Kaiela o Phangu ia Jipolofeta—Jouele
1. Kiebhi ki tu tena ku kaiela o ku lenduka kua Jouele mu ukunji uetu?
1 Nanhi uexile polofeta Jouele? Muéne uexile “mon’a Petuuele.” (Jou 1:1) O polofeta Jouuele ua boko o njimbu ia Jihova, mu veji dia ku di zangeleka kála mukunji. Mu ukunji uetu, mu veji dia ku sota ku kala ni fuma mba ku di zangeleka, tua tokala ku bhana kijingu kua Jihova ni mu milongi ia Bibidia. (1 Kol. 9:16; 2 Kol. 3:5) O njimbu i tu boka i tu suínisa kiavulu. Kikanenu kiahi kia Jouele ki tu suínisa o ku boka ni ku tu bhana kidielelu lelu?
2. Mu kuijiia kuila, o kizuua kia Jihova kia zukama, ki tu suínisa ku bhanga ihi?
2 ‘O Kizuua Kia Jihova Kia Zukama.’ (Jou 1: 15): Sumbala tundé kia soneka o izuelu íii kua bhiti kia midi ia mivu, maji etu tua mu mona hanji o ki kumbidilu kia izuelu íii. O ima ia iibha i bhita ku mundu, ni ukumbu u tu sanga mu mbambe ietu, ilondekesa kuila tuala mu izuua i sukidila-ku. (2 Tim. 3:1-5; 2 Phe. 3:3, 4) Mu kuijiia kuila tuala mu izuua i sukidila-ku, ki tu suínisa ku boka o njimbu iambote ni nguzu ioso.—2 Phe. 3:11, 12.
3. Mukonda diahi o ukunji uetu uala ni valolo, mu ku zukama o hadi ia dikota?
3 ‘Jihova ua ka Kala Dilengelu Dia Mundu Uê.’ (Jou 3: 16): O kizuelu ku teketa mu velusu íii, kilombolola o kithangana kia ku fundisa kua Jihova, mu hadi ia dikota. Tu sanguluka kiavulu, mu kuijiia kuila Jihova ua-nda bhulula o jiselevende jê, mu kithangana kiki. (Dij. 7:9, 14) O ku boka o njimbu iambote, ni ku mona kiebhi Jihova kia tu kuatekesa ni ku kolesa o kixikanu kietu, kia-nda tu kuatekesa mu kithangana kia hadi ia dikota.
4. Mukonda diahi tu tena ku sanguluka ni ku kala ni kidielelu ku hádia?
4 Sumbala o athu a zuela kuila o njimbu ia Jouele ia lungu ngó ni ku fundisa, maji , o njimbu íii i bhana ué ku mundu ua Nzambi o kidielelu kia ku bhuluka. (Jou 2:32) Tua tokala ku kala ni kidielelu kia lungu ni hádia ni ku suína mu ku boka o njimbu iambote ia utuminu ua Nzambi, mu ku belesela o izuelu ia Jouele 2:23 iambe: ‘Sanguluke-nu mua Jihova Nzambi ienu.’