1 | O Musambu—“Hele Yenu Yoso Xilenu-yu Nzambi”

O BIBIDYA YAMBA KIKI: “Hele yenu yoso xilenu-yu Nzambi, mukonda mwene wene mu milanga.”—1 PHETELE 5:7.

Ihi Ilombolola o Izwelu Yiyi?

Jihova Nzambi utwambela phala kumutangela kima kyosokyoso kitukatesa o muxima. (Jisálamu 55:22) Kikwala maka ofele mba a dikota, kitutena kutumbula mu misambu yetu. Kuma Jihova watuzolo kyavulu, utusuwa kyoso kitubhita ni maka. Kuzwela ni mwene bhukaxi ka misambu kutukwatekesa kukala ni kutululuka ku muxima ni mu kilunji.—Filipe 4:6, 7.

Kiki Kitena Kutukwatekesa Kyebhi?

Kyoso kitudibhana ni uhaxi wa kikote ku muxima, tudivwa ubheka. Sayi bhabha o athu katendela kyambote o maka utwamubhita nawu. (Jisabhu 14:10) Maji kyoso kitutangela kwa Nzambi bhukaxi ka misambu kyebhi kitwamudivwa, mu ithangana yoso mwene wandatwivwa ni kutendela kyambote o maka metu. Jihova utumona, wejiya o ibhidi ni ndolo yetu, wamesena we kwila tumutangela kima kyosokyoso kitutandanganyesa.—2 Malunda 6:29, 30.

Kyoso kitusamba kwa Jihova, tudyelela dingi kwila mwene watuzolo. Tudivwa kala o mukwa jisálamu, wasambe kiki kwa Nzambi: “Eye wa ngi xinganeka mu kubhindama kwami; eye wa ng’ijidila mu jiphaxi mu nga bhiti.” (Jisálamu 31:7) Mu kwijiya kwila Jihova utala o maka metu, kutukwatekesa kudibhana nawu. Mwene katale ngó o maka metu, maji ututendela kyambote muthu wosowoso ndenge. Utukonda o malamba metu, utuswinisa bhukaxi ka Bibidya.

Kyebhi o Bibidya Yamukwatekesa Julian

O Hele Ingibhangesa Kudivwa Kyebhi?

“Eme ngavulu o hele, ngala we ni uhaxi ungibhangesa kukala ni wôma wavulu ni kutandanganya mu ithangana yoso. Sayi bhabha ngamudivwa mwene kyambote, maji mu kithangana ni mbandu ngikala ni hele mu kingoho. Ngikala dingi ni hele kyoso kingikala ni athu engi. Ngitandanganya kyavulu se ihi yamubanza ene yalungu neme.

“O athu ejiya o uhaxi wami abhanga yoso ni yoso phala kungikwatekesa. Sayi ithangana o ima yazwela, ki yene o ima ingamesena kwivwa. Maji ngejiya kwila, amesena kungikwatekesa, mukonda dya kiki ng’asakidila kyavulu.

“Sayi bhabha mukonda dya kuvula o hele ni wôma, kingibhonza o kusamba. Ngatokala kubhanga nguzu yavulu phala kuzwela ni Jihova bhukaxi ka musambu. Kingibhonza we kyavulu phala kudikwatenena mu kibanzelu kimoxi. Mu ithangana yiyi, kungibhonza kyavulu kujimbulula kwa Jihova kyebhi kingamudivwa.”

Kyebhi o Bibidya Yene mu Ngikwatekesa?

“Mu kitangelu kyami kya Bibidya ngadilongo kwila, phala Nzambi kwivwa o misambu yetu, kitubhingi kuzwela kyavulu mba kutumbula izwelu yafwama. Se kingamutena kuzwela kwa Jihova kyebhi kingamudivwa, ngisamba ngó kiki: ‘Jihova, ngakudyondo ngikwatekese!’ Né mwene mu ithangana yiyi, ngimona kwila Jihova ungitambwijila, anga ungibhana ingabhindamena. Mu veji dya kusamba ngó, ngasoto we o kikwatekesu kya asaki. Mukonda dya kusamba kwa Jihova ni kikwatekesu kya asaki, ngene mudivwa kyá kasembele. Sumbala ngibhanga nguzu yavulu phala kubhinga o kikwatekesu kya Tat’etu ya dyulu, ngene mubhanga kiki mukonda ngejiya kwila mwene wangizolo kyavulu, yu wamesena kungikwatekesa.”