O Utuminu wa Nzambi Wa-nda Bhanga Ihi?

IHI YENE MU BHANGA O UTUMINU WA NZAMBI

Mu milongi ya tundumu, twa mono o kijimbwete kya bhana Jezú. O kijimbwete kiki kyene mu londekesa kwila, o Utuminu wa Nzambi a u tumbika kya ku dyulu, Jezú Kidistu mwene o Sobha.

O Bibidya i jimbulula kwila, kyoso Jezú kyeji tambula o kutena, o kima kya dyanga kyeji bhanga o kukaya Satanaji ni madimonyo mê ku dyulu. Lelu, ene a tena kya ngó kubhanga kya ibha ku athu ala mu ngongo. Mukonda dya kiki o ima ya ibha yene mu di bandekesa mu ngongo, tunde ku muvu wa 1914.—Dijingunwinu 12:7, 9.

Sumbala o kuyibha mu ngongo kwa mu dibandekesa, Jezú, o Sobha ya Utuminu wa Nzambi wene mu bhanga yoso phala kukwatekesa o athu ku mundu woso. Mukonda dya kikalakalu kya kuboka, kya kanena Jezú, athu avulu a mu dilonga ni kukumbidila o milongi ya Bibidya ku mwenyu wâ. (Izaya 2:2-4) Mazunda a athu ene mu dilonga kukala ni idifwa yambote, kukwatekesa o mwiji kuzediwa, ni kukala ni ixinganeku yambote ya lungu ni jimbote. O athu yá a mu a longa kulungulula o ukexilu wa mwenyu wâ kindala, a mu dilonga we kukala ni idifwa yambote. A-nda ku a tumina ku Utuminu wa Nzambi.

IHI DINGI YA-NDA BHANGA O UTUMINU WA NZAMBI?

Sumbala Jezú wa mu tumina ku dyulu, o jinguvulu ja ngongo ene hanji a mu tumina o ixi. Maji Nzambi wa tendelesa Jezú: “Enda ni kutumina o jinguma jé.” (Jisálamu 110:2) Kwa kambe ngó, Jezú wa-nda tolola o jinguma jé, kyoso kya-nda kwiza mu fundisa o jinguma ni kubhekela kutuluka ku athu yó a mesena kubelesela Nzambi.

Mu kithangana kiki, o Utuminu wa Nzambi wa-nda:

• Bwika o jingeleja ja makutu. O jingeleja jene mu longa makutu ku athu a lungu ni Nzambi mu hama ya mivu, ki ja-nda kala-ku dingi. O Bibidya ixana o jingeleja ja makutu kala kidya-nzunga. O kibwikilu kya jingeleja jiji, kya-nda tukumukisa athu avulu.—Dijingunwinu 17:15, 16.

• Bwika o jinguvulu ja ixi. O Utuminu wa Nzambi wa-nda sasujula o mawutuminu oso a athu.—Dijingunwinu 19:15, 17, 18.

• Wa-nda bwika o athu oso a ibha. Ihi ya-nda bhita ni athu yó a solo kubhanga ima yayibha, ka xikina kubelesela Nzambi? “Akwa-phulu mu ngongo a kà a bwikisa-mu.”—Jisabhu 2:22.

• Wa-nda kuta Satanaji ni madimonyo mê. Satanaji ni madimonyo mê a-nda kwa takula mu dikungu ki di moneka hole, ka-nda tena dingi ‘kunganala akwa jixi.’—Dijingunwinu 20:3, 10.

O ima yoso yiyi i lombolola ihi phala yó a xikina o Utuminu wa Nzambi?

IHI YA-NDA BHANGA O UTUMINU WA NZAMBI PHALA O MBOTE YA ATHU

Kala Sobha ku dyulu, Jezú wa-nda bhanga ima ka tena ku i bhanga ku jinguvulu ja ngongo. Wa-nda tambula o kikwatekesu kya 144.000 a athu a mu a sola mu ngongo phala kutumina kumoxi ni mwene. (Dijingunwinu 5:9, 10; 14:1, 3) Mwene wa-nda mona o vondadi ya Nzambi ku i bhanga mu ixi. Ihi ya-nda bhanga o Utuminu wa Nzambi phala o mbote ya athu ala mu ixi?

• Wa-nda zubha o mawuhaxi ni kalunga. Ki bhwa kà kala mukwa-bhata mu Jeluzaleme wila ‘nga kata, lémbwa,’. . . . “ki ku kala dingi kùfwa.”—Izaya 33:24; Dijingunwinu 21:4.

• Wa-nda bheka kutululuka kwa kidi. “O kutululuka kwa an’é kwa kà di-xala.” “Maji a k’èla kyá, muthu uxikama bhoxi dya muvide wê, muthu uxikama bhoxi dya mufiku wê, o u a kwatesa wôma ka moneka.” —Izaya 54:13; Mikeya 4:4.

• Wa-nda bhana salu yambote ku athu. “Athu’ami òsole a kà kemba ni ikalakalu ya maku mâ katé mu ukukilu. Ene we ka kà kalakala mu kingoho.”—Izaya 65:22, 23.

• Wa-nda zelesa o ixi ni munza u tu bhwima. “Ni kikangalakata ni ididi ya kukuta ya ká sangulukila kyenyiki; dinyana dya ká tana, anga ditulula kala diloza.”—Izaya 35:1.

• Wa-nda longa o athu ihi ya tokala kubhanga phala na kale ni mwenyu wa kalelaku. “Kiki kilombolola mwenyu wa kalela-ku: Kwila athu a kwijiye eye u Nzambi ya kidi imoxi-élele, ni kwijiya we Jezú Kidistu, yó wa mu tumikisa eye.”—Nzwá 17:3.

Nzambi wa mesena kwila u tambula o mabesá enya. (Izaya 48:18) O milongi ya kayela ya-nda jimbulula ihi i u tena kubhanga kindala, phala kutambula o mabesá ku hádya.