Mimbu ia Ubhe Phala o Ubhezelu!
1 O kiônge kia bhiti ku muvu ua 2014, mu kizuua kia 4 mu mbeji ia Kamusasadi, ku Associação Torre de Vigia de Bíblias e Tratados, ku mbanza ia Pennsylvania, a bhana ngolokela ia kadivulu ka ubhe ka kuimba. O jiphange a uabhela kiavulu o ngolokela íii! O jingivuidi joso, a a lembalesa o valolo ia mimbu ietu ia Utuminu, mu ubhezelu uetu.—Jisá. 96:2.
2 Nange u dibhuidisa: ‘Mukonda diahi a lungulula dingi o mimbu?’ Saí ima iavulu ia bhangesa ku lungulula. Kia dianga o kuijiia kuetu kua Bibidia kua dibandekesa, kiki ki bhangesa ué ku lungulula o izuelu ia mimbu ietu. (Jisa. 4:18) Kaiiadi, saí izuelu ia kadivulu k’etu ka kuimba lelu, ia tundu mu Tradução do Novo Mundo, iokulu. O izuelu íii, ia bhingi ku i lungulula, phala ku fuama ni Bibidia ia ubhe. Mukonda dia salu iavulu, phala ku lungulula o izuelu ioso, a solo ku bandekesa mimbu mu kadivulu ka kuimba.
3 O kuila tua-nda kingila katé kia zubha ku soneka o kadivulu ka kuimba, phala kuimba o mimbu ia ubhe? Kana. Tua sanguluka mu ku mi tangela kuila, mu jimbeji jiza-ku, o mimbu ia ubhe a-nda i ta mu Kijimbuete kietu kia jw.org. Kioso kia-nda ta o mimbu ia ubhe mu kijimbuete kietu, a-nda lungulula o muimbu ua sukina ua Kiônge kia Sidivisu ni kijimbuete “muimbu ua ubhe.”
4 Kiebhi ki tu Tena ku di Longa o Mimbu ia Ubhe: Nange ki bhonza ku di longa o mimbu ia ubhe. Kála mukua jisalamu, tua mesena kuimba mu iônge, ‘ki tu mesena ku di xibha.’ (Jisá. 30:12) Phala kuijiia kuimba o mimbu ia ubhe, kaiela o jindunge jiji.
Ìvua mu ithangana ioso o mukumbi ua muimbu uetu, a-nda u ta mu Kijimbuete kietu. Se uivua kiavulu o mukumbi, kua-nda ku kuatekesa ku di lembalala.
Ijiia o izuelu ia muimbu ni ku i xinganeka.
Kaiela o mukumbi ni izuelu ia muimbu. Kaiela o ndunge íii, katé ki uijiia kiambote o mimbu.
Imba o mimbu ia ubhe, ku Ubhezelu ku Muiji, katé o muiji uê ki uijiia o mimbu.
5 Mu jimbeji jiza-ku, kioso kia-nda sola o muimbu ua ubhe, phala kuimba mu disukilu dia Kiônge kia Sidivisu, o jiphange a-nda kuívua hanji o mukumbi. Mu suka-ku, o jingivuidi a-nda kuimba mu ku kaiela o mukumbi, kala ki tuene mu bhanga.
6 Ijiia kuila, o kuimba kumoxi mu iônge ietu, phala ku ximana Jihova, ku tu bhekela kisangusangu. Mu kiki-phe, ki tu tokala ku kala ni kifua kia ku tunda, mu kithangana kia kuimba mu iônge ietu.
7 Saí dingi ukexilu ua mukuá ua kulondekesa kuila, tu bhana valolo ku mimbu ietu. Mu kiônge kia dikota ni kiônge kia ilunga, ku xika mukumbi ande dia ku mateka o milongi. Mu veji jiiadi ku muvu, jiphange ja mala ni ja ahatu enda njila ni kitadi kiâ, katé ku ixi ia Nova York, ku mbanza ia Patterson, phala ku bhanga o mimbu ietu ia ubhezelu. Kioso o muendexi ua milongi, kia tu bhinga phala ku xikama ni kuívua o mukumbi, tua tokala ku belesela. O ku bhanga kiki, kua-nda tu kuatekesa ku kala polondo, phala kuívua o milongi.—Eji. 7:10.
8 Lelu tua-nda kuimba o muimbu ua ubhe ni diambu “O Utuminu a u Tumbika—Uíze!” O muimbu iú ua ubhe, a u zangeleka mu kiônge kia muvu, a u bhange phala ku ximana o 100 ia mivu ia Utuminu.
9 O mimbu ia ubhe ia lungu ni “ima iambote,” ia tu bhana Jihova. (Mat. 12:35a) Tu bhange ioso, phala kuijiia ni kuimba o mimbu ia ubhe ni muxima uoso, phala ku ximana ni ku bhana kijingu kua Nzambi ietu!—Jisá. 147:1.