DIAMBU DIA KAPA | MUKONDA DIAHI KIMA KIAMBOTE KUKALA MUKUA KIDI?
O Kuila o Kuzuela o Kidi ki Kuene Dingi ni Valolo?
Hitoshi uexile mukua kukondala kitadi mu ditenda mu ixi ia Japão. Kioso muéne ni xefe iê kia kexile mu kondala o kitadi kia ditenda, Hitoshi a mu bhingi kuala o xefe iê kutanga makutu mu kusoneka o mukanda ua kitadi. Maji Hitoshi ua mu tangela kuila, keji tena kubhanga kiki, mukonda dia Mak’â Nzambi. Mukonda dia kiki, Hitoshi a mu kaie ku salu.
Mu jimbeji ja kaiela-ku, Hitoshi ua luualele kiavulu mukonda kejidile se ueji tena kusanga salu iéngi. Mu kifika, saí kizuua mu kusota salu, Hitoshi ua jimbulula kuila keji xikina kubhanga kikalakalu kia lungu ni kutanga makutu. O muthu ua kexile mu muibhuidisa, uambe: “O ibanzelu iê ki i difu ni ia athu oso!” Hitoshi ua luualele, maji o muiji uê ni makamba mê a mu suínisa kukolokota kuenda mu kidi. Mu kifika, muéne uambe: “Nga kexile mu dibhuidisa se kiexile muene kima kiambote kukala mukua kidi.”
O musoso ua Hitoshi u londekesa kuila, athu avulu ka uabhela kuzuela o kidi. Amoxi a banza kuila, athu oso mu matenda a tokala kutanga makutu, se ki kiene ka-nda ditunda kiambote. Saí muhatu, mukalakadi mu ixi ia África do Sul, uambe kuila: “A ngi kondoloka ku athu a uabhela kutanga makutu, kienhiki saí ithangana ene a ngi jijidika kukala kála ene.”
Lelu o kutanga o makutu kua muangana ixi ioso. Mivu ku dima, o ngijiie ngana Robert Feldman, mesene mu xikola ia katunda ia Massachusetts Amherst, ua tokuesa iu ua mono kuila, adiakime avulu mu ku dizuelesa mu dikuinhi dia ithangana, kene mu kamba kutanga makutu. Ngana Feldman uambe dingi: “Tua diuanene kiavulu. Ki tua ki fikile kuila o athu eji tanga makutu izuua ioso.” Athu avulu ka uabhela ku a tanga makutu, maji ene a uabhela kutanga makutu ku akuâ.
Mukonda diahi o kutanga makutu, kunhana, ni kunganala kua muangana ixi ioso lelu? Mukonda diahi ki kima kiambote kutanga makutu? Ihi i tua tokala o kubhanga phala ki tu kale ni maukexilu iá a iibha.