Ande Dia ku Boka, ua Bhingi ku Sota o Athu a Zuela o Dimi Diê
1. Mukonda diahi o ilunga ene mua bhana jimbambe muala athu a zuela o dimi diâ?
1 Mu Pendekoxi ua muvu ua 33 K.K, o maxibulu a Jezú kioso kia tambula o nzumbi ikôla ‘a mateka ku zuela mu madimi engi’ ni athu oso a tundile ku jixi ja ma kanga. (Ikalakalu 2:4) Mukonda dia kiki, a batizala-ku 3000 ja athu. Ijiia-kiu kuma, avulu a kexile mu zuela dimi dimoxi kala o Hebalaiku ni Ngeleku. Né muene kiki, Jihova ua mesenene kuila, kala muthu uivua o njimbu iambote ia utuminu mu dimi diê dia uvualukilu. Mu kidi Jihova ua bhange kiki, mukonda o athu evua dingi kiambote o njimbu ia utuminu mu dimi diâ dia uvualukilu. Lelu ué, o ilunga ene mua bhana jimbambe muala athu a zuela o dimi diâ—Tala o divulu Organizados, p. 107, p. 2-3.
2. (a) O kikalakalu kia ku sota ihi ni kuebhi ku tu ki bhanga?(b) Kiebhi o ilunga ki i tena ku di kuatekesa mudiâ mu mbambe muala madimi avulu? (c) Ihi i tua tokala ku bhanga, se tua sange muthu u zuela dimi diéngi iu ua mesena ku di longa o Bibidia?
2 Ku ua tungu, eie u tena ku boka mu jinzo joso, se o athu a zuela ngó dimi dimoxi. Maji ku tena ku bhanga kiki, se ua tungu mu diembu diavulu madimi. O ilunga i zuela dimi diéngi, nange i tena ué ku boka mu diembu dimoxi mua mu zuela o dimi didi. Sumbala o ilunga i tena ku londekesa nanhi u zuela o dimi diê, ijiia-kiu kuma o kikalakalu kia kua sota o athu enhá, kia tokala ku kilunga mba ku kibuka kiê. (Tala mu kaxa “di Kuatekese-nu Mudienu.”) Mu kienhiki, eie nange ua bhingi ku bhanga nguzu mu kikalakalu kia ku sota oso a zuela o dimi diê dia uvualukilu. Kiebhi ki tu tena ku bhanga o kikalakalu kia ku sota?
3. Kiebhi o kilunga mba o kibuka, ki tena kuijiia bhuoso bhua tokala ku sota ni ithangana ikuxi ia tokala ku bhanga-bhu?
3 Ku Sokejeka o Kikalakalu Kia ku Sota: O ukexilu ua mbambe ietu uene ua-nda londekesa o thembu i tua-nda laleka mu ku sota o athu. Mu kifika, athu akuxi mu diembu diê a zuela o dimi? Aboki akuxi ala-mu? O kilunga kiejiia kiá jinzo jikuxi muala athu a zuela o dimi? O kilunga kia tokala ku sota bhuoso bhuala dingi athu a zuela o dimi. Maji, o ku sokejeka kiambote o kikalakalu kia ku sota, kima kia beta kota phala ku kuatekesa athu avulu kuijiia o dijina dia Jihova. — Lom. 10:13, 14
4. (a) Kiebhi kia tokala ku sokejeka o kikalakalu kia ku sota? (b) Kiebhi ki u tena ku sanga o athu a zuela o dimi diê?
4 Phala ki tu zange ithangana, o kibuka kia tufunga bhenge-bhenge o kafunga ka sidivisu, ua tokala ku sokejeka ni kuendesa o kikalakalu kia ku sota. (1 Kol. 9:26) Mu ibuka ia madimi a jixi jengi, o kibuka kia tufunga ki langa o kibuka kieniókio, kia tokala ku sola phange uala ni uhete kota se kafunga mba múkuatekexi ua tufunga, phala ku kala ku pholo. Ilunga iavulu ni ibuka, i dianga ku di sokejeka ande dia ku mateka o kikalakalu kia ku sota. Nange a tena ku kuata madivulu muala majina ma athu a zuela o dimi. O kia zubha-phe ku bhanga kiki, a mateka o ku sota mu kaxi ka madivulu muala o ijimbuete ia mitelembe ia kafuetele ni mu kua a kunda ku mabhata mâ. Se o ndunge íii iambote phala o mbambe ienu, o kibuka kia tufunga kia kilunga ki langa o kibuka kieniókio, ki tena ku sokejeka o ima phala o kilunga kioso ki bhange mbandu mu kikalakalu kiki.—Tala mu kaxa “Kiebhi ki u Tena ku Sanga oso a Zuela o Dimi Diê.”
5. (a) Ndunge jebhi jo bhane ku aboki, phala n’a tene ku bhanga o kikalakalu kia ku sota? (b) Ihi i tu tena ku zuela ku athu mu kikalakalu kia ku sota?
5 Tua tokala kuijiia kiambote se mukonda diahi tua mu bhanga mbandu mu kikalakalu kia ku sota. Mukonda o kikalakalu kiki, ki bhanga mbandu ia ukunji uetu, tua tokala ku zuata kala kioso ki tuia mu boka. Aboki avulu a mona kuma, o ku di longa ioso ia-nda zuela ni ku zuela o dimi kioso kiaia ni ku sota o athu, ki a kuatekesa ku sanguluka ni ku zuela kiambote o dimi diâ. Tu tena ku kondala o ithangana i tu bhanga mu ku sota o athu. Kioso ki tu sanga muthu u zuela o dimi dietu, tua tokala ku bhanga ioso phala ku mu tudila o njimbu iambote ni ku tangela o kafunga ka sidivisu mba uoso a mu solo ku kala ku pholo, phala ku soneka o kididi. Tu bhanga kiki, né muene se o muthu ka mesenene kuívua. Sumbala o kikalakalu kia ku sota kia tokala, tu di lange phala ki tu jimbe o maukexilu engi a ku boka.—Tala mu kaxa “Ihi i tu Zuela mu Kikalakalu Kia ku Sota.”
6. Ibhidi iebhi iala-ku mu ku sota o athu afú o mátui?
6 Kiebhi ki tu Sota Oso Afú o Mátui: O ku sota oso afú o mátui, ki bhonza kiavulu ki bhinga ué nguzu ni ku kolokota. Ki tu tena ku sanga muthu uafú o mátui, bhu kaxi ka dijina, ifua mba izuatu. Ku mbandu ia mukua, o jindandu ni makamba nange a kala ni hele ia kua londekesa. O milongi ia kaiela-ku ia lungu ni kiebhi ki tu sota oso afú o mátui, i tena ué ku tu kuatekesa ku sanga oso a zuela dimi diéngi.
7. (a) Kiebhi ki tu tena ku sota oso afú o mátui mu jisanzala? (b) Kiebhi ki tu tena ku tululukisa o muxima ua mukua dibhata, phala muene ka kale ni hele?
7 O ilunga ia ijimbuete ni ibuka, ene mu di tunda kiambote mu ku sota athu mu jisanzala. Nange o mukua dibhata uala ni vizinhu, muthu u kalakala nê kumoxi mba u di longa nê bhu xikola, u zuela bhu kaxi ka ijimbuete. Nange muene uala ni ndandu uafú o mátui. Ijiia-kiu kuma, saí athu ka-nda ku ku tambulula kiambote. Maji eie u tena ku bhanga ima iavulu phala ku tululukisa o muxima ua mukua dibhata bhu kaxi ka ku sanguluka kuê, kulenduka ni kuzuela kiambote ni muene. Amoxi, a di tundu kiambote mu kulondekesa o Bibidia mba vidiu (Kiala hanji mu dimi dia ijimbuete ia Angola) mu kuibhuidisa ku mukua dibhata se uejiia muthu uafú o mátui. Ene a zuela kuila a mesena ngó ku tula o njimbu iambote ia lungu ni kidielelu kia Bibidia ku oso afú o mátui. Se o mukua dibhata u kala ni hele ia kulondekesa oso afú o mátui, muene nange u xikina ku mu xisa kamukanda ka lungu ni iônge phala ku ka bhana ku ndandu iê mba dikamba.
8. Kiebhi o ilunga ia mukua, i tena ku kuatekesa o kilunga kia ijimbuete?
8 Kizuua kimoxi mba iiadi ku muvu, o kilunga kia ijimbuete ki tena ku bhinga kikuatekesu ku kilunga kiéngi phala kua a kuatesa ku sota oso afú o mátui mu jisanzala muala o mazui avulu. O kilunga kia tokala ku bhanga kiônge ni kulondekesa kiebhi kia tena ku bhanga o kikalakalu. Kala kibuka kia tokala ku kala ni muboki umoxi ua tokala mu kilunga kia ijimbuete, phala ku a endesa bhuoso bhua tokala ku sota.
9. Kiebhi kia tena ku bhanga o kikalakalu kia ku sota oso afú o mátui bhu ididi bhuoso bhua di bhongolola?
9 O kikalakalu kia ku sota, a tena ku ki bhanga ué bhu ididi bhuoso o afú o mátui, a di bhongolola phala ku tonoka mba phala ku tambula kikuatekesu. O aboki a tokala ku zuata kiambote. Kima kiambote ku di kunda ngó ni muthu umoxi mba kiiadi, kana ni kibuka kioso. Se a tu tambulula kiambote, tu tena ku bakana-nau mu ku di sanga dingi kizuua kiéngi.
10. Kiebhi o aboki kia tena ku sota bhu ididi ia ku bhanga uenji?
10 O kima kia mukua, o ku pelepalala ji mapa ji londekesa o ididi ia ku bhanga uenji ni kua kunda mu kithangana kia tokala. O mapa i tena kulondekesa ididi ia ku sukula, ididi ia kudia mba ididi ia mukua ia uenji. Se o ji mapa joso jala ni ididi imoxi, o aboki a tena ku kuata kididi kimoxi ni ku kalakala ni uhete. Mu kifika, kuma o ji hotele jene mu zalela athu afú o mátui, tu tena ku jimbulula mu ithangana iofele ku seketa ia hotele, o kikalakalu kietu ni ku mu bhana vidiu ni kamukanda ka lungu ni iônge phala muene ku i bhana kua oso afú o mátui. Mu ididi ia mukua, tu tena kuibhuidisa se muala akalakadi mba se ene mu tambula athu a zuela bhu kaxi ka ijimbuete. Se mu diembu muala xikola phala o athu afú o mátui, tu tena ku bhana madivulu metu mu kaxi ka vidiu phala n’a i te bhu kididi kiá kia madivulu.
11. Mukonda diahi o kikalakalu kia ku sota ukexilu ua beta kota ua ukunji uetu?
11 Kikalakalu Kia Beta-Kota: Ku sanga athu a zuela o dimi diê, ki bhinga kithangana kiavulu. Ku mbandu ia mukua, saí athu a tunda a mukua a bokona mu diembu. Né kiki, saí jisanzala o kikalakalu kia ku sota, ukexilu ua beta-kota ua ukunji. O Nzambi ietu Jihova ua tu bhana o kikalakalu kia ku boka, ki mukua kathombo. (Ikalakalu 10:34) Muene ua mesena “kuila athu oso a bhuluke, eze mu kuijiia o kidi.” (1Ti 2:3, 4) Mukonda dia kiki, tuene mu kalakala ni Jihova ni phange jetu phala ku sanga oso a zuela madimi engi ala ni “muxima ua kidi, ua uabha,”—(Luka 8:15).
[Kidikisu ku mbandu 5]
Di Kuatekese-nu
O kafunga ka ilunga ua-nda tangela o kilunga kiê, o ilunga mba ibuka iala mu mbambe iê, i zuela madimi engi. Kioso ki uia ni ku boka, se u sanga muthu u mu mona kuila ua bhingi ku mu longa mu dimi diéngi, soneka mu kamukanda o kididi bhuoso bhua tungila, o dimi ni dijina diê. Mu kusuka-ku, bhana o kamukanda ku kafunga ka sidivisu ka kilunga mba uoso a mu solo kuala muene. O kafunga ka sidivisu, ua-nda bandekesa o itendelesu íii ku mukanda muala o majina a athu a zuela o dimi dienhódio. Se kilunga kia mukua mba kibuka ki bhinga, muene ua-nda u bhana. O tufunga tua sidivisu tua ilunga iala mu mbambe, a tena ku kalakala mu ukexilu ua kuila athu oso evua o njimbu iambote. Se ku moneka muthu u zuela dimi diéngi maji ua mesena ku di longa o Bibidia, a tokala ku muendesa mu kilunga mba kibuka ki zuela o dimi diê. Se u di sanga ni muthu u zuela dimi diéngi, ua mesena ku di longa o Bibidia (mba muthu uafú o mátui), eie ua tokala sé ku laleka ku soneka o kamukanda Queira visitar (S-43) ni ku ka bhana ku seketa ia kilunga kiê. Ku bhanga kiki, kia-nda bhangesa o muthu ku tambula kikuatekesu mu nzumbi ni lusolo.—Tala o km 5/11 p. 3.
[Kidikisu ku mbandu 6]
Kiebhi ki u Tena ku Sanga Oso a Zuela o Dimi Diê
• Ebhuidisa akuenu—ió ua mu di longa nê o Bibidia, jindandu, ji koleka ja sidivisu ni athu a mukua dingi.
• Kuata madivulu muala majina ma athu a zuela o dimi.
• Sota mu ididi muene mu kala athu avulu kala ididi ia madivulu, ji xikola ni ididi ia mukua.
• Sota mu jurnale se muala jingolokela ja lungu ni ikalakalu ia athu a zuela dimi dia ixi iéngi.
• Kunda ididi kuene mu moneka athu a zuela dimi dia ixi iéngi.
• Se a kuehela, sokejeka madivulu phala kua bhana bhu ididi ia ku bhanga uenji, ji xikola ja katunda ni mu ididi ia mukua muene mu moneka athu a zuela o dimi diê.
• Se a ki xikina kuala o jinguvulu, sumba madivulu mu moneka o majina ni ijimbuete ia athu mu ididi i bhanga uenji.
[Kidikisu ku mbandu 7]
Ihi i tu Zuela mu Kikalakalu Kia ku Sota
Phala ku tululukisa o muxima ua mukua dibhata tua tokala ku sanguluka, kulenduka ni kuzuela kiambote ni muene. Mu ji veji javulu, kima kiambote kulondekesa madivulu osoneke mu dimi.
O ki ua-nda menekena, zuela kiki: “Etu tua mu sota oso a zuela ․․․․․ phala kua tangela o kidielelu kia Bibidia. Uejiia muthu u zuela o dimi didi?” Mu ku sota o athu afú o mátui ni kioso o vidiu kia-nda kala polondo, zuela kiki: “Nga ku menekena. Ngala ni kima phala ku kulondekesa. [Londekesa velusu imoxi ia Tradução do Novo Mundo—Mu Dilonga.] O velusu íii a i soneka mu ijimbuete ia akua America. Katu-ko o Bibidia, tuala ué ni ji vidiu javulu ja tokala phala ku kuatekesa oso afú o mátui. Ki ku bhingi ku futa kitadi. Eie uejiia muthu uafú o mátui mba u zuela bhu kaxi ka ijimbuete?” Se o mukua dibhata kejiia muthu uafú o mátui, kima kiambote o ku u tangela o ididi bhu u tena ku mona muthu uafú o mátui kala bhu xikola, ididi ia ku kalakala mba mu sanzala.