Di Longe O Mak’â Nzambi
O Utuminu ua Nzambi Ihi?
O mbandu íii, ia-nda tambuijila o ibhuidisu i ua mesena o kuijiia, ia-nda kulondekesa se kuebhi ku u tena ku sanga o itambuijilu mu Bibidia iê. O Jimbangi ja Jihova, a mesena kiavulu ku di longa o itambuijilu íii ni eie.
1. O Utuminu ua Nzambi ihi?
O Utuminu ua Nzambi, unguvulu ku diulu. Uene ua-nda bhingana o jinguvulu joso mu ixi, ua-nda bhangesa ué kuila o vondadi ia Nzambi a i bhanga ku diulu, ni mu ixi. Kienhiki, o Utuminu ua Nzambi uene u nguvulu uambote u tua bhindamena.—Tanga Daniiele 2:44; Matesu 6:9, 10.
O utuminu ua tokala u kala ni sobha. Jihova ua solo o Mon’ê, Jezú, phala ku kala Sobha ia Utuminu Uê.—Tanga Luka 1:30-33.
2. Mukonda diahi Jezú muene o Sobha ua tokala o ku tumina?
O Mon’â Nzambi, muene o Sobha ua tokala ku tumina, mukonda muéne mukua henda, ua zolo o kuiuka, iu uala ni kutena kua ku kuatekesa athu. (Matesu 11:28-30) Kioso kia mu fukununa, Jezú uai ku diulu iu ua kingila bhu mbandu ia kadilu ka Jihova. (Jihebeleu 10:12, 13) Mu kusuka-ku, Nzambi ua mu bhana o kutena, iu ua mateka ku tumina ku diulu.—Tanga Daniiele 7:13, 14.
3. Nanhi dingi ua-nda tumina ni Jezú?
O kibuka kia athu ‘a undu’ a solo kua Nzambi phala ku tumina ni Jezú ku diulu. (Daniiele 7:27) O a dianga ku a unda, o jipoxolo ja fiiele ja Jezú. Lelu Jihova uene hanji mu sola athu a fiiele, ki kala mala, mba ahatu. Ene ué a a fukununa mu nzumbi, kála kia fukununa Jezú.—Tanga Nzuá 14:1-3; 1 Kolindo 15:42-45.
Athu ki kuxi a-ndaia ku diulu? Jezú uambe kuila ‘ka kilunga kófele.’ (Luka 12:32) A-nda soka 144.000, a-nda tumina o ixi ni Jezú.—Tanga Dijingunuinu 5:9, 10; 14:1.
4. O Utuminu ua Nzambi ua mateka ku tumina thembu kuxi?
Jezú ua kituka Sobha ku muvu ua 1914.a Muéne ua kaie Satanaji ni madimonho mê iu ua a takula mu ixi. (Dijingunuinu 12:7-10, 12) Tundé kithangana kieniókio, o maka mu ngongo a dimendala. Ima kála o ita, itungutu, nzala, mabhebhu, ni usuéia, ijimbuete ilondekesa kuila o mundu iú, uala mu izuua isukidila-ku. (2 Timote 3:1-5) Oso a mesena ku a tumina ku Utuminu ua Nzambi, a tokala kuijiia kiebhi kia tena ku kala akaiedi a Sobha Jezú—Tanga Luka 21:7, 10, 11, 31, 34, 35.
5. Ihi ia mu bhanga o Utuminu ua Nzambi?
Bhu kaxi ka njimbu iambote iene mu boka athu ku mundu uoso, o Utuminu ua Nzambi uene mu kuatekesa athu a ifuxi ioso kuijiia o jinjila ja Nzambi. (Matesu 24:14) Kiki kia-nda langa o “mundu uavulu,” o athu a-nda ku a tumina kuala Jezú, kioso kia-nda kuíza mu buika o mundu iú ua iibha.—Tanga Dijingunuinu 7:9, 10, 13-17.
Ku 1.000 ia mivu, o Utuminu ua-nda bhanga o ixi palaízu. Mu kusuka-ku, Jezú ua-nda vutula o Utuminu kua Tat’ê. (1 Kolindo 15:24-26) Uejiia muthu ua mesena ku mu tangela o njimbu iambote ia Utuminu ua Nzambi?—Tanga Jisálamu 37:10, 11, 29.
Phala kuijiia dingi, tanga o kibatulu 8 ni 9 kia divulu didi, a di bhange ku Jimbangi ja Jihova. Mu Kidi Ihi i Longa o Bibidia?
[Tanga mu luji]
a Phala kuijiia dingi kiebhi o ikanenu ia Bibidia ilondekesa o muvu ua 1914, tanga o divulu, Mu Kidi Ihi i Longa o Bibidia? Mu jimbandu ja 215-218, a di bhange ku Jimbangi ja Jihova.