Kikuatekesu Phala o Miji
1. Kiebhi o miji ia Izalaiele a katuile mbote mu kizuua kia Sábhalu kikôla?
1 O ku bhaka o kizuua kia Sábhalu kikôla, kiexile ujitu ua henda ia Jihova phala o muiji ku katula mbote. O akua Izalaiele a kexile mu nhoha mu ikalakalu iâ, akexile ni kithangana phala ku xinganeka mu mbote ia Jihova, ni mu ukamba uâ ni muéne. O jitata eji katula mbote mu ujitu iú, phala ku longa o ijila ia Nzambi ku tuana tuâ. (Mate. 6:6, 7) O kizuua kia Sábhalu, kia bhana kithangana ku abhezi a Jihova, ku xinganeka mu ukexilu uâ mu nzumbi.
2. Ihi i tu longa o kizuua kia Sábhalu kia lungu ni Jihova?
2 Mu kidi, Jihova ka tuma dingi o miji ku bhaka o kizuua kia Sábhalu. Maji o kijila kiki, ki tu longa kima kia lungu ni Nzambi ietu. Nzambi ua uabhela kiavulu o ukexilu ua nzumbi ua jiselevende jê. (Iza. 48:17, 18) Lelu, Jihova ulondekesa kuila u mesena o mbote ia jiselevende jê, mu kaxi ka kizuua kia ubhezelu ua muiji.
3. Mukonda diahi Jihova ua bhana o kizuua kia Ubhezelu ku Muiji?
3 Mukonda Diahi Jihova ua Bhana o Kizuua Kia Ubhezelu ku Muiji? Mu mbeji ia Katatu ia 2009, o milongi ia Bibidia mu kilunga, ia mateka mu usuku, kumoxi, ni kiônge kia xikola ia ukunji ua Nzambi, ni kiônge kia sidivisu. O kima kia bhangesa ku lungulula o milongi íii, phala ku bhana ku miji kithangana kia soko phala ku kolesa o ukexilu uâ mu nzumbi, mu ku kala ni usuku phala o ubhezelu ku muiji. Kala muiji a u suínisa ku lungulula o kizuua kia ubhezelu uâ, mu kizuua kia kexile ku bhanga o milongi ia Bibidia, ni ku bhanga o ubhezelu uâ ni ku tululuka, mu ku dikila o ibhindamu ia muiji mu nzumbi.
4. O kuila o muiji ua tokala ku bhanga o ubhezelu uâ, mu ola imoxi ngó? Jimbulula.
4 A tu tendelesele phala kuia mu kiônge kia milongi ia Bibidia, tua bhingile ku kala ni kithangana phala ku zuata, ku bhanga njila, ni ima ia mukuá dingi. Saí jiphange kia a bhonzele kuia mu kiônge kiki kia ola imoxi. Maji mu ku lungulula o ola ia kiônge kietu, lelu tuala ni kithangana phala ku bheza Jihova ni muiji uetu. Mu kiki, ki tu tokala ku bhanga ngó o ubhezelu uetu ku muiji mu ola imoxi. Tua tokala ku xinganeka o ibhindamu ia miji ietu, ni kuijiia o kithangana kia soko phala o ubhezelu ku muiji.
5. O kuila a tokala ku ngastala o kithangana kioso kia ubhezelu uâ, mu ku bhanga kifika? Jimbulula.
5 O Kuila a Tokala ku Ngastala o Kithangana Kioso Kia Ubhezelu uâ, mu ku Bhanga Kifika? Kioso o makaza ni miji ala ni an’a, a di longa kumoxi o milongi ia Bibidia, ene a di suínisa mudiâ. (Lom. 1:12) O muiji u di zukama dingi. Kienhiki, a tena ku di longa mbandu ia Bibidia mu usuku ua ubhezelu ku muiji. Mu kiki, kala muthu ku muiji u tena ku di longa ubheka uê. Mu kifika, kioso kia zubha ubhezelu ku muiji, a tena ku kala kumoxi, kioso kiaia ni ku di longa ubheka uâ, mba ku zubha ku pelepalala o iônge, mba ku tanga o mulangidi ni despertai. Saí miji, ka jikula o mutelembe ua izunzumbia mu usuku uoso ua ubhezelu.
6. Kiebhi kia tokala ku bhanga o milongi íii?
6 Kiebhi Kia Tokala ku Bhanga o Milongi Íii? Ki ku bhingi ku bhanga o milongi ioso mu ibhuidisu ni itambuijilu. Phala o ubhezelu ku muiji u kale kithangana kia ku sanguluka, miji iavulu ala ni ukexilu ua ku bhanga o ubhezelu uâ, kála o iônge ietu ia semana. Ene a uanuna o jimbandu ja-nda bhanga, ni ku ji bhanga mu maukexilu avulu. Mu kifika, ene a tena ku tanga o Bibidia kumoxi, a tena ku pelepalala mbandu ia iônge kumoxi, ni ku bhanga ifika phala o sidivisu ia kuboka. Mu mbandu 6 muala itendelesu.
7. Kiebhi o jitata kia tena ku bhangesa kuila o ubhezelu ku muiji u kale kithangana kia ku sanguluka?
7 Kiebhi o Jitata Kia Tena ku Bhangesa Kuila o Ubhezelu ku Muiji u Kale Kithangana Kia ku Sanguluka? O muiji uê, ua-nda di longa kiambote se mu bhanga o kithangana kiki, ni ku sanguluka. Nange eie ueji di longa ni muiji bhu kanga se o kithangana ki bhana. Ua tokala ku bhana kithangana phala ku nhoha bhofele. Saí miji a nua sumo mu kithangana kiki. O jitata a tokala kueha o ukexilu ua ku bazela o tuana mu kithangana kia Ubhezelu ku Muiji, maji ene a tena ku bhanga kima phala o tuana ka thathamane ni ima ia mukuá. Maji se bhu kala kima phala ku mu bazela, u bhanga kiki mu kithangana kiéngi, kana ku mu bazela ku pholo ia jiphange jê phala ka kale ni jisonhi. O kithangana kia ubhezelu ku muiji, kia tokala ku kala kithangana ki bhangesa o muiji ku sanguluka, mukonda o Nzambi i tu bheza, Nzambi ia ku sanguluka.—1 Tim. 1:11.
8, 9. Kiebhi o mutuameni ua muiji u di pelepalala?
8 Kiebhi o Mutuameni ua Muiji Kia Tena ku di Pelepalala? O muiji ua-nda katula mbote se o mutuameni u di pelepalala kiambote ande dia kithangana dia usuku kia ubhezelu ku muiji, mu kuzuela se ihi ia-nda di longa ku muiji, ni kiebhi kia-nda di longa. (Jisa. 21:5) Ande dia ku bhanga kiki, o munumi ua tokala uzuela ni dikaza diê. (Jisa. 15:22) Mukonda diahi enu atuameni a miji, ki mu ebhuidisa ué ku tuana tuenu se ihi i mua tokala ku di longa ku muiji? Se mu bhanga kiki, mua-nda kuijiia kiambote ihi ia a thandanganhesa dingi ku muenhu uâ.
9 Mu ji semana javulu, o mutuameni ua muiji kale ni kithangana kia soko phala ku di pelepalala. Nange, o muiji ua mesenene ku di longa ku semana joso, o mutuameni ua muiji ka tokala ku bhana itendelesu ia ubhe ku semana joso. Muéne u tena ku katula mbote se u di pelepalala mu ku bhanga itendelesu ia mukuá ia lungu ni ibhindamu ia muiji mu nzumbi, kioso ene a mu xinganeka hanji mu milongi ia di longo. Saí atuameni a miji, a soneka o milongi ia-nda di longa, ni ku i ta bhu kididi ki kuatekesa o miji ku i mona izuua ioso, ni ku di lembalala. Kiki ki bhangesa o miji ku mona kuila a tokala ku di pelepalala, mu kithangana kia soko.
10. Kiebhi kia bhanga o jiphange joso a bheza ubheka uâ ku muiji, mu kizuua kia Ubhezelu ku Muiji?
10 Ihi i Ngi Bhanga se Eme Ngó Ngi Mubhezi ku Muiji? Oso a bheza ubheka uâ ku muiji, a tokala ku di longa ubheka uâ mu kizuua kia Ubhezelu ku Muiji. O ku kala ni kithangana phala ku di longa kiambote ubheka uê, ku bhinga ku tanga o Bibidia, ku di pelepalala phala o iônge, ni ku tanga O Mulangidi ni Despertai! Saí aboki a bhanga kiki mu kithangana kia ku di longa ubheka uâ. Saí ithangana ene exana aboki engi, mba muiji phala na di longa kumoxi o Bibidia.
11, 12. Mbote iebhi ijila mu ku kala ni usuku ua ubhezelu ku muiji?
11 Mbote Iebhi Ijila mu ku Kala ni Usuku ua Ubhezelu ku Muiji? Oso a bhanga o ubhezelu uâ ku muiji, a zukama dingi kua Jihova. O miji a bheza kumoxi, a di zukama dingi ni ku suínisa o ukamba uâ. Saí muthu ua kazala kiá, uambe o mabesá ene mu tambula: “Kuma tu aboki a thembu ioso sé tuana, tuene mu kingila ni kisangusangu kioso o usuku ua ubhezelu uetu ku muiji. Tuene mu divua kuila tua di zukama dingi mu mudietu, ni ku zukama dingi kua Tata ietu ia diulu. Kienhiki, kioso ki tu balumuka mu kizuua kietu kia ku di longa kumoxi, tuene mu dizuela: ‘O kuila uejiia se lelu usuku uahi? Usuku ua ubhezelu ku muiji!’’’
12 O ukexilu ua ku kala ni kizuua kia ubhezelu ku muiji, ki kuatekesa o miji kene mu kala kumoxi mu ithangana ioso, mukonda dia ikalakalu. O mama u sasa o tuana tuê tuiadi ubheka uê, muboki ua thembu ioso, ua soneka: “M’ukulu, kia tu bhonzele kiavulu ku kumbidila o kizuua kietu kia ubhezelu ku muiji. Mukonda ki tu kexile ni kithangana ni kizuua kia tokala phala ku bhanga o ubhezelu uetu ku muiji. Eme ki nge ejidile se ihi i nga tokalele ku bhanga, phala ku kuatekesa o Ubhezelu uetu ku Muiji. Etu tuala kiá ni kizuua kia ubhezelu ku muiji, kia mu kuenda kiambote, ni ku tambula mabesá avulu.”
13. Ihi ia-nda londekesa kuila o muiji uê, ua mu katula mbote mu ujitu iú?
13 Kála o Sábhalu ikôla, o kizuua kia ubhezelu ku muiji ujitu ua tu bhana o Tata ietu ia diulu, phala ku kuatekesa o miji. (Tiia. 1:17) O ukexilu kála kia kexile mu bhanga o miji ia akua Izalaiele, mu kizuua kia Sábhalu kikôla, ua londekesele o mbote ia kexile mu katula mu ukexilu ua nzumbi. Kiene kimoxi, o ukexilu u tua mu bhanga mu ubhezelu uetu ku muiji, ulondekesa o mbote ia-nda katula o muiji uetu mu nzumbi. (2 Kol. 9:6; Nga. 6:7, 8; Kol. 3:23, 24) Mu ku katula mbote mu kithangana kiki, o muiji uê u tena ku divua kála kia divu o mukuá jisalamu: ‘Eme-phe kia ngi uabhela o ku zukama kua Nzambi; Nga solo ngana [Jihova], muéne o dilengelu diami.’—Jisá. 73:28.
[Kilombuelelu ku bandu 5]
O kithangana kia Ubhezelu ku Muiji, kia tokala ku kala kithangana ki bhangesa o muiji ku sanguluka, mukonda o Nzambi i tu bheza Nzambi ia ku sanguluka
[Kidikisu ku bandu 6]
BHAKA
Itendelesu Phala o Usuku ua Ubhezelu ku Muiji
Bibidia:
• Tangenu kumoxi o kitangelu kia Bibidia. Se bhu bhana, muthu umoxi u tanga mbandu ia musoso, mukuá, u tena ku tanga o mbandu ia mukua kála a mu zuela.
• Tanga ni kisangusangu kioso, o Bibidia.
• Sola kala muthu ku muiji, phala ku tanga o ibatulu ia Bibidia mu kithangana kioso, ni ku soneka o ibhuidisu, ia-nda sanga mu mbandu ia tange. Kienhiki, o muiji uoso u di longa kumoxi o ibhuidisu.
• Kala semana pelepalala kitendelesu kia Bibidia, ku xinganeka, ni ku ijimbulula. Bhaka o jimbandu joso ji ua soneka kiá, ni ku ji bhitulula phala kuijiia se milongi ikuxi i u tena o ku di lembalala.
• Ívua o kitangelu kia Bibidia mu mutelembe, ni ku ki kaiela mu Bibidia iê.
Iônge:
• Pelepalala kumoxi ni muiji mbandu ia kiônge.
• Imbilenu kumoxi o mimbu ia Utuminu ia semana ia-nda kuíza-ku.
• Se muthu uala ni mbandu mu xikola ia ukunji ua Nzambi, mba kifika mu kiônge kia sidivisu, di longenu kumoxi o milongi, mba londekese-nu na-iu ku pholo ia muiji.
Ibhindamu ia Muiji:
• Di longe milongi kála O Minzangala Ebhula, mba di longe ia lungu ni Mulongexi ua Dikota, mu phutu exi, A Prenda do Grande Instrutor.
• Bhangenu ifika ia lungu ni ima i tena ku moneka bhu xikola.
• Bhangenu ifika bhuoso o jitata, a lungulula o jimbandu. O tuana a sota o milongi ia lungu ni maka enhá, ni ku ijimbulula ku jitata.
UKUNJI:
• Bhangenu ifika phala kuijiia se kiebhi kia tena ku bhana o madivulu mu ukunji uâ, ku di sukilu dia semana.
• Di longenu kumoxi se ihi ia tokala ku bhanga phala ku kalakala dingi, mu kithangana kia lembalasa, mba mu ithangana ia ku nhoha mu xikola.
• Bhana kithangana ku athu ku muiji, phala ku sota o milongi i mu kuatekesa kuijiia se kiebhi kia tokala ku tambuijila o ibhuidisu i tena ku tu bhanga mu ukunji, ni ku bhanga ifika.
Itendelesu ia Mukuá:
• Tangenu kumoxi o mulangidi ni despertai! Dia ubhe.
• Bhana kithangana ki kuatekesa kala muthu ku muiji, ku tanga mbandu ia mulangidi phala ku i jimbulula.
• Saí ithangana, exana muboki ua mu sidivila kiá Jihova mu mivu iavulu, mba dikaza phala ku kala kumoxi ni enu mu kizuua kia Ubhezelu ku Muiji, nange ni ku mu bhanga ibhuidisu.
• Talenu kumoxi o vídeo, ni kuzuela se ihi i mua di longo.
• Di longenu kumoxi “o Minzangala Ebhula” mba “Phala ku di Longa ku Muiji” mu Despertai!
• Di longenu kumoxi “Longa o Tuana Tuê” mba “Phala o Minzangala” mu Mulangidi.
• Tangenu kumoxi mbandu ia divulu Anuário ia muvu íii, mba mbandu ia kiônge kia dikota kia bhiti.
• Kioso ki mu zubha o kiônge kia dikota, mba kiônge kionene, bhitulula i mua di longo.
• Tala o ibhangelu ia Jihova, ni ku xinganeka se ihi i tu longa ia lungu ni Jihova.
• Kalakala kumoxi mu ku bhanga kima kála kifika, mapa, mba dibaia dia ku soneka.