Ujitu ua Beta-o-kota ku Maujitu Moso

O KISONGELU kia lapi kia difu ni baluku kia tambula Njolodá, kiedi kala ki kiala ni valolo. Maji lelu, kima kia beta-o-kota mu valolo phala muene. Njolodá uambe: “Lusele, muadiakime kiá uexile dikamba dia muiji, muéne ua ngi bhanene na-kiu kioso ki ngexile ngi mona-ndenge.” Kioso kiafu Lusele, Njolodá ueza mu kuijiia kuila, Lusele uexile muthu uambote ni kukué ni tata jê, mu ku a kuatekesa mu ithangana ia bhonzo. Njolodá uambe dingi: “Mukonda dia kuijiia kiambote Lusele, o ujitu iú uofele ua ngi bhanene, ua beta-o-kota mu valolo lelu, mu ukulu ndenge.”

O musoso iú ua Njolodá, ulondekesa kuila o ujitu, u tena kukala ni valolo mba sé valolo ku mesu m’athu. Maji phala o mukua kusakidila, o ujitu kima kiala ni valolo ia dikota. O Bibidia i zuela ia lungu ni ujitu ua beta-o-kota o maujitu oso ndenge. O Bididia iamba: “Mbata Nzambi ua zola o mundu, katé kia suku mu kubhana Mon’ê umoxi-èlele, phala uoso u mu xikana muène, káfue, maji a kale ni muenhu ki uábhua.”​—Nzuá 3:16.

Ujitu u tena kubheka muenhu ua kalela-ku, ku muthu uoso u u tambula! O kuila kuala dingi ujitu ua beta-o-kota mu valolo o iú ndenge? Né muene athu avulu kene mu bhana valolo ku ujitu iú, maji o Jikidistá ja kidi ene mu mona kuila ‘uate kiavulu.’ (Jisálamu 49:8; 1 Phetele 1:18, 19) Mu kiki, mukonda diahi Nzambi ua bhana o muenhu ua Mon’ê kala ujitu phala o mundu?

Poxolo Phaulu ua jimbulula se mukonda diahi, muene uambe: “Kala kiki, mukuâ ni kia bokona o ituxi mu ngongo ku muthu umoxi, o kufua kù kuejila mu ituxi; kiene ue kia bhiti o kufua ku thandu dia athu oso” (Loma 5:12) O diiala dia dianga Adá, ua te kituxi mu luelu mu kubhukumukina Nzambi, mukonda dia kiki a mu balakala mu kufuá. Mukonda dia Adá, athu oso ku mundu a lundula o kufua.

“Kuma o futu ia ituxi kufua. Maji o ujitu-phe ua Nzambi muenhu ki uabhua, mua Kristu Jezú, Ngana ietu.” (Loma 6:23) Phala kubhulula o athu ku kituxi ni ku kalunga, Nzambi ua tumikisa Mon’ê Jezú Kristu mu ixi, phala kusatela o muenhu uê ua iuka ku athu. Mukonda dia sata íii a ixana “kukula,” oso a xikana Jezú, a-nda kala ni muenhu ua kalela-ku.​—Loma 3:24.

Mu kuzuela ia lungu ni mabesá oso a bhana Nzambi ku abhezi’ê bhu kaxi ka Jezú Kristu, Phaulu uambe: “Tu sakidilienu Nzambi mukonda dia henda iê ku i tanga ki i xikina.” (2 Kolindo 9:15) Kiene muene, o kukula kima kia madiuanu, ki bhonza kiavulu ku kilombolola kiambote. Maji mukonda diahi, o ujitu ua kukula ua beta dingi kota mu valolo, o maujitu oso a bhana Nzambi ndenge? Mu ukexilu uehi, o ujitu iú ki u difu ni maujitu moso ma bhana Nzambi?a Kiebhi ki tua tokala o kumona o ujitu iú? Tua ku bhingi tanga o itambuijilu ia Bibidia, ia ibhuidisu íii mu mbandu jiiadi ja milongi ia-nda kaiela.