Kyoso Nzambi kyexile mu tumina, o ibhangelu yê yoso yexile ni ixinganeku imoxi, ni kutululuka

Mukonda Dyahi Twa Bhindamena o Utuminu wa Nzambi?

Tunde ku dimatekenu, kyoso kya bhange o athu, o Mubhangi wetu, wavu o dijina dya Jihova, mwene ngó wexile mu Tumina. Mwene wexile mu tumina ni henda. Mwene wa bhange dibhata dya fwama—jaludim ya Edene—phala o athu kutunga-mu. Mwene we wa a bhana kudya kwavulu. Ki kyene ngó, mwene wa a bhana kikalakalu kyambote phala kukibhanga. (Dimatekenu 1:28, 29; 2:8, 15) O athu eji kala ni kutululuka kwa kidi, se a xikinine kusuluka ni ku a tumina kwa Nzambi.

Adá wa kwata o kibundu kya mu mu fidisile ku ki dya, kya mu bhana Eva. — Adá ni Eva a ditunu ku a Tumina kwa Nzambi

O Bibidya i zwela kwila, sayi anju ya bhukumuka, ku pholo dya kwenda a mwixana Satanaji, o Dyabhu, wambele kwila, Nzambi ka tokalele ku tumina o athu. Mwene wambele kwila, o athu eji sanguluka se a di tumina mudyâ, mu veji dya ku a tumina kwa Nzambi. O jitata jetu ja dyanga, Adá ni Eva, a xikina o makutu a Satanaji, a bhukumukina we Nzambi.—Dimatekenu 3:1-6; Dijingunwinu 12:9.

Mu kudituna ku a Tumina kwa Nzambi Adá ni Eva, a dibotesa o inzu yâ, o Palayízu, o kidyelelu kyâ kya mwenyu wa kalelaku ni kukala ni sawidi yambote. (Dimatekenu 3:17-19) O kima kya solo kubhanga, kya te o myenyu ya twana twa vwala mu kilwezu. O Bibidya yamba kwila, mukonda dya Adá kuta kituxi, “o kituxi kya bokona mu ngongo, o kituxi anga kya bheka o kufwa.” (Loma 5:12) O kituxi kya bhekela we kilwezu kyengi: “Muthu u kala mu kutumina mukwá phala ngó ku mu sengulula.” (Ndongixi 8:9) Mu izwelu yengi, kyoso athu kya di tumina mudya, o hadi i di bandekesa.

O ATHU A MATEKA O KUTUMINA

Nimilode wemana mu ukexilu wa kudizangeleka. Ku hota, athu a mu tunga sabhalalu. — Nimilode wa bhukumukina Jihova

O muthu a mu tumbula mu Bibidya wa dyanga kutumina, Nimilode. Mwene wa bhukumukine we, wa londekesa kwila, ka mesenene kwila Jihova u tumina o athu. Tunde mu izuwa ya Nimilode, o athu ala ni kutena ene mu tumina mu ukexilu u bhonzesa o myenyu ya akwa. Midi jitatu ja mivu ku dima Sobha Solomá, wa soneka: “Ngi mona o masoxi ma yó oso a a tatesa, ni masoxi ma yá oso a kambe woso u a konda malamba; o kuswína kwala ku mbandu ya atatexi maji o ene-phe a a tatesa.”—Ndongixi 4:1.

O maka ene a moxi u twala na-u lelu. Ku muvu wa 2009, sayi divulu dya Nações Unidas dyambele kwila, o kutumina kya ibha kwa mu di bandekesa. O ukexilu yu wa kutumina, a mu u mona kala “fixi i bhangesa o ima ya ibha kubhita ku mundu lelu.”

O IMA YA-NDA LUNGULUKA!

O athu a bhindamena atumini ambote ni nguvulu yambote. Kiki kyene kya tu kanena o Mubhangi wetu!

Foto: Maka ejila mu kutumina kwa athu. 1. Muhatu mukwa Asia wa xikama mu kididi kya xidi mu ikoka, wa kwata mon’ê wa mu dila. 2. Diyala wa kuka, wala mu hama, mu kididi kya kusaka. 3. Masoladi mu ita, a mu loza. 4. Athu a mu dikola mu ikoka. 5. Muhatu ni mon’ê wa muhatu emana bhu kanga, a mu tala o itetu ya dibhitu dya bulu. 6. Mbanza ya mu tunguta dixi dya vulu, mwala jipoxto jama makota ja mukengeji. — Katé mwene ni jinguvulu ja mbote kene mu tena kuzubha o kubatula o maka a athu

Nzambi wa-nda bheka o Utuminu mba unguvulu, wa-nda bhingana o mawutuminu oso a athu, “wene wa kà xalela ni kutumina mu thembu joso katé ku hádya ni hádya.” (Daniyele 2:44) Yu wene o Utuminu wene mu bhinga mazunda a athu mu musambu. (Matesu 6:9, 10) Maji Nzambi ki mwene wa-nda kala o sobha wa unguvulu yu. Mu veji dya kiki, mwene wa solo muthu wexile kya mu ixi mumu, phala kukala Sobha. Nzambi wa solo nayi?