Eie a Kuixana

1. Kithangana kiebhi, ki tua-nda mateka kuixana o athu, phala kuia mu kiônge kia dikota?

¹ Se ua mesenene ku lambela jindandu mba makamba, kueji bhinga nguzu ni kithangana phala ku lamba, ueji kuixana o athu ni kisangusangu. Kiene kimoxi ué ni kiônge kia dikota, ku bhinga kithangana ni nguzu phala ku pelepalala o milongi. Mu semana jitatu, ande dia ku mateka o kiônge, Jihova u tu bhana o ujitu ua kuixana o athu, phala kuia mu kiônge kia dikota. Ihi-phe ia-nda tu kuatekesa kuixana o athu ni kisangusangu kioso?

2. Ihi ia-nda tu kuatekesa ku bhana o tumikanda ni kisangusangu kioso?

² Tua-nda bhana o tumikanda ni kisangusangu kioso, se tu xinganeka o mbote, i tu katula mu milongi iene mu tu bhana Jihova, mu iônge ia makota. (Iza. 65:13, 14) Tua tokala ku lembalala ué kuila, o tumikanda tu tuene mu bhana mivu ni mivu, tu kuatekesa kiavulu o athu. (Tanga o kaxa “Ku Bhekela Mabesá.”) Saí athu u tua-nda kuixana mu kiônge kia dikota a-nda ia maji a mukuá kana. Ki kale se athu a xikina mba kana, o nguzu i tu bhanga phala ku bhana o tumikanda, ia-nda ximanesa Jihova ni kulondekesa o kifua kiê, kia ku uabhela o ku bhana.—Jisá. 145:3, 7; Dij. 22:17.

3. Kiebhi ki tua-nda bhana o tumikanda?

³ Kala kibuka kia tufunga kia tokala ku di sokejeka, phala ku sola kiebhi kia-nda bhana o tumikanda mu mbambe iâ, ku xisa tumikanda ku athu kala ku mabhata ni ku bhana umbangi mu ididi mu bhita athu avulu. Mu masukilu a semana, a tokala ué ku bhana o Mulangidi ni Despertai! kumoxi ni tumikanda, se kithangana ki bhana. Kioso ki tua-nda zubha ku bhana o tumikanda, tua-nda sanguluka kiavulu, mu kuijiia kuila, tua bhana o tumikanda ni nguzu ioso ni kuila, athu avulu a-nda ia n’etu mu kiônge kia dikota kia bhange Jihova!

Ku Bhekela Mabesá

Mu bhita mivu iavulu, saí phange ia muhatu ua bhanene tumikanda, ua dibhudisa se o nguzu ioso ia bhangele iexile ni valolo. Muéne ua dibhuidisa ‘O kuila o athu, a-nda ia muene mu kiônge kia dikota?’ Kia Sábhalu mu milongi ia kamene, muéne ua mono diiala dia xikamene bhu mbandu iê, ua mu menekena ni henda. O diiala a mu bhanene kamukanda phala ku ia mu kiônge. Ua kexile ni ibhuidisu iavulu, o phange ua mu tambuijila o ibhuidisu ioso. O diiala dia sangulukile kiavulu, mukonda dia kiônge, ua ximana o ku zuata kua athu ni ukexilu uambote ua jiphange a tundile mu jixi jengi. Ku mediia, o phange ia muhatu ua zuela dingi ni dikaza dia xikamene ué bhu mbandu iê. Ene a tambuile ué kamukanda, ai mu kiônge kia dikota ni maximbombo. A uabhela o kiônge, a banze ku ia dingi kia Lumingu. Mu ku mona o athu enhá, o phange ua mono o valolo ia ku bhana o tumikanda mivu ioso.
Mu kiônge kia dikota kia muvu ua tundu-mu, saí dikaza aboki a thembu ioso a menekena dikaza exile kiá adiakimi. Ene a zuela kuila, nuka endele mu kiônge. O aboki a thembu ioso, ebhula se nanhi ua a bhanene o kamukanda?” Ene ambe: “Tua sange kamukanda bhu dibhitu.” A ka tange, ia a soneka phala ku bhinga kikuatekesu. O jiphange ja mukuá a tundu mu ixi iéngi, a bhana o kudia ku dikaza. A uabhela kiavulu o milongi, a di sokejeka phala ku ia dingi mu kizuua kiéngi. O jiphange a bhange ioso, phala ku a sota ku dibhata diâ, phala ku a longa o Bibidia.