Milongi i tu Kuatekesa mu Ukunji Uetu
1. O milongi iambe “Kuzuela ia Lungu ni Bibidia” i tu longa ji ndunge jebhi?
1 Mu ithangana ni ithangana, mu Mulangidi, muene mu kuíza milongi iamba: “Kuzuela ia Lungu ni Bibidia.” O milongi íii, a i bhange phala ku tu longa ndunge jiiadi: Ku longa o milongi ia Bibidia mu ukexilu uambote, ni ku tu londekesa kiebhi ki tu tena ku longa ni masunga. (1 Phe. 3:15) Kiebhi ki tu tena ku longa kiambote ni milongi íii?
2. Kiebhi ki tu tena ku longa o milongi íii mu ukunji uetu?
2 Mu Ukunji: Kima kiambote ku bhaka O Mulangidi mu tu sanga o milongi íii. Se o mukuá dibhata u bhanga kibhuidisu mba dixibulu u mesena kuijiia maka a a tange kiá mu milongi íii ia mulangidi, mu bhane o mulangidi, kala polondo phala ku mu kuatekesa. Se kuala ni Mulangidi ua milongi íii, u tena ku u katula mu kijimbuete jw.org.
3. Kiebhi ki tua tokala ku zuela ni mukua dibhata?
3 Kiebhi ki tua tokala kuzuela ni mukua dibhata? Saí aboki a bhinga o muthu ku tanga o izuelu ia mukuá dibhata ni dizui dia suína, o muboki u tanga o izuelu ia mbangi ia Jihova. O ibhuidisu ni itambuijilu i kuatekesa kiavulu, mukonda o athu a tena ku tonginina kiambote o milongi iâ sé kua thandanganhesa.—Mate. 32:2.
4. Kiebhi ki tu tena ku longa kiambote o milongi íii, mu ukunji?
4 Mu ku di Sokejeka ni ku Longa ué Akuenu: Tu tena ku di longa kiambote o milongi íii, mu ku tonginina o madivulu a Bibidia, o ifika, ni milongi ioso. Xinganeka o ukexilu ua muboki ua ku zuela. Fikisa ué o ukexilu iú mu ukunji ué. (Jisa. 1:5; 9:9) Saí phange ia muhatu uambe: “O ku tanga o milongi íii, ia sokela ni ku boka ni muboki ua thembu ioso uala ni ‘uhete’ ua ku longa—uejiia kiambote o ku tambuijila mu ithangana ioso!”
5. Kiebhi ki tu tena ku kuatekesa o maxibulu metu ku di pelepalala mu ukunji?
5 Kima kiambote ku longa o milongi íii, phala ku kuatekesa dixibulu diê ku di pelepalala mu ukunji. Tanga kumoxi ni muéne o milongi, muehele ku kala o muboki. Se tu bhanga kiki, o maxibulu a-nda tena ku jimbulula kiambote o milongi iene mu di longa ni masunga. (Kol. 4:6) Bhu kaxi ka milongi íii, Jihova u tu kuatekesa ku “kumbidila kiambote” o ukunji uetu.—2 Tim. 4:5.