Kana ku Banza—Kuila Kuala ni Kithangana kia ku Longa Dixibulu
1. Mukonda diahi saí jiphange ka uabhela ku longa o Bibidia ku dixibulu?
1 Saí jiphange ka uabhela ku longa o Bibidia ku dixibulu, mukonda a banza kuila kala ni kithangana kia ku longa o dixibulu. Mu kidi, ku bhinga ku kala ni kithangana phala ku longa o dixibulu. Ku bhinga ué kithangana phala ku di pelepalala phala ku longa o dixibulu, ni ku kuatekesa o dixibulu ku dibhana ni ibhidi. O poxolo Phaulu uambe kuila ua bhange ioso ku muenhu uê, phala ku longa o akua Tesalonika kuijiia Jihova. (1 Tes. 2:7, 8) Kiebhi ki tu tena ku longa dixibulu, né muene ki tuala ni kithangana kia soko?
2. O henda ietu kua Jihova, i tu bhangesa ku bhanga ihi?
2 Phala ku Sidivila Jihova ku Bhinga ku Sota Kithangana: Kua bhingi ku xa kithangana phala ku bheza Jihova. Mu kifika, tuene mu katula kithangana kia kuia mu iônge ni muanhu, kuia mu boka, ku tanga o Bibidia ni ku samba. O dikaza né muene uala ni ikalakalu iavulu, ua tokala ku katula kithangana kia ku kala kumoxi ni kaza diê. Tua tokala ‘ku xisa’ kithangana kia ku bheza Jihova, mukonda tua mu zolo. (Efe. 5:15-17; 1 Nzu. 5:3) Kala kiambe Jezú, o kima kia tokala mu ukunji uetu o ku bhanga maxibulu. (Mat. 28:19, 20) O ku xinganeka mu maka enhá ki kia-nda tu fidisa ku kuatekesa o dixibulu mu ku mu longa o Bibidia.
3. Kiebhi ki tu bhanga se ki tuala ni kithangana kia ku longa o Bibidia ku dixibulu?
3 Ihi i tu zuela se ki tuala ni kithangana mukonda dia salu, uhaxi ki u bhu, mba ikalakalu mu kilunga? O aboki a mukuá a sota kithangana kia ku longa dixibulu bhu kaxi ka mutelembe ua kafuetele, mba komputadolo. Saí aboki mukonda dia uhaxi ki u bhu, a longa dixibulu mu inzo iâ. A mukuá a bhinga ku muboki ni mukuá phala ku longa o dixibulu diê sé ene kala ni kithangana.
4. Mabesá ahi u tu tambula mu ku longa o Bibidia ku dixibulu?
4 Phaulu ua sangulukile kiavulu mu ku bhana o kithangana kiê, ni nguzu iê phala ku kuatekesa akua kuijiia o kidi. (Ika. 20:35) Kioso kia xinganeka ku athu oso a kuatekesa mu Tesalonika, kia mu bhangesa ku ximana Jihova. (1 Tes. 1:2) O kisangusangu kietu mu ukunji, ki tena ku dimendala dingi se tu kala ni kithangana kia ku longa o Bibidia ku dixibulu.