Mukonda Dyahi o Mwenyu WALA ni Valolo

Faizal wa bhingile ku mu bhanga pelasá ku muxima kyoso kya bhitile muvu tundé muhatu wê kyafu. Mwene wambe: “Kyoso ki nga tange o divulu dya Jobe, nga tendela kwila Jihova ka tumu ku di soneka mu kingoho kana. Kyoso ki tu tanga mu Bibidya misoso ya athu a dibhana we ni ibhidi kala o ibhidi yetu, kiki ki tu swinisa.” Mwene wambe dingi: “O mwenyu wala ni valolo ya dikota”.

Tarsha wexile munzangala kyoso manyá kya fu. Mwene wambe: “Mukonda dya kwijiya o Mubhangi wetu, ki bhana kidyelelu ku mwenyu wami mwenyu wami, ni kusanguluka, né mwene ni maka avulu u ngala na-u. Tu tena kudyelela kwila Jihova u tu bhana yoso i twa bhindamena mu kizuwa ni kizuwa.”

O MILONGI I TWA DILONGO kudima ya tu londekesa kyebhi o ibhidi i tena kubhonzesa o mwenyu wetu. Kyoso ki uya ni kukolokota mu ibhidi yé, nange u dibhwidisa se o mwenyu wala mwene ni valolo, ni se sayi muthu u ku suwa. Dyelela kwila Jihova u langa o ibhindamu yé. Eye wala ni valolo yavulu ku mesu mê.

O musoneki wa Sálamu 86 wa londekesa o kidyelelu kyé kwa Nzambi: “Bhu kizuwa kyami kya lamba ngi dikola kokwé; kuma eye ku kambe ku ng’itaya.” (Jisálamu 86:7) Eye nange u dibhwidisa: ‘kyebhi Nzambi kya-nda ngi langa “bhu kizuwa kyami kya lamba?”

Né mwene Nzambi ka-nda batula o maka mé mu kithangana ki wa mesena, o Maka mê o Bibidya, a kubhana kidyelelu kwila, wa-nda kala ku paze, a-nda ku ku kwatekesa: “Ki mu kale ni héle ya kima, ki mu ile bhidibhidi, maji ima yoso-phe yiza-ku, mwila ni kusamba ni kudyonda, kumoxi ni kusakidila, mu e-nde ni kubhinga kwa Nzambi yoso i mwa mesena; Bhenyobho o kutululuka kwa Nzambi kwa somboka o kitongolwelu kyoso kya muthu, kwa-nda ku mi bateka mixima ni ilunji.” (Filipe 4:6, 7) Twa ku dyondo, tala kyebhi o ibatulu ya Bibidya i tu bhana kidyelelu kwila, mu kidi Nzambi u tu langa.

Nzambi wene mu ku suwa

“[Tudyèdye] ni kamoxi-phe ngó ki ka jimbi ku mesu ma Nzambi. . . . mukonda jimbódyo né ji kala javulu, enu kota.”—Luka 12:6, 7.

XINGANEKA: O tunjila twofele kala o tudyédye, twa kambe valolo bhu pholo ya athu, maji Nzambi u tu langa. Nzambi u mona o tudyédye twoso; athu ala dingi ni valolo o tudyédye ndenge. O athu o kibhangelu kya katunda kya Nzambi mu ixi. A a bhange mu “kidifwanganu” kyê, a tena kulondekesa o idifwa ya Nzambi.—Dimatekenu 1:26, 27.

“U Jihova, eye wa ngi solokota, wa ng’ijiya. . . . O ilunji yami ni mu kanga muná ya ku jimbulukila kyá . . . Ngi lole; u ngi tongolole o ilunji yoso.”— Jisálamu 139:1, 2, 23.

XINGANEKA: Nzambi wa kwijiya kyambote. Mwene wejiya kyambote o ixinganeku yé ni ibhindamu yé. Nange akwenu ka tendela yoso i wa mu bhita na-yu, maji Nzambi wejiya, yu wa mesena ku ku kwatekesa. Kiki ki ku bhangesa kumona kwila, kima kyambote kukala ku mwenyu.

Mwenyu wé wala ni valolo

“Ng’ivwe o musambu wami, u Jihova, kudikola kwami ku bhixile ko kwé. . . . Bheteka o dítwi dyé ko kwami, kyoso ki ngi ku ixana u ng’ivwe mwene lusolo. . . . Wa suwu kyá o kusamba kwa jihukunyu.”—Jisálamu 102:1, 2, 17.

XINGANEKA: Jihova u mona o masoxi a athu oso ene mu dila mukonda dya jihadi ja tala. (Jisálamu 56:8) Nzambi u mona we o masoxi mé. Nzambi u dilembalala o masoxi mé ni ibhidi i wene mu dibhana na-yu, mukonda eye wala ni valolo ku mesu mê.

“Kana kubhuwama, mbata eme ngala ngi Nzambi yé; eme ngi ku swinisa, hé ngi ku kwatekesa . . . Mbata eme, ngi Jihova Nzambi yé . . . Ku kale ni wôma, eme ngi ku [kwatekesa]”—Izaya 41:10, 13.

XINGANEKA: Nzambi wala pholondo phala ku kukwatekesa. Se u dibhala, mwene wanda ku ku balumuna.

Kidyelelu kya Mwenyu wa Yuka ku Hádya

“Mbata Nzambi wa zola o mundu, katé kya suku mu kubhana Mon’ê umoxi-èlele, phala woso u mu xikana mwène, káfwe, maji a kale ni mwenyu ki wábhwa.”—Nzwá 3:16.

XINGANEKA: Nzambi wa ku zolo kyavulu, kiki kya mu bhangesa kubhana Mon’ê Jezú kala sata ya kukula phala eye. O sata yiyi i ku bhana kidyelelu kya ku sanguluka ni kukala ku mwenyu ku hádya.a

Sumbala u dibhana ni ibhidi, o mwenyu wé nange u bhonza kyavulu, né kiki, dilonge kyambote o Maka a Nzambi, kolokotesa o kixikanu kyé mu ikanenu ya Nzambi. Kiki kya-nda ku ku bhana kisangusangu ni kumona o kwila o mwenyu wala ni valolo.

a Phala kwijiya dingi kyebhi ki u tena ku katula mbote mu sata ya kukula ya Jezú, tala o vidyu Mukonda Dyahi Jezú Wafu Lembalala o Kufwa Kwa Jezú mu www.jw.org. Bweta ku mbandu IA LUNGU N’ETU > LEMBALASA.