IBHUIDISU IA BIBIDIA IO TAMBUIJILE
Mbote iahi i tu katula mu kufua kua Jezú?
Kioso Nzambi kia bhange o athu, muéne ua mesenene kuila ene a kala ku muenhu ki uábhua mu ixi sé ku kata mba kufua. Maji o diiala dia dianga, Adá, ua bhukumukina o Mubhangi iu ua texi o kidielelu kia ku kala ni muenhu ki uábhua. Kuma tu muiji ua Adá, tua lundula o kituxi. (Loma 5:8, 12; 6:23) O Nzambi ia kidi, Jihova, ua tumikisa Mon’ê, Jezú, mu ixi phala kufua ni ku bhulula ioso ia texile Adá.—Tanga Nzuá 3:16.
Jezú uafú phala o athu ku kala ni muenhu ki uábhua ku hádia. U tena ku xinganeka kiebhi kia-nda kala o muenhu sé kufua?
O kufua kua Jezú ku bhangesa kuila o ituxi ietu a i loloke ni ku tu bhana o kidielelu kia ku kala ku muenhu ki uábhua ku hádia. O Bibidia i tu kuatekesa kuijiia kiebhi kia-nda kala o muenhu kioso athu ka-nda kuka dingi, ku kata mba kufua.—Tanga Izaia 25:8; 33:24; Dijingunuinu 21:4, 5.
Kiebhi ki tu tena ku lembalala o kufua kua Jezú?
M’usuku ande dia kufua, Jezú ua tangela o akaiedi’ê phala ku lembalala o kufua kuê. O ku lembalala o kufua kua Jezú mivu ioso, ku tu kuatekesa ku mona kuila Jezú ni Jihova a zolo kiavulu o athu mu ngongo.—Tanga Luka 22:19, 20; 1 Nzuá 4:9, 10.
Ku muvu iú, o Lembalasa ia kufua kua Jezú ia-nda bhita kia Sekunda mu kizuua kia 14 kia mbeji ia Kasamanu, mu ngoloxi. Tua mu kuixana eie phala kuia mu kiônge kiki kumoxi ni Jimbangi ja Jihova ku diembu diê.—Tanga Loma 1:11, 12.