Ibhuidisu Ió Tambuijile

◼ Ihi ia tokala ku di longa o tuana phala ku kula mu nzumbi?

Saí jitata ji kidistá a bhanga ioso phala ku sasa o tuana tuâ ‘mu kua longa kioso kia tumu Jihova.’ (Efe. 6:4) Mu kifika, o jitata ene mu katula mbote mu ku tanga o kadivulu Tanga o Mikanda Ikola Izuua Ioso ni an’ê, kala kamene. Mu kithangana kia ubhezelu ku muiji ni mu ithangana iéngi, o muiji u tena ku mona kumoxi o ji vidiu, ku di longa kima mu divulu Jovens Perguntam, ku di longa musoso umoxi ua Bibidia mba ku bhanga kifika kia milongi. Maji, phala o ana ‘ku kula mu nzumbi,’ o jitata a tokala ku a longa ué o kidi kia zongo kia Bibidia.​—Jihe. 6:1.

Tua-nda zuela ia lungu ni milongi i tuene mu longa mu mbambe ietu. Mu veji ia dianga mba kioso ki tu kunda dingi o muthu, tuene mu zuela ia lungu ni ku mateka o ku di longa o Bibidia mu divulu, Mu Kidi Ihi i Longa o Bibidia? Kioso ki tu zubha, tu di longa o divulu, “Kala mu Henda ia Nzambi.” Mukonda diahi? O divulu Bibidia i Longa, i kuatekesa o maxibulu kuijiia o milongi ia dianga ia Bibidia. O divulu “Henda ia Nzambi,” i longa o maxibulu ku kumbidila o milongi ia Bibidia ku mienhu iâ. Mu ku di longa o madivulu ia, a kuatekesa o maxibulu ‘ku kula mu nzumbi’ ni ku ‘kolesa o kixikanu kiâ.’ (Kol. 2:6, 7) O kuila o madivulu a tena uê ku kuatekesa o tuana tuetu? Ene a tokala uê ku di longa ia lungu ni kukula, Utuminu ni athu afu kia. O ana a tokala ué ku di longa se mukonda diahi, Nzambi uehela o hadi ni kiebhi kia tena kuijiia kuila tuala mu izuua ia sukidila-ku. Ene a tokala ku xikina kuila, o Jimbangi ja Jihova a longa o kidi. O ana ndenge a tokala ku tendela o milongi ia Bibidia n’a ‘sungu o kilunji.’ (Jihe. 5:14) O jitata a tokala kuijiia o kitala kia tuana tuâ ni unjimu uâ. Saí tuana a tena ku di longa o kidi kia zongo, kia Bibidia mu undenge uâ.​—Luk. 2:42, 46, 47.