Etu Enyoso Twatokala Kutungula O Kima Kyawabha mu Kiki Kyayibha
O wendelu utusola kukala nau, utena kulondekesa se twanda sanguluka ku mwenyu mba kana. Jihova Nzambi wejiya o kidi kiki. Mukonda dya kiki mwene wa mesena kwila tukayela o itumu yê.
Jihova wamesena kwila tukala ni kutululuka ku mwenyu ni kusanguluka kwoso.
“Eme Jihova Nzambi yé, u ku longa kyoso kya wabha, hé u ku endesa mu njila i wa fwama kwenda mu ku di-tela. Wawé! Tamanu wa bhele mátwi ku ijila yami! O paze yé yeje kwila kala ngiji, o kulunga kwé kweje kwila kala mabhuku ma musanza wa Kalunga.”—Izaya 48:17, 18.
Kuma Nzambi o Mubhangi wetu, mwene wejiya kyambote se ihi itusangulukisa. Mwene wandala kwila tukayela o itumu ye mukonda phala o mbote yetu. Se tukayela o itumu ya Nzambi nuka twanda dyela, mukonda twanda ditunda kyambote mu yoso itwanda sola. Ithangana yoso twanda sola ni unjimu, kiki kyanda tubhekela o kutululuka ni kusanguluka.
Jihova katena kutubhinga kubhanga kima kya tundu o nguzu yetu.
“Mbata kitumu kiki, ki ngala ku ku tendelela lelu’iki, ki kya ku jingonena, kana, (kwila ki lémbwa ku ku tetulukila), ki kya kala we bhwalébha.”—Matendelelu 30:11.
Phala kukayela o itumu ya Nzambi twabhingi kulungulula o ibhangelu yetu ni ukexilu wetu wa kubanza. Maji, Jihova ka mutubhinga kubhanga kima mwene wejiya kwila kitwanda tena kukibhanga. Mu kidi, kuma mwene o Mubhangi wetu, mwene wejiya kyambote kwebhi kwa suku o nguzu yetu. Kyoso kituya ni kwijiya kyambote Jihova twanda mona kwila “o itumu yê-phe ki ibhonzo ku i belesela.”—1 Nzwá 5:3.
Jihova wakanena kukwatekesa yo asola kubelesela o itumu yê.
“Eme, ngi Jihova Nzambi yé, ngi ku kwata mu lukwaku lwé lwa dilu; hé ngi ku ambela, ngixi: Ku kale ni woma, eme ngi ku banda.’”—Izaya 41:13.
Etu tutena kwenda kala kyandala Nzambi, se tubhanga kiki mwene wanda tukwatekesa. Bhukaxi ka maka mê o Bibidya, mwene utubhana kiswinisu ni kidyelelu.
Mazunda a athu ku mundu woso a mono kya kwila o kubelesela o itumu ya Bibidya, kwene mu abhekela mbote yavulu. Mukonda dyahi kudilonge dingi yalungu ni itumu itusanga mu Bibidya? Eye utena kumateka kudilonga o Bibidya bhukaxi ka kadivulu ni dyambu Sanguluka Katé Kuhádya ni Hádya! Utena kukasanga mu sayite jw.org. Mu kadivulu kaka eye utena kusanga milongi kala yiyi:
Kyebhi o Bibidya ki itena kutukwatekesa?
O Bibidya itubhana kidyelelu
O kwila utena kudyelela mu Bibidya?
Kyoso ki wandaya ni kutokwesa o Mak’â Nzambi, o Bibidya, eye wanda tena kumona kwila o Bibidya ki divulu dyokulu kana; muveji dya kiki o unjimu itusangamu “ki i xikina ku i jima kate ku hadya.” (Jisálamu 111:8) O kukayela o itumu ya Bibidya wene o ukexilu wakatunda kitwala nau wakwambata o mwenyu. Maji Nzambi ka mutujijidika kubhanga kiki. (Matendelelu 30:19, 20; Josuwé 24:15) Kala muthu mudyetu mwéne watokala o kusola.