Nehemiya 8:8.) Mu yônge yetu, eye wandadilongamu ya lungu ni Jihova ni idifwa yê. Kyoso ki uya ni kudilonga dingi ya lungu ni henda ya Jihova, eye wandamuzukama dingi. Wandakwijiya we kyebhi Jihova kya tena ku kukwatekesa kuzediwa ku mwenyu.—Izaya 48:17, 18.
3. Mu yônge wandakwijiyamu athu engi. O kubhanga kiki kwandakukwatekesa kyebhi?
Jihova ututendelesa ‘kudixinganeka mudyetu, kudiswinisa mukudizola ni kubhanga o mbote, ni kwila kitufule kudibhongolola jinga.’ (Jihebelewu 10:24, 25) Mu yônge, wandasangamu athu adisuwa mba adizolo mudyâ. Wandakwivwa athu kuzwela milongi yambote ya Bibidya, iswinisa. Ene amesena we kwijiya dingi ya lungu ni Nzambi, kala eye. (Tanga Loma 1:11, 12.) Ku mbandu ya mukwa, eye wandakwijiya athu avulu, makaza ni akudi, asanguluka ku mwenyu sumbala ni ibhidi yene mu dibhana nayu. O ima yiyi, yene ibhangesa Jihova kumesena kwila etu tudyongeka!
DILONGE DING
Ijiya ihi ibhita mu yônge ya Jimbangi ja Jihova. Ijiya we se mukonda dyahi kima kyambote kubhanga nguzu phala kuya mu yônge.
4. O yônge ya Jimbangi ja Jihova
Mu izuwa ya jipoxolo ja Jezú, o Jikidistá akexile mu dyongeka phala kubheza Jihova. (Loma 16:3-5) Tanga Kolose 3:16, mukusuluka bhanga o kibhwidisu kya kayela:
Kyebhi o Jikidistá kyexile mubheza Jihova mu izuwa ya jipoxolo?
Lelu we kyene kimoxi, o Jimbangi ja Jihova ene mu dyongeka phala kubheza Nzambi, mu ididi ya ubhezelu. Phala kwijiya dingi kyebhi kya bhanga o yônge yiyi, tala OVIDYU. Mukusuluka tala o foto ya lungu ni kyônge, bhanga o ibhwidisu ya kayela.
Mu vidyu iwatale wamono ihi ibhita mu Kididi kya Ubhezelu. Ima yahi ibhita mu Kididi kya Ubhezelu, yadifu ni ima iwatange mu mukanda wa Kolose 3:16?
Ihi iwawabhela dingi mu vidyu mba mu foto iwamono, ya lungu ni yônge?
Tanga 2 Kolindu 9:7, mukusuluka bhanga o kibhwidisu kya kayela:
Mukonda dyahi o Jimbangi ja Jihova kene mu bhinga kitadi mu yônge yâ?
Tala o milongi ya kyônge kya kayela kya semana, kumoxi ni mulongexi wé.
Mbandu yebhi ya kyônge iwawabhela dingi mba yandakukwatekesa?
Eye wakijidile?
Mu jw.org, utena kusangamu o ididi ni izuwa ya yônge yetu ku mundu woso.
Mu yônge yetu tutena kwivwa madiskulusu, kutala ifika ni jividyu. O yônge yetu imateka ni mwimbu ni musambu, ibhwa we ni mwimbu ni musambu
Sayi jimbandu mu yônge, o athu atena kubhana itambwijilu, se amesena
Athu oso atena kuya—kikale o makaza, akudi, adyakime ni anandenge
Mu yônge ya Jimbangi ja Jihova kene mu bhingamu kitadi
5. Kubhinga nguzu phala kuya mu yônge
Tala o phangu ya mwiji wa Jezú. Mivu yoso ene akexile mutunda ku Nazalé, ni kwenda njila ya lebha katé ku Jeluzaleme phala o kyônge kya katunda. Kubhanga o njila yiyi kwabhonzele kyavulu, mukonda ene abhingile kwenda (100) ajikilometulu mba izuwa itatu mu kubanda ni ku kulumuka o milundu. Tanga Luka 2:39-42, mukusuluka bhanga o ibhwidisu ya kayela:
Mudyé, o kwila kwabhingile nguzu phala kwenda o njila yiyi?
Mukonda dyahi sayi bhabha wa bhingi kubhanga nguzu phala kuya mu yônge?
Mudyé, o kwila kima kyambote kuya mu yônge sumbala sayi bhabha kubhonza? Mukonda dyahi?
O Bibidya yamba kwila kima kyambote kudyongeka ni akwetu phala kubheza Jihova. Tanga Jihebelewu 10:24, 25, mukusuluka bhanga o kibhwidisu kya kayela:
Mukonda dyahi twatokala kuya jinga mu yônge?
ATHU AVULU AMBA: “Eye kubhingi kudyongeka ni athu amukwa phala kubheza Nzambi. Kabasa wa tange o Bibidya ubheka wé kubhata, kwabhu.”
Velusu yebhi mba phangu yebhi ya Bibidya ilondekesa o kibanzelu kya Jihova kya lungu ni maka enyá?
IHI IWADILONGO
O kuya mu yônge kwandakukwatekesa kwijiya dingi ya lungu ni Jihova, ni kukolesa o ukamba wé ni mwene. O yônge yandakukwatekesa we kubheza Nzambi kumoxi ni athu engi.
Kubhitulula
Mukonda dyahi Jihova wamesena kwila tuya mu yônge?
Ihi iwandadilonga mu yônge ya Jimbangi ja Jihova?
O kwila o yônge itena ku kukwatekesa dingi mu ukexilu wengi?
TOKWESA DINGI
O kwila wala ni hele ya kuya mu kyônge? Kiki kyabhiti we ni muthu. Tala kyebhi mwene kyeza mu wabhela o yônge.
Tala kyebhi munzangala kyeza mu wabhela o yônge ni ihi ya bhange phala ka fonge mu yônge.
Ijiya ihi ibanza athu engi ya lungu ni kuya mu yônge.
“Mukonda Dyahi Kima Kyambote Kuya mu Yônge mu Kididi Kya Ubhezelu?” (Milongi ya jw.org)
Tanga o musoso wa diyala wexile kisweya. Tala kyebhi o mwenyu wê wa lunguluka kyoso kyayi mu kyônge kya Jimbangi ja Jihova.
“Nga Kexile mu Kuambata o Uta Uami mu Ididi Ioso” (O Mulangidi, wa 1 wa Kavwa wa 2014)