Kiebhi ki tu Kuatekesa o Jikidistá a di Xisa mu Ukaza?

Muhatu ua mu kuatekesa phange ia muhatu a mu senge

Nange uejiia athu avulu a di xisa mu ukaza. Kiki kia mu bhita, mukonda lelu, o ku di xisa ki kima kia bhonzo dingi. Mu kifika, o akua ku tokuesa mu ixi ia Polônia, a londekesa kuila o athu mu kitala kia 30 a mivu, a kala mu ukaza mu mivu itatu mba isamanu, ene a beta-o-kota ku di xisa; maji ko athu a kitala kiki ngó ene mu di xisa.

Saí ditenda ku ixi ia Espanha, dizuela kuila: “A mu mona kuma ku ixi ia Europa, kaxaxi ka athu a kazala, ki ku bhita kithangana a di xisa.” Kiene kimoxi ué mu jixi ja mukuá.

KU BHINGA NGUZU PHALA KU DIVUA KIAMBOTE

Ihi iene mu bhekesa o maka enhá? Saí diiala ku ixi ia Europa, uene mu bhana milongi ku makaza, uambe: ‘O ku di xisa phala o athu oso kuijiia kiá kuila o makaza, ka kexile dingi kiambote, kiki, ki bheka ndolo iavulu.’ Muéne uambe ué kuila: ‘Mukonda dia kiki, ene a kala ni njinda iavulu, a diela, a luuala, a thandanganha, a kala ué ni jisonhi.’ Saí ithangana, o maka enhá a bhangesa o muthu ku mesena ku di jibha. “Kioso kia a batula ku Inzo ia ku Fundisa, ene a mateka ku kala ni ibanzelu iéngi. Mukonda dia ku divua ubheka, o muthu a mu xisa, nange u di ibhuidisa: ‘Kindala ki nga di xisa, eme ngi muthu uahi? Valolo iahi i ngala na-iu?’”

Ewa ua di xisa mivu ku dima, kioso kia xinganeka, muéne uzuela: “Kioso ki tua di xisa, nga kexile ni jisonhi javulu kioso o jivizinhu jami, ni jikoleka jami, kia kexile mu zuela kuila a ngi ‘xisa.’ Nga kexile ni njinda iavulu. Ni an’a kiiadi u nga xala nau, eme ng’exile ngi mama, ngi tata.”a Adam, uexile kafunga kambote mu 12 ia mivu, u zuela: “Ki ngi kexile dingi mu di suua, saí ithangana nga kexile mu kala ni njinda iavulu, ni ku mesena ku kala ngó ubheka.”

KU BHINGA NGUZU PHALA KU DIVUA KIAMBOTE

Mukonda dia ku xinganeka kiavulu kiebhi kia-nda kala ku hádia, saí iâ, kia a bhonza o ku divua kiambote, né muene se kua bhiti kiá mivu iavulu kioso kia di xisa mu ukaza. Nange ene a banza kuila o athu ka mu ku a suua. Saí muhatu uambe: “Ene a tokala ku lungulula o ukexilu uâ, ni ku di longa ku di bhana ni maka a mu bhita nau.”

Stanisław u lembalala: “Kioso ki nga di xisa ni muhatu’ami, muéne ua ngi fidisa ku mona o tuana tuami. Kiki kia ngi bhangesa ku banza kuila, se-ku muthu ua kexile mu ngi suua dingi, né muene Jihova, ka kexile dingi mu ngi suua. Nga mesenene kufua. Mu ku bhita kithangana, nga mono kuila ki ngi kexile mu banza kiambote.” O ku xinganeka ihi ieji bhita na-iu ku pholo, kua thandanganhesa ué muhatu ua di xisa mu ukaza, a mu ixana Wanda, muéne uambe: ‘Ki ngi kexile ni phata ia ku banza kuila, o athu ni jiphange mu kilunga keji ngi suua dingi, ni an’ami. Maji nga mu mona kuila, kioso ki nga kexile mu di suínisa phala ku sasa o tuana tuami mu njila ia Jihova, o jiphange ja ngi kuatekesa.’

Mu kuívua o misoso íii, u tena ku mona kuila kioso o athu kia di xisa, a kala ni ibanzelu ia iibha. A banza kuila kala dingi ni valolo, ni kuila o athu ka tokala ku a suua. Ene a mateka ué ku tatela o athu. Mukonda dia kiki, nange a mona kuila o jiphange mu kilunga kala mu ku a suua dingi. Maji né kiki, o misoso ia Stanisław ni Wanda, ilondekesa kuila o athu a di xisa mu ukaza, a mona kuila o jiphange jâ a tena ku a kuatekesa. Sé phata, o jiphange mu kilunga, ene mu kuatekesa kiavulu, né muene se ku dimatekenu o muthu ala ku mu kuatekesa ka mu mona o kikuatekesu kiâ.

MUTHU U DIVUA UBHEKA NI IBANZELU IA KU KAMBA VALOLO

Kana ku jimba kuila né muene se tu bhanga ima iavulu, saí ithangana o jiphange a di xisa mu ukaza, a divua ubheka. Benge-benge o jiphange ja ahatu, nange a banza kuila o jiphange mu kilunga ka mu ku a suua. O phange Alicja uambe: “Kua bhiti kiá nake dia mivu tundé ki nga di xisa mu ukaza. Maji né kiki, saí ithangana ngi divua hanji kala ki ngala ni valolo. Saí ithangana ngi mesena ku kala ubheka, mu ithangana ia mukuá, kioso ki ngi kala ubheka uami, ngi dila.”

Sumbala o athu a di xisa ene mu kala ni ibanzelu íii, o Bibidia i longa kuila, o athu ka tokala ku kala ubheka. O muthu u kamba ku belesela o itendelesu íii, u tena ku dituna o ‘unjimu ua kidi.’ (Jisa. 18:1) Maji o muthu u divua ubheka, ua tokala kuijiia kuila, ki kima kiambote ku sota kikuatekesu mu ithangana iavulu ku diiala, mba ku muhatu. Se a belesela o kitendelesu kiki, ki kia-nda ku a bhekela maka.

O jiphange jetu a di xisa, nange a kala ni ibanzelu ia iibha, kála o hele ia ima ia tena ku bhita na-iu ku hádia, mba ku banza kuila o athu ka-nda ku a mona kiambote. Mu kuijiia kuila ki kima kia iibha ku kala ni ibanzelu íii, ni kuila ki bhonza ku di bhana ni ibanzelu íii, tua tokala ku kaiela o phangu ia Jihova mu ku kuatekesa o jiphange jetu. (Jisá. 55:22; 1 Phe. 5:6, 7) Tua tokala kuijiia kuila, ene a-nda sakidila kiavulu, kabasa kikuatekesu ki tu a bhana. Sé phata, ene a-nda sanga mu kilunga, o kikuatekesu kia makamba a kidi!—Jisa. 17:17; 18:24.

a Saí majina a a lungulula.

KIEBHI KI U TENA O KU KUATEKESA?

Eie u tena ku bhana kikuatekesu kia tokala? Ihi i u tena o ku bhanga phala ku kuatekesa muthu kala ió a a tange ku dimatekenu dia milongi íii? Xinganeka ihi i zuela o Bibidia, ni u mone kiebhi o Jikidistá ja fiiele kia bhana o kikuatekesu kia tokala.

Kála u ngivuidi ia unjimu. (Jisa. 16:20, 23)

Eie uejiia kuila kioso o dikaza kia di xisa, sumbala muéne ka mesena ku zuela o maka a bhekela ku di xisa. O kuzuela o maka a bhekesa o ku di xisa, ki ku bhekesa kasembele, maji ku bhekesa dingi ku luuala. (Jisa. 12:25; Loma 12:15) Michał, ua kuatekesa Adá tua mu tange kiá ku thunda, ua xikina kuila, tu tena kuívua kiambote ni henda ni ku tendela kiambote, sé kuibhula o ima ioso ia bhiti. Muéne uambe: “Eme nga kuatekesa Adá mu ku mu zuelela kuila, se u ngi tangela kima mu kithangana kia ku luuala, sumbala ua-nda ngi tangela kima, ku tokelele ku ngi tangela-kiu, mu kithangana kioso ki u tululuka, mu kiki, ua-nda diela.” Mu kiki, Michał, ua mu londekesa kuila muéne ka mesena kuívua ioso ia bhiti. Maji né muene kiki, muéne uevu kiambote kala kia tokala o dikamba dia kidi. Etu tu tena ku kuatekesa athu ande dia iônge, ni kioso ki bhua o iônge, mu izuelu ia bhebhuluka kála, ‘Kiebhi ki uala? Eme ngi xinganeka kuila eie ua mu bhita mu ithangana ia bhonzo. Nga-nda ku ku kuatekesa.’

Londekesa kuila ua mesena o mbote iâ. (Fil. 2:4)

Mirosław uambe: “O muhatu’ami n’eme, tuene mu katula kithangana phala ku kuatekesa phange ia muhatu a mu xisa. Mu kifika, etu tua iudika o sabhi ia dibhitu diê. Etu ué tua mu ambata kua dotolo.” O ima íii, i tena kulondekesa kala ki kima kia valolo, maji i kuatekesa kiavulu. O phange a mu kuatekesa ku dikaza, muéne ua kuata o kuenda ni ku suína bhofele, bhofele. Mu ku bhita kithangana, muéne ua kuata o ku kalakala kála muboki ua thembu ioso, o mon’ê uala ni 11 dia mivu a mu batizala.

Tangela o muthu a mu xisa mu ukaza kuila, Jihova uejiia o maka a mu bhita nau.

Se bhu kala muthu u banza kuila muéne kala ni valolo, eie ua tokala u mu lembalesa kuila, Jihova u bhana valolo ku jiselevende jê, ku muthu ni muthu. Se-ku phata kuila, o ‘tudièdie né tua ndumba, etu tua beta ukota.’ Etu ki tu sokela ni tudièdie, etu tuala ni valolo ku mesu mê. (Mat. 10:29-31) “ Jihova muene mukua kutungula o mixima ia athu,” mu kiki, muéne u tendela ió a a xisa mu ukaza. Muéne ka-nda ku xisa o jiselevende jê. (Jisa. 17:3; Jisá. 145:18; Jihe. 13:5) Kioso ki ua mu kuatekesa o muthu, u mu lembalesa kuila, Jihova u bhana valolo ku henda ia mu londekesa mu ku di longa o kidi, ni nguzu ia mu bhanga phala ku kuatekesa o ubhezelu ua kidi.—Fil. 2:29.

Kuatekesa o muthu a mu xisa mu ukaza, phala ka xise o kilunga.

A mukuá kia a bhonza kuia mu iônge kioso kia kala ni maka. Maji o iônge íii, phala ku suínisa ni ku kolokotesa—mba ‘ku kuatekesa.’ (1 Kol. 14:26; Jisá. 122:1) Kima kiambote se o tufunga ene a tuamena mu ku bhanga kiki. Wanda a mu tange kiá ku dima, ua di lembalala: “Etu hanji tua di lembalala ku kikuatekesu kiâ kia henda.”

Suínisa o muthu a mu xisa mu ukaza, mu ku kolokota mu ukamba uê ni Nzambi, bhu kaxi ka musambu ni ku di longa ubheka ué ni ku xinganeka ia di longo. (Tiia. 4:8)

Jihova muéne Suke-Ko, muéne ua tungu ku diulu, u suua ‘uoso o ngadiama uala ni muxima ua toloka, anga u kenanena kizuelu kiê.’ Lembalesa o muthu a mu xisa mu ukaza, ni u mu tangele kuila, kala muthu mudietu, a tu kuatekesa ku kala ni ukamba ni Nzambi bhu kaxi ka musambu ni ku di longa ubheka.—Iza. 66:2.

Exana o muthu phala ku kalakala kumoxi mu sidivisu ia kuboka, mba o ku pelepalala o milonga ia kiônge.

Kiki kia-nda kuatekesa o Kidistá a mu xisa mu ukaza, o ku divua kiambote ku muenhu. Marta, ua kuatekesa o phange ia muhatu ua suínine mu ubhezelu, maji ua tolokele o muxima kioso kia mu xisa mu ukaza, uambe: “Etu tua boko kumoxi mu ithangana ioso. Tua kexile mu sanguluka kioso ki tua kexile mu bhanga ioso i tu bakana mu ukunji. Mu veji javulu, tua kexile mu pelepalala kumoxi o iônge, mu suluka tu bhanga kúdia kuambote phala etu kudia.”