DIAMBU DIA KAPA | JIANJU—O KUILA KUENE MUENE JIANJU? MUKONDA DIAHI KIMA KIAMBOTE KUIJIIA O MAKA ENHÁ?
Kiebhi o Jianju ji Tena ku ku Kuatekesa?
O jianju ja fiiele a mesena kiavulu o mbote ia athu, jene ja dibhakula ue mu kubhanga o vondadi ia Jihova. Kioso Nzambi kia bhange o ixi, o jianju “ja kexile mu kuimbila kumoxi ni kusanguluka, o an’a Nzambi oso anga a kala mu tana.” (Jobe 38:4,7) Tundé ukulu o jianju ja mesena kiavulu ‘kutongolola’ o ima ia upolofeta ia lungu ni ioso ia-nda bhita mu ngongo ku hádia.—1 Phetele 1:11, 12.
O Bibidia ilondekesa kuila, phala kukumbidila o vondadi ia Nzambi, o jianju sai bhabha a langa o abhezi a kidi a Nzambi. (Jisálamu 34:7) Mu kifika:
Kioso Jihova kia buikisa o jimbanza jaiibha ja Sodoma ni Ngomola, o jianju ja kuatekesa Lote ni muiji uê kutunda ni kulenga ni lusolo luoso.—Dimatekenu 19:1, 15-26.
Mu Babilonha iokulu, kioso minzangala itatu Jihebeleu kia a te mu kijiku kia tubhia n’a fu kuenhomo, Nzambi ‘ua tumu anju iê iú ua kudila jiselevende jê.’—Daniiele 3:19-28.
Kioso Daniiele muthu ua fiiele kia bhitile usuku ua muvimba mu dikungu dia jihoji, muene ua jimbulula kuila ua bhulukile mukonda ‘Nzambi ua tumina anju iê, iú ua jika o makanu ma jihoji.’—Daniiele 6:16, 22.
Tundé ukulu o jianju jene mu kuatekesa o mundu ua Nzambi
O JIANJU JA KUATEKESA O JIKIDISTÁ JA DIANGA
Sai ithangana, o jianju ja Nzambi ja kuatekesa o ikalakalu ia kilunga ku hama ia dianga, ja bhangele kiokio phala kukumbidila o vondadi ia Jihova. Mu kifika:
Anju imoxi ia jikula o mabhitu a kaleia iu ua suinisa o jipoxolo ja kexile mu kaleia muenhomo phala a suluke mu kuboka mu tembulu.—Ikalakalu 5:17-21.
Anju imoxi ia tumu o muboki Filipe phala kuia mu njila ia kikangalakata i tunda mu Jeluzaleme iia katé mu Ngaza phala kukuatekesa diiala mukua Itiiópia uendele mu Jeluzaleme kubheza Nzambi.—Ikalakalu 8:26-33.
Kioso kia tudile o kithangana kia ió kexile Jijudé kukituka Jikidistá, o disoladi dia Loma ngana Koloneliu a mu kundu kuala anju, anga a mu tendelesa kutuma kutakana Phetele n’eze kubhata die-muene.—Ikalakalu 10:3-5.
Kioso poxolo Phetele kia kexile mu kaleia, kua mu monekena anju ia mu tubhula bhu kanga dia kaleia.—Ikalakalu 12:1-11.
KIEBHI O JIANJU JI TENA KU KU KUATEKESA?
Se-ku kima kilondekesa kuila, Nzambi katé kiki ua mu tuma jianju phala kukuatekesa o jiselevende jê mu madiuanu kala kia kexile mu bhanga m’ukulu. Ia lungu ni izuua ietu Jezú uambe: “O Njimbu iíi Iambote ia Utuminu ua Nzambi, ia bhingi ku i tula mu ngongo ioso, mu kubhana umbangi ku akua jixi joso; kiene kiua kia kèza dizubhilu.” (Matesu 24:14) Ua kijidile kuila o jianju ja mu kuatekesa o kikalakalu kia kuboka kia mu bhanga o maxibulu a Kristu?
Jianju ja mu kuatekesa o kikalakalu kia kutula o njimbu iambote mu ngongo ioso
O divulu dia Dijingunuinu dilondekesa kuila o jianju eji kala ni kikalakalu kiavulu kia kukuatekesa o athu mu ixi ioso kuijiia ia lungu ni Jihova Nzambi ni ima ia-nda bhanga phala o athu. O poxolo Nzuá ua soneka: “Anga ngi mona anju iamukua ia mu bhita bhulu, ia di lèka, o bhu ala kubhitila, uasu o mbambe ni diulu. Uambata o jingolokela ji xalelà-ku ja Njimbu Iambote, phala ku ji kolela athu oso a tungu mu ngongo, ku ifuxi ioso, ni madimi, ni madiembu. Anga u tanga ni dízui dia suina uixi: Nzambi mu kuatedienu uôma, mu ximanienu o unène uê! Kuma o kumbi diê dia kufundisa athu oso ia bhixila! Mu bhezienu, ió ua bhanga o diulu, ni oxi, ni musanza ua kalunga ni jithu ji fuafua o menha!” (Dijingunuinu 14:6, 7) Misoso iavulu ilondekesa kuila o jianju, ja mu kuatekesa o kikalakulu kia kuboka mu ngongo ioso. Mu kidi, kioso muthu kia diela o ituxi iê, anga u vutuka dingi kua Jihova, o ‘kusanguluka kuvula ku pholo ia jianju ja Nzambi.’ (Luka 15:10).
Ihi ia-nda bhita kioso o kikalakalu kia kuboka ki kia-nda suka? ‘O ifuxi ia makuenze mba ia jianju mu diulu’ a-nda kuatekesa Jezú Kristu, o Sobha ia jisobha, mu ita ia Alumajedone, o “ita ia kizuua kia Dikota kia Nzambi, Muteni-a-Ioso.” (Dijingunuinu 16:14-16; 19:14-16) Jianju jala ni kutena kuavulu a-nda ji tuma phala kubuikisa athu aiibha kioso Jezú kia-nda bheka “kaxtiku ku oso . . . nguauâ kutumaka o njimbu ia ngana ietu Jezú Kristu.”—2 Tesalonika 1:7, 8.
Mu kiki, xala mu kuijiia kuila o jianju ja mesena o mbote ié. Ene a mesena kiavulu o mbote ia athu oso a-ndala kusidivila Nzambi, mu kiki Jihova mu veji javulu u ji tuma phala kukuatekesa ni kusuinisa o jiselevende jê ja fiiele mu ixi.—Jihebeleu 1:14.
Kala muthu mudietu ua bhingi kusola kima. Tua-nda kuívua ni kubelesela o njimbu iambote a mu i tula mu ngongo ioso? O Jimbangi ja Jihova mu diembu diê a-nda sanguluka kiavulu mu ku ku kuatekesa kukatula mbote mu kikuatekesu ki bhana o jianju ja Nzambi.