Mulangidi KIDIDI KYA KUBHAKA MADIVULU MU INTERNETE
Mulangidi
KIDIDI KYA KUBHAKA MADIVULU MU INTERNETE
Kimbundu
  • BIBIDYA
  • MADIVULU
  • YÔNGE
  • w19 Mbeji Ia Kanake jimb. 8-13
  • Tolola Ixinganeku Yoso i Bhangesa Kuxibhaka o Milongi ya Nzambi!

O vidyu iwasolo seku luwa.

Tuloloke, kwamoneka kibhidi mu kujikula o vidyu.

  • Tolola Ixinganeku Yoso i Bhangesa Kuxibhaka o Milongi ya Nzambi!
  • O Mulangidi U Bhana Ngolokela ia Utuminu Ua Jihova (Phala ku di Longa)—2019
  • Tudyambu
  • Milongi Yadifu
  • “KATÉ KILUNJI KYENU KYEZA KU UBHE”
  • “MU BILUKE KYENGI MU ILUNJI YENU NI MU MIXIMA YENU MOXI”
  • KYEBHI KI TU TENA KUBILULA O KILUNJI NI MUXIMA WETU MOXI
  • ‘KOLESENU O KIXIKANU KYENU’
  • O Kuila a Mi Lungulula Kua Nzambi?
    O Mulangidi—2013
  • O Kuila o Bibidia ia mu Lungulula Hanji o Muenhu Ué?
    O Mulangidi U Bhana Ngolokela ia Utuminu Ua Jihova (Phala ku di Longa)—2016
  • “Ehelenu Nzambi Kulungulula o Ilunji Yenu”
    O Mulangidi U Bhana Ngolokela ia Utuminu Ua Jihova (Milongi Phala Kudilonga)—2023
  • Nanyi wa mu Funyisa o Ixinganeku yé?
    O Mulangidi U Bhana Ngolokela ia Utuminu Ua Jihova (Phala ku di Longa)—2018
Tala dingi ima yamukwa
O Mulangidi U Bhana Ngolokela ia Utuminu Ua Jihova (Phala ku di Longa)—2019
w19 Mbeji Ia Kanake jimb. 8-13

MILONGI YA 24

Tolola Ixinganeku Yoso i Bhangesa Kuxibhaka o Milongi ya Nzambi!

“Tu lundumuna ikutu ya makutu, ni ima yoso ya ukumbu wa xitu ki i ehela athu ku’ijiya Nzambi.”—2 KOL. 10:4, 5.

MWIMBU 124 Tu Kalyenu Jifiyel

ITWANDADILONGAa

1. Kidimwinu kyebhi kya bhanene Phawulu ku Jikidistá a a undu?

POXOLO Phawulu wa dimuna, “ki mu kayele.” Ki mu kayele ihi? ‘Ki mu kayele o funza ya ngongo.’ (Loma 12:2) Izwelu yiyi, Phawulu wa isonekena o Jikidistá mu hama ya dyanga. Mukonda dyahi mwene wa bhana o kidimwinu kya dikota kiki, ku mayala ni ahatu a di bhakwile kwa Nzambi a a undile ni nzumbi ikôla?—Loma 1:7.

2-3. Kyebhi Satanaji kya sota ku tu sandula kwa Jihova ni kyebhi ki tu tena kukatula o ixinganeku yayibha?

2 Phawulu wa thandanganyele mukonda sayi Jikidistá o ibanzelu yâ a i funyisile ku ixinganeku ni wanji mba unjimu wa mundu wa Satanaji. (Efe. 4:17-19) Kiki ki tena kubhita we n’etu. Satanaji mwéne wa mu tumina o mundu yú, mwene wala ni jindunge javulu o matelu phala ku tu funyisa. Mu kifika, se tu mesena kukala ni fuma, mwene wa-nda sota ku tu sandula kwa Jihova bhu kaxi ka vondadi yiyi. Mwene utena ku tu bhangesa kuxinganeka kala kya mesena bhu kaxi ka ima i twa dilongo kubhata, mu xikola ni bhu kaxi ka athu a tu kondoloka.

3 O kwila tu tena “kubula o imbaka” mba kutolola ixinganeku yene kyá mu ilunji yetu tundé ukulu? (2 Kol. 10:4) Tala kyebhi kya tambwijila Phawulu: “Tu lundumuna ikutu ya makutu, ni ima yoso ya ukumbu wa xitu ki i ehela athu ku’ijiya Nzambi. Tu tolola ixinganeku yoso ya athu phala n’a tumaka Kidistu.” (2 Kol. 10:4, 5) Kyene mwene! Ni kikwatekesu kya Jihova, tu tena kutolola o ixinganeku yayibha. O milongo i tena kusaka mawuhaxi. Kyene we kimoxi ni Mak’â Nzambi, a tena ku tu kwatekesa kutolola o ifunyisu ya mundu wa Satanaji.

“KATÉ KILUNJI KYENU KYEZA KU UBHE”

4. Ihi i twa bhingile kweha amoxi mu dyetu, kyoso ki twa xikina o kidi?

4 Xinganeka mu ima i wa bhingile kulungulula kyoso ki wa dilongo o kidi kya Mak’â Nzambi, anga wa xikina kusidivila Jihova. Amoxi mu dyetu, twa bhingile kweha o ima yayibha i twexile mu bhanga, phala kusidivila Jihova. (1 Kol. 6:9-11) Tu sakidila kyavulu Jihova mu ku tu kwatekesa kweha o ima yayibha yiyi!

5. Ima yebhi iyadi yala mu divulu dya Loma 12:2, i twa bhingi kubhanga?

5 Maji ki tu tokala kudivwa kwila, ki tu bhingi dingi kulungulula kima. Ande dya ku tu batizala, twa xisa kyá o ituxi yoso i twexile mu ta. Né kiki, twa bhingi hanji kubhanga nguzu phala ki tu dibhale mu jitendasá ja ku ta dingi kituxi kya dikota. Kyebhi ki tu tena kubhanga kiki? Phawulu wa tambwijila: ‘Ki mu kayele o funza ya ngongo, maji ehelenu Nzambi a mi kitule kyengi, katé kilunji kyenu kyeza ku ubhe.’ (Loma 12:2) Kyenyiki-phe, twa bhingi kubhanga ima iyadi. Kya dyanga, ki twa tokala ‘kukayela o funza ya ngongo,’ mba kwehela o mundu yú ku tu funyisa. Kayadi, twa bhingi ‘kukituluka,’ mu kulungulula o ixinganeku yetu.

Twa Bhilula Kilunji ni Muxima Wetu mu Kidi Inga Twa mu Nganala Ngó Akwetu?

Munzangala wa diyala wa kambe kubhuta o mwezu, ka zwata kyambote. Maji wa kwata foto yê mwene. Mu foto yiyi, mwene wa di sokejeka kyambote wa bhutu o mwezu wa te mbinza ni ngalavata

O kizwelu kya Ngeleku kyo lungulule “kukituluka” mu divulu dya Loma 12:2, kilombolola kubhilula kima kya ubhe, kala o kibamba ki bhiluka kimbyambyala. Ku tu kitulula kulombolola kulungulula o muxima wetu ni kilunji. Maji o kizwelu kya Ngeleku kyo lungulule, “ku di bhangesa” mu divulu dya 2 Kolindu 11:13-15 kilombolola kulungulula ngó o pholo, mba o ima i tena kumona o athu.

6. Ihi i tu tena kudilonga mu izwelu ya Jezú i tu sanga mu divulu dya Matesu 12:43-45?

6 O kukituluka kwa tumbula Phawulu, k’o kulunguluka ngó kuthandu mba o pholo, kana. Maji kwa lungu ni ukexilu wetu woso. (Tala o kaxa “Twa Bhilula Kilunji ni Muxima Wetu mu Kidi Inga Twa mu Nganala Ngó Akwetu?”) Twa bhingi kulungulula o ixinganeku yetu yoso—o ukexilu wetu, kyebhi ki tu divwa ni ima i tu mesena kubhanga. Kyenyiki-phe, etwenyoso twa bhingi ku dibhwidisa: ‘Phala kukala Kidistá nga lungulula ngó o ukexilu wami wa kanga, inga nga lungulula mwene o muxima moxi? Ngi Kidistá ya kidi?’ Jezú wa londekesa i twa tokala kubhanga mu izwelu yê i tu sanga mu divulu dya Matesu 12:43-45. (Tanga.) O izwelu yiyi ilondekesa kwila, ki twa tokala ngó kukatula o ixinganeku yayibha mu kilunji, maji twa bhingi we ku ki zalesa ni ixinganeku yambote.

“MU BILUKE KYENGI MU ILUNJI YENU NI MU MIXIMA YENU MOXI”

7. Kyebhi ki tu tena kubhilula o muxima ni kilunji?

7 O kwila tu tena kubhilula o kilunji ni muxima wetu moxi? O Mak’â Nzambi a tu tangela: “Phala mu biluke kyengi mu ilunji yenu ni mu mixima yenu moxi. Mu zwata o muthu wobhe a mu bhangulula mu kidifwa kya Nzambi, ki di monekena mu kukala ni mwenyu wa kuyuka, ni mu kuzela kwa kidi.” (Efe. 4:23, 24) Mu kidi, tu tena kulungulula o ukexilu wetu moxi. Maji kubhanga kiki kubhinga nguzu. Kulenga o jihânji ni ibhangelu yayibha, ki ku soko. Twa bhingi kubhilula mwene o ‘mixima yetu moxi.’ Phala kubhanga kiki, twa tokala kulungulula o jivondadi jetu, o wendelu wetu ni ima i tu bhangesa kubhanga kiki. Phala tu tene kubhanga kiki, kwa bhingi kusuluka ni kubhanga nguzu.

8-9. Kyebhi o musoso wa phangi’etu u londekesa kwila, twa bhingi kulungulula o ukexilu wetu moxi?

8 Mu kifika, tu tale ya bhitile ni phange wexile mukwa jimvunda. Mwene wexile mu nwa kyavulu ni kubhanga jimvunda ni athu. Maji weha o ima yiyi, anga a mu batizala. Kiki kya bhana umbangi wambote ku athu a tungile mu dyembu dyê. Maji, kyoso kya mu batizala, mu kubhita tu izuwa wa dibhanene ni tendasá ya dikota. Sayi usuku, kubhata dyê kwa moneka diyala dya kodiwile, wa mesenene kubhânga-nê. Ku dimatekenu phangi’etu wa ditunu kubhânga-nê. Maji kyoso o diyala kya xingi Jihova, o phangi’yetu njinda ya mu kwata, ka tena dingi kudilanga. Mwene wa tubhuka yú wa mu beta. Mukonda dyahi mwene wa bhange kiki? Sumbala o kudilonga o Bibidya kwa mu kwatekesa kudituna o vondadi ya kubhânga, mwene ka bhilwile hanji o kilunji ni muxima wê moxi.

9 Maji o phange yú ka bhwila. (Jisa. 24:16) Mwene wa suluka ni kukula mu nzumbi ni kikwatekesu kya tufunga, katé kya kituka kafunga. Sayi kizuwa mu usuku, bhu kanga dya Kididi kya Ubhezelu, mwene wa dibhana dingi ni tendasá ya difu ni ya di dibhanene na-yu mivu kudima. Sayi diyala dya kodiwile wa mesenene kubeta kafunga ni mukwá. Ihi ya bhange phangi’etu? Ni kutululuka ni kulenduka kwoso, mwene wa zwela ni diyala dya kodiwile, wa mu tululukisa, katé mwene wa mu kwatekesa kuya ku bhata. Mukonda dyahi mu veji yiyi phangi’etu wa ditunu kubhânga? Mwene wa lungulwile kyá o kilunji ni muxima wê moxi. Mu kidi, mwene wa kitukile kyá mukwa paze, muthu wa lenduka—yoso phala kuximanesa Jihova!

10. Ihi i twa tokala kubhanga phala kulungulula o ukexilu wetu moxi?

10 O kulunguluka kuku ki kwizé ngó, ki tu tena ku kubhanga mu kithangana ni mbandu. Twa bhingi ku “ta-ku nguzu” mu mivu yavulu. (2 Phe. 1:5) “Kusidivila Jihova” mu mivu yavulu, ki kwene kubhekela o kulunguluka kuku. Twa bhingi kubhanga yoso ni yoso phala kulungulula o ukexilu wetu moxi. Tu mone ima itatu i tena kukwatekesa.

KYEBHI KI TU TENA KUBILULA O KILUNJI NI MUXIMA WETU MOXI

Phange ya muhatu wa mu bhilula o muxima wê moxi bhu kaxi ka musambu, wa mu xinganeka kala wa mu di tala mu lumwenu, ni kusola makamba ambote

11. Kyebhi o kusamba ku tu kwatekesa kubhilula o kilunji ni muxima wetu moxi?

11 O kima kya dyanga ki twa bhingi kubhanga, o kusamba. Twa bhingi kusamba kala kya bhangele mukwa jisálamu: “Nzambi yami, ngi kalakale moxi muxima wengi wazele; ngi bhangulule dingi ni nzumbi ya kuyuka moxi dyami.” (Jisá. 51:10) Twa tokala kuxikina kwila, twa bhingi kubhilula o muxima wetu moxi, twa tokala we kubhinga o kikwatekesu kya Jihova. Kyebhi ki tu tena kwijiya kwila Jihova wa-nda tu kwatekesa kubhiluka? O kikanenu kya Jihova kwa akwa Izalayele a kolele o muxima mu izuwa ya Izekiyele, ki tena ku tu swinisa: “Nga ká a bhana muxima wâ umoxi, o moxi dyâ anga ngi ta-mu nzumbi ya ubhe ‘. . . hé ngi bhinganesa-mu muxima wa jixitu,’[kifwa, muxima u belesela o jinjila ja Nzambi].” (Ize. 11:19) Jihova wa kexile polondo phala kukwatekesa akwa Izalayele kubhiluka, wala we polondo phala ku tu kwatekesa.

12-13. (a) Kala kilondekesa Jisálamu 119:59, mu ima yebhi i twa bhingi kuxinganeka? (b) Ibhwidisu yebhi i wa tokala kudibhanga?

12 O kima kya kayadi ki twa tokala o kubhanga, o kuxinganeka. Kyoso ki tu tanga o Mak’â Nzambi, twa bhingi kukatula kithangana phala kuxinganeka mu ima i twa tange ni tu mone o ixinganeku ni ukexilu wetu wa kudivwa u twa bhingi kubhilula. (Tanga Jisálamu 119:59; Jihe. 4:12; Tiya. 1:25) Twa tokala kutungununa kabasa kixinganeku ni ukexilu wa kudivwa wa lungu ni ibanzelu ya mundu. Twa bhingi kuxikina ni kidi kyoso o itondalu yetu ni kubhanga yoso ni yoso phala kukatula o ukexilu yú moxi dyetu.

13 Mu kifika, dibhwidise: ‘o kwila ngala ni lwimbi ku muxima?’ (1 Phe. 2:1) Ngi divwa kwila nga beta-kota akwetu ndenge, mukonda dya kididi kwa ngi vwalela mba mukonda ngala ni kitadi kyavulu?’ (Jisa. 16:5) ‘O kwila ngi xinganeka kwila o athu a kambe o ima i ngala na-yu mba a a vwalela mu ixi yengi kala ni valolo, ngi divwa kwila eme nga beta-kota?’ (Tiya. 2:2-4) ‘O kwila nga wabhela o ima i bhana o mundu wa Satanaji?’ (1 Nzwá 2:15-17) ‘O kwila o itonokenu ya lungu ni ufusa ni usweya i ngi sangulukisa?’ (Jisá. 97:10; 101:3; Amo. 5:15) O itambwijilu ya ibhwidisu yiyi ya-nda kukwatekesa kumona kwebhi ku wa bhingi kubhilula kima. Kyoso ki tu tena “kubula o imbaka” mba kubhilula o ixinganeku yetu ni kyebhi ki tu divwa, twa-nda sangulukisa o Tata yetu ya dyulu.—Jisá. 19:14.

14. Mukonda dyahi kusola makamba ambote kima kyambote phala etu?

14 O kima kya katatu ki twa tokala kubhanga, o kusola makamba ambote. Ki kale se tu xikina mba kana, etwenyoso a tu funyisa kwa yó u tu bhanga na-u ukamba. (Jisa. 13:20) Ku salu mba ku xikola twene mu kala bhu kaxi ka athu ka tena ku tu kwatekesa kukala ni ixinganeku ixikina Nzambi. Maji, tu tena kusanga athu ambote phala kubhanga ukamba mu yônge yetu ya Ukidistá. Kwenyóko, a tu bhana nguzu, a tu swinisa phala “ku dizola, ni kubhanga o mbote.”—Jihe. 10:24, 25.

‘KOLESENU O KIXIKANU KYENU’

15-16. Kyebhi Satanaji kya sota kulungulula o ixinganeku yetu?

15 Lembalala kwila, Satanaji wa mesena kyavulu ku lungulula o ixinganeku yetu. Mwene u bhanga yoso phala ku tu katula o ixinganeku yetu yambote i tu dilonga bhu kaxi ka Mak’â Nzambi.

16 Satanaji wa mu suluka mu kubhanga o kibhwidisu kya bhangele kwa Eva mu Jaludim ya Edene: “Kifwa Nzambi wa mi kidika . . . ?” (Dim. 3:1) Mu veji javulu twa-nda kwívwa ibhwidisu i tena ku tu bhekela phata ku mundu yú a mu u langa kwala Satanaji kala: ‘Kifwa Nzambi ka xikina ukaza wa diyala ni diyala mba muhatu ni muhatu? Kifwa Nzambi kya mesena kwila u bhanga mbandu ya jifesa ja Natale ni ja uvwalukilu? Kifwa o Nzambi yé wa mesena kwila u dituna kutambula manyinga ku mukutu? Kifwa o Nzambi ya henda u ku fidisa kudilunga ni jindandu jê ja kazola mukonda a a te kamukonde mu kilunga?’

17. Ihi i twa tokala kubhanga se muthu u tu bhanga ibhwidisu phala ku tu kwatesa phata? Ihi i tena kubhita kala kilondekesa Kolose 2:6, 7?

17 Twa bhingi kukolesa o ixikanu yetu. Se tu kamba kusota o itambwijilu ya ibhwidisu imoneka mu kilunji kyetu, twa-nda mateka kukala ni phata, se o ima i tu xikina yene mwene o kidi. O jiphata jiji kudisukilu ja-nda lungulula o ixinganeku yetu ni kubwika o kixikanu kyetu. Ihi-phe i twa bhingi kubhanga? O Mak’â Nzambi a tu tendelesa kulungulula o ixinganeku yetu, phala tu tongolole “yoso o vondadi ya Nzambi, yawabha, ya ujitu, yatenena.” (Loma 12:2) Se tu dilonga izuwa yoso, twa-nda tena kuxikina ni kidi kyoso kwila, yoso i twa dilongo mu Bibidya ya kidi mwene. Twa-nda xikina ni muxima woso kwila, o ukexilu wa Jihova wa kutala o ima, wene wa tokala. Kyenyiki, kala muxi wala ni jindanji ja kolo kyambote, twa-nda difikidila, twa-nda ‘kola mu kuxikana.’—Tanga Kolose 2:6, 7.

18. Ihi ya-nda tu kwatekesa kulenga o ifunyisu ya mundu wa Satanaji?

18 Sé-ku muthu u tena kukolesa o kixikanu bhu kididi kyé. Mu kiki, suluka ni kubhilula o kilunji ni muxima wê moxi. Samba mu ithangana yoso ni kubhinga o nzumbi ya Jihova. Xinganeka kyambote, suluka ni kutonginina o ixinganeku ni jivondadi jé. Sota makamba ambote, a-nda kukwatekesa kulungulula o ixinganeku yé. Se kyene ki u bhanga, wa-nda lenga o ifunyisu ya mundu yú wa Satanaji, wa-nda “tu lundumuna ikutu ya makutu, ni ima yoso ya ukumbu wa xitu ki i ehela athu ku’ijiya Nzambi.”—2 Kol. 10:4, 5.

KYEBHI KI WEJI TAMBWIJILA?

  • Ima yebhi iyadi yala mu divulu dya Loma 12:2?

  • Ima itatu yebhi i twa tokala kubhanga phala kubhilula o kilunji ni muxima wetu moxi?

  • Kyebhi ki tu tena kukumbidila o kitendelesu ki tu sanga mu divulu dya Kolose 2:6, 7?

MWIMBU 50 Musambu wa Kudibhakula

a O ixinganeku yetu ene mu i funyisa mu ima ya bhiti ku mwenyu wetu, ki kale mu ukexilu wambote, kikale mu ukexilu wayibha. Nange tu mona kwila, sayi ibhangelu yayibha ya kituka kyá ukexilu wa mwenyu wetu, i bhonza kyavulu ku yeha. Mu milongi yiyi, twa-nda mona kyebhi ki tu tena kutolola o ibhangelu yayibha ku ilunji ni ku mixima yetu.

    Madivulu Muoso Kimbundu (2008-2025)
    Kutunda
    Kubokona
    • Kimbundu
    • Kuwanena akwenu
    • Yakuwabhela
    • Copyright © 2025 Watch Tower Bible and Tract Society of Pennsylvania
    • Ijila
    • Kikutu Kyetu
    • Definições de privacidade
    • JW.ORG
    • Kubokona
    Kuwanena akwenu