Kyoso ki u Kala ni Uhaxi wa Bhonzo

“Kyoso kya ngi tangela kwila ngala ni uhaxi wa kisongo ku kizavu ni mu mudya, nga divwile kala a ngi tangela kwila nga-nda fwa. Maji mu ku tunda ku dotolo kyoso ki nga bhixila kubhata, eme nga banze, ‘KYAMBOTE, kiki ki kyene ki ngexile mu kingila, maji nga tokala ngi sanga phangu ya kukolokota.’” —Linda, wala ni 71 ya mivu.

“Nga kwata uhaxi wa bhonzo u bheka ndolo yavulu ku mbandu ya kyasu ya pholo. Izuwa yiyi uhaxi yú wa mu bhana jindolo javulu ja mu ngi bhekela kuluwala kwavulu. Sayi ithangana, ngexile mu divwa ubheka, nga mesenene ku dijibha.”—Elise, wala ni 49 dya mivu.

Diyala dya kate wa xikama ku kyalo kya malola, a mu kondoloka ku jindandu jê ja kazola

SE EYE mba muthu wa mu zolo u kwata uhaxi wa bhonzo kinene, eye wejiya kwila kiki kibhonza kyavulu, ki tena kubhekela malamba avulu. Ko uhaxi ngo, kumoneke we o hele ni njinda. O wôma ni kikote, u tena kudibandekesa mukonda dya kuya izwa yoso mu inzo ya ku saka, sayi bhabha kubhonza kutambula o milongo, mukonda dya kukamba ku i futa, muthu u tena kudivwa kyayibha. O ndolo ivwa o haxi i dibandekesa dingi.

Kwebhi ku tu sota o kikwatekesu? Athu avulu a mono kwwila, o kudivwa kyambote kwijila mu kusamba kwa Nzambi ni kutanga ibatulu ya Bibidya i swinisa. O kikwatekesu kya mukwa kijila bhu kaxi ka henda ya jindandu ni makamba.

IHI YENE MU KWATEKESA AKWETU KUKOLOKOTA?

Robert wala ni 58 dya mivu wambe: “Kála ni kixikanu kwa Nzambi mu kudibhana ni uhaxi wé, mwene wa-nda ku langa. Samba kwa Jihova. Mu tangele kyebhi ki wa mu divwa. Bhinga o nzumbi yê ikôla. Bhinga kwa mwene phala ku ku bhana nguzu ni kukwatekesa o mwiji wé mu kithangana ki wa mu bhita ni uhaxi.”

“Kima kyambote kyoso o mwiji wé u ku kwatekesa, kyoso ene kya kala n’eye ithangana yoso. Exile mu ngi xinda izuwa yoso mu ku ngi bhwidisa, ‘Kyebhi ki wala?’ Nga tambula kikwatekesu kya makamba a ididi yoso. Ene a ngi bhangesa ku divwa kyambote, ni ku ngi kwatekesa kukolokota.”

Se eye u dikamba, wa mu kunda muthu wa kate, tala ya zwela Linda: “Sé phata, o haxi wa mesena kwambata o mwenyu wê kala ki bhanga akwâ, nange ka-nda mesena kuzwela ya lungu ni uhaxi. Mu kiki zwela-né o ima i mwene mu zwela.”

Ni kikwatekesu kya Nzambi, kya mikanda ikôla ni henda ya jindandu ni makamba, etu tu tena kudyelela kwila o mwenyu wala ni valolo ya dikota, sumbala ni mawuhaxi a bhonzo.

Jivelusu ja Bibidya ji Tena ku ku Kwatekesa

Dyelela kwa Nzambi.

“Nga soto Jihova, yú wetaya. wa ngi kudila ku ima yoso i ngi kwatesa woma. Ngadyam’iyi ya dikola, Jihova wa mu ivu.”—Jisálamu 34:4, 6.

Linda, a mu tumbula ku dimatekenu, wambe: “Eme ki ngi sambe ngó kwa Jihova phala ku ngi saka, maji ngi samba mu kubhinga nguzu, phala kudibhana ni uhaxi wami.”

Tanga o maka a Nzambi phala u kolokote.

“Ki bhwa kà kala mukwa-bhata wila: Nga kata.”—Izaya 33:24.

Xinganeka mu ikanenu ya Nzambi ya lungu ni hádya. Kubhanga kiki kwa-nda kubhana kidyelelu.

Bhinga kikwatekesu ku jindandu ni makamba.

“Dikamba u zola mu thembu joso; o ndandu u di monekena mu jiphaxi.”—Jisabhu 17:17.

Elise a mu tumbula ku dimatekenu wambe: “kana kukala ubheka wé, ehela o makamba mé ku ku kwatekesa. Sayi ithangana wa-nda divwa ubheka, wa-nda xinganeka kwila Nzambi kya mu ku kwivwa, maji ki wala ubheka kana.”