Kwatekesa o Dixibulu Dyé Dya Bibidya Kusola Kusidivila Jihova

1-2. (a) Mukonda dyahi sayi maxibulu a Bibidya akala ni hele ya kusidivila Jihova? (b) Ihi i twanda dilonga mu milongi yiyi?

O KWILA kwexile ima yexile mu kubhangesa kukala ni hele ya kusidivila Jihova? Nange wexile ni hele ya kwila o jikoleka jé ja salu, ja xikola, o makamba mé ni jindandu jé exile mu kukwatela njinda mukonda dya kukituka Mbangi ya Jihova. Nange wafikile kwila kiweji tena kubelesela o itumu ya Jihova. Se kyene kiwadivwile, nange utendela se mukonda dyahi sayi maxibulu mé akala ni hele ya kukala Jimbangi ja Jihova.

² Jezú wejidile kwila o ima yiyi itena kufidisa o muthu kukula mu nzumbi. (Mat. 13:​20-22) Maji mwene wasuluka ni kukwatekesa yó akexile ni hele ya kukala maxibulu mê. Mu kiki mwene walongo o maxibulu mê kukwatekesa o athu yá (1) kwijiya o ima yexile mwa afidisa kukula mu nzumbi, (2) kubandekesa o henda yâ kwa Jihova, (3) kuta kupholo dya myenyu yâ o kikalakalu kya Jihova ni (4) ihi yeji bhanga kyoso kyeji kwa azukutisa. Twene mulonga o Bibidya ku athu bhukaxi ka divulu Sanguluka Katé Kuhádya ni Hádya! Kyebhi kitutena kukayela o phangu ya Jezú kyoso kituya ni kwalonga? Yiyi yene o ima itwanda dilonga mu milongi yiyi.

KWATEKESA DIXIBULU DYÉ KWIJIYA O IMA YAMUMUFIDISA KUKULA MU NZUMBI

3. Nange ihi yexile mufidisa Nikodemu kukala dixibulu dya Jezú?

³ Sayi mutwameni wa Jijudé amwixana Nikodemu, wexile ni kima kyexile mu mufidisa kukala dixibulu dya Jezú. Mu kubhita ngo mbeji jisamanu tunde Jezú kyamateka o kuboka, Nikodemu waxikina kwila Jezú wexile o Mexiya amukanene. (Nzw. 3:​1, 2) Maji Nikodemu wayi mudisanga ni Jezú mu kaswekele, mukonda Nikodemu ‘wakexile ni wôma wa Jijudé.’ (Nzw. 7:13; 12:42) Kiki kyabhiti, nange, mukonda mwene wexile ni wôma wa kutexi o ungana wê ni jimbote jê, se weji kala dixibulu dya Jezú.a

4. Kyebhi Jezú kyakwatekesa Nikodemu kwijiya se ihi yamesenene Jihova kokwê?

⁴ Nikodemu wejidile o Kijila kya Mozé, maji wabhindamene kikwatekesu phala kwijiya se ihi yamesenene Jihova kokwê. Kyebhi Jezú kyamukwatekesa? Jezú wexile polondo phala kuzwela ni Nikodemu, mu kiki waxikina kuzwela-nê mu usuku. Jezú wazwela kwa Nikodemu se ihi yatokalele kubhanga phala kukituka dixibulu dyê. Nikodemu watokalele kudyela o ituxi yê, kumubatizala ni kulondekesa kixikanu kwa Mon’â Nzambi.—Nzw. 3:​5, 14-21.

5. Kyebhi ki utena kukwatekesa o dixibulu dyé kwijiya o ima yamumufidisa kukula mu nzumbi?

⁵ Né mwene se dixibulu dya Bibidya wejiya kyambote o Mikanda Ikola, mwene wabhingi hanji kikwatekesu phala kwijiya se ihi yamumufidisa kukula mu nzumbi. Nange o salu yê mba o jindandu jê amumufidisa kukula mu nzumbi. Kala kyabhange Jezú, katula kithangana phala kukwatekesa o dixibulu dyé. Mwixane ni mudye kadikoka, mba utena kuya-nê ku mabhya. Kyoso kimubhanga kumoxi o ima kala yiyi, nange mwene wanda kutangela dingi yalungu ni mwenyu wê, yalungu ni ibhidi yamudibhana nayu. Tangela o dixibulu dyé phala kulungulula o ukexilu we, ki phala kukusangulukisa eye, maji phala kusangulukisa Jihova.

6. Kyebhi ki utena kukwatekesa dixibulu dyé kudyelela kwila mwene utena kukumbidila o ima yamudilonga? (1 Kolindu 16:13)

⁶ Kyoso dixibulu dyé kyanda dyelela kwila Jihova wanda mukwatekesa kubhanga o ima yatokala, mwene wanda kala ni nguzu phala kukumbidila o ima yamudilonga. (Tanga 1 Kolindu 16:13.) O mulongexi wambote kalongo ngo o maxibulu mê, maji u akwatekesa we kudyelela kwila anda tena kubhanga o ima yamudilonga. Kyene we kimoxi, o mulongexi wambote wa Bibidya kalongo ngo o ima yamesena Nzambi kwila tu ibhanga, maji umukwatekesa we kudyelela kwila mwene utena kulungulula o ukexilu wa mwenyu we mukonda Nzambi wanda mukwatekesa. Kyebhi ki utena kubhanga kiki?

KWATEKESA DIXIBULU DYÉ KUBANDEKESA O HENDA YÊ KWA JIHOVA

7. Kyebhi Jezú kyakwatekesa o athu kubandekesa o henda yâ kwa Jihova?

⁷ Jezú wejidile kwila o henda kwa Nzambi, yeji tena kukwatekesa o maxibulu mê kukumbidila o ima yexile mudilonga. Mwene wexile mulonga o ima yexile mukwatekesa o maxibulu mê kuzola dingi Jihova, o Tata yâ ya dyulu. Mu kifika, mwene wambe kwila Jihova wadifwangana ni tata yambote ubhana ima yambote ku twana twê. (Mat. 7:​9-11) Nange sayi athu exile mukwivwa Jezú kexile ni tata mukwa henda. Xinganeka o kusanguluka kwexile naku, kyoso kyevu Jezú kuzwela yalungu ni tata mukwa henda, watambulula dingi mon’ê wabotesa o jimbote jê joso. Ene eji tena kutendela kwila Jihova wazolo kyavulu o athu ni kwila wamesena kwakwatekesa.—Luk. 15:​20-24.

8. Kyebhi ki utena kukwatekesa o dixibulu dyé kuzola dingi Jihova?

⁸ Eye we utena kukwatekesa o dixibulu dyé kuzola dingi Jihova mukumulonga o idifwa yê. Kyoso ki uya ni kumulonga, mukwatekese kutendela se kyebhi o ima yamudilonga, ilondekesa kwila Jihova wamuzolo. Kyoso kimwanda zwela yalungu ni kukula, mulondekese o valolo yala nayu o kukula phala mwene. (Lom. 5:8; 1 Nz. 4:10) Kyoso o dixibulu kyanda tendela kwila Jihova wamuzolo, kiki kyanda mubhangesa kuzola dingi Jihova.—Nga. 2:20.

9. Ihi yakwatekesa manu Mingyedi kulungulula o ukexilu wa mwenyu wê?

⁹ Tala yabhiti ni phange Mingyedi watungu mu ixi ya Indonésia. Kyoso kyamuvwala, o jitata jê exile kya jimbangi ja Jihova, maji kyoso mwene kyayi ni kukula kamubatizalele luwa. Kyoso kyatenesa 18 dya mivu, wayi mukalakala mu ixi yengi, o salu ye yexile kwendesa makalu. Ku pholo dya kwenda mwene wavutuka mu ixi ya Indonésia, wakazala, maji mu kusuluka wayi dingi mu ixi yengi phala kukalakala. Kyoso kyayi-ku, o muhatu wê ni mon’ê wa muhatu amateka kudilonga o Bibidya ni kukula mu nzumbi. Kyoso many’â kyafu, manu Mingyedi wavutuka mu ixi ya Indonésia phala kulanga o tat’ê yu wavutuka mu kudilonga o Bibidya. Kyoso kyexile mudilonga o mbandu “Dilonge Dingi” mu disá 27 dya divulu Sanguluka Katé Kuhádya ni Hádya! manu Mingyedi wayiwabhela kyavulu. Kyoso mwene kyaxinganeka mu ndolo yevu Jihova mukumona Mon’ê kufwa, manu Mingyedi wamateka kudila. Kyoso kyamono kwila Jihova ni Jezú amuzolo kyavulu, walungulula o ukexilu wa mwenyu wê, ya amubatizala.

KWATEKESA DIXIBULU DYÉ KUTA KUPHOLO O KIKALAKALU KYA JIHOVA

10. Ihi yabhange Jezú phala kukwatekesa o maxibulu mê kuta ku pholo dya myenyu yâ o kikalakalu kya Jihova? (Luka 5:​5-11) (Tala we ofoto.)

¹⁰ Athu avulu a alongo kwa Jezú axikina kwila Jezú mwene wexile o Mexiya, maji ne kiki ene abhindamene hanji kikwatekesu phala kuta ku pholo dya myenyu yâ o kikalakalu kya Jihova. Kyoso Jezú kyexana Phetele ni Mandele phala kumukayela mu thembu yoso, ene exile kyá maxibulu mê. (Mat. 4:​18, 19) Ene exile mukalakala kumoxi ni Tiyaku ni Nzwá, nange o kikalakalu kya ku tamba kyexile mwa abhana kitadi kyavulu. (Mál. 1:​16-20) Maji Phetele ni Mandele “axisa o mawanda mâ” phala kukayela Jezú muthembu yoso. Kyoso ene kyabange kiki, asoto ndunge phala kudikila o miji yâ. Mukonda dyahi ene abhange kiki? O divulu dya Luka dilondekesa kwila Jezú wabhange madiwanu a akwatekesa kudyelela kwila Jihova weji tena kwa adikila.—Tanga Luka 5:​5-11.

11. Ihi i tutena kuzwela ku dixibulu dyetu phala kubandekesa o kixikanu kyê?

¹¹ Etu kitutena kubhanga madiwanu kala kyabhangele Jezú, maji tutena kutangela ku athu misoso ilondekesa kwila Jihova ubesowala yo ata kupholo dya myenyu yâ o kikalakalu kyê. Mu kifika wamulembalala kyebhi Jihova kya kukwatekesa kyoso kiwamateka kuya mu yonge? Nange eye wabhingile kuzwela ni patalá yé kwila kiweji tena dingi kukalakala kyavulu mu izuwa ya yônge. Jimbulula ku dixibulu dyé kwila o kixikanu kyé kyadibandekesa dingi kyoso ki wamono kwila Jihova wakukwatekesa, kyoso ki wasolo kuta ku pholo o kikalakalu kya Jihova, ku mwenyu wé.

12. (a) Mukonda dyahi kima kyambote kuya mulonga dixibulu dyé ni jiphange a itala yoso? (b) Kyebhi o jividyu jitena kukwatekesa dixibulu dyé kuta ku pholo o kikalakalu kya Jihova?

¹² O dixibulu dyé wabhingi we kwivwa se ihi yabhange o jiphange ja mukwa phala kuta ku pholo o kikalakalu kya Jihova. Kyenyiki, ndé mu mulonga o Bibidya ni jiphange a itala yoso. Bhinga ku jiphange jiji phala kuzwela se ihi yabhangele ene phala kukala Jimbangi ja Jihova ni kuta ku pholo o kikalakalu kya Jihova. Tala we ni dixibulu dyé o jividyu jala mu jimbandu “Dilonge Dingi” mba “Tokwesa Dingi” ja divulu Sanguluka Katé Kuhádya ni Hádya! Mu kifika kyoso ki mwanda dilonga o disá dya 37, talenu o vidyu ni dyambu Jihova Ua-nda tu Kuatekesa mu Ibhindamu Ietu. Dizwelesyenu yalungu ni vidyu yiyi, mutangele kwila Jihova wanda mukwatekesa se mwene uta ku pholo o kikalakalu kya Jihova.

KWATEKESA DIXIBULU DYÉ KWIJIYA SE IHI YANDA BHANGA KYOSO KYANDA MUZUKUTISA

13. Kyebhi Jezú kyakwatekesa o maxibulu mê kudisokejeka mukonda dya izukutisu yeji kwiza ku pholo?

¹³ Mu ithangana yavulu Jezú wazwela ku maxibulu mê kwila eji kwa azukutisa, katé mwene ku jindandu jâ. (Mat. 5:11; 10:​22, 36) Ande dya kufwa, Jezú wambe ku maxibulu mê kwila eji kwa ajibha mukonda dya kubheza Jihova. (Mat. 24:9; Nzw. 15:20; 16:2) Mwene wambe we kwila ene atokalele kudilanga mu ukunji. Mwene wa atangela kwila katokalele kudikwata ni yó kamesenene kwa abhana matwi, ni kwila atokalele kukala jinjimu phala atene kusuluka ni kuboka.

14. Kyebhi kitutena kukwatekesa o maxibulu metu kudisokejeka phala kudibhana ni izukutisu? (2 Timote 3:12)

¹⁴ Kala kyabhangele Jezú, tutena we kuzwela ku maxibulu metu kwila amoxi ku jikoleka jâ ja salu, ja xikola, o makamba mâ mba jindandu jâ anda kwa asebhulula mukonda dya kudilonga o Bibidya. (Tanga 2 Timote 3:12.) Amoxi ku jikoleka jâ atena kwa atobhesa mukonda ene amubhanga nguzu phala kulungulula o ukexilu wa myenyu yâ. Sayi athu ku jindandu jâ atena kwa azwela kyayibha mukonda dya kubelesela o itumu ya Bibidya. Kyoso kituzwela ku maxibulu metu kwila anda kwa azukutisa, ene anda tena kukolokota mu izukutisu.

15. Ihi i tena kukwatekesa o dixibulu dyé kudibhana ni izukutisu?

¹⁵ Kwatekesa o dixibulu dyé kutendela se mukonda dyahi sayi athu ku mwiji wê amumuzukutisa. Nange o jindandu jê abanza kwila o Jimbangi ja Jihova ene mulonga makutu, mba ene athu ayibha. Katé mwene Jezú, sayi athu ku jindandu jê afikile kwila mwene kexile ni kilunji. (Mál. 3:21; Nzw. 7:5) Longa o dixibulu dyé kukala ni mwanyu ni kuzwela ni kuxila kwoso ni jindandu jê, katé mwene ni yó ki jindandu jê.

16. Kyebhi kitutena kukwatekesa o dixibulu dyetu kuzwela ni jindandu jê o ima yamudilonga mu Bibidya?

¹⁶ Kyoso o jindandu ja dixibulu dyé kyanda mesena kwijiya dingi yalungu ni Bibidya, mwene wanda londekesa kwila njimu mu kukamba kuzwela ima yavulu. Se mwene uzwela kyavulu, o jindandu jê kanda mesena dingi kuzwela-nê yalungu ni Bibidya. Tangela dixibulu dyé phala kazwele kyavulu, o kubhanga kiki kyanda bhangesa o jindandu jê kumesena kwijiya dingi. (Kol. 4:6) Mwene utena kutangela o jindandu jê phala kubokona mu sayte yetu jw.org. Kiki kyanda kwa akwatekesa kwijiya dingi yalungu ni Jimbangi ja Jihova.

17. Kyebhi ki utena kukwatekesa dixibulu dyé kuzwela yalungu ni ima yamudilonga? (Tala we ofoto.)

¹⁷ Utena kuzwela ni dixibulu dyé o mbandu yala mu sayte jw.org ni dyambu “Ibhuidisu Iene mu Bhanga Dingi o Athu ia Lungu ni Jimbangi ja Jihova”. O mbandu yiyi yanda kwatekesa dixibulu dyé kutambwijila o ibhwidisu ya jindandu jê, ya jikoleka jê ja salu mba ja xikola. (2 Ti. 2:​24, 25) Ku disukilu dya disá dimoxi, zwela ni dixibulu dyé o mbandu “Athu Avulu Amba” ya divulu Sanguluka Katé Kuhádya ni Hádya! Bhinga ku dixibulu dyé phala kuxinganeka kyebhi kyatena kujimbulula ku athu o ima yamudilonga. Se kwabhingi mukwatekese kusanga ukexilu wabhebhuluka wa kujimbulula o ima yamudilonga. Se mubhanga kiki dixibulu dyé wanda tena kuzwela kyambote o ima yejiya.

18. Kyebhi ki utena kukwatekesa dixibulu dyé dya Bibidya kukituka muboki? (Matesu 10:27)

¹⁸ Jezú watumu o maxibulu mê kuboka o njimbu yambote ku athu. (Tanga Matesu 10:27.) Kyoso dixibulu dyé kyanda kituka muboki, mwene wanda mona kwila Jihova utukwatekesa, kiki kyanda mubhangesa ku mudyelela dingi. Kyebhi ki utena kukwatekesa dixibulu dyé kukituka muboki? Se kwanda kala kambanya ka kuboka, kwatekesa dixibulu dyé kumona se ihi itena kubhanga phala kukala muboki. Mutangele kwila ki kubhonzo kuboka mu kithangana kya kambanya. O kima kya mukwá kyanda mukwatekesa kukala muboki wambote, o kubhanga jimbandu mu yonge ya kaxi ka semana. Kiki kyanda mukwatekesa we kuzwela ni kuswina kwoso o ima yamudilonga mu Bibidya.

DYELELA KWILA DIXIBULU DYÉ WANDA SIDIVILA JIHOVA

19. Kyebhi Jezú kyalondekesa kwila o maxibulu andalele kusidivila Jihova, ni kyebhi kitutena kukayela o phangu yê?

¹⁹ Ande dya kuvutuka ku dyulu, Jezú wambe ku maxibulu mê kwila sayi kizuwa eji kala dingi kumoxi. Ene katendela kwila Jezú wexile muzwela yalungu ni kuya ku dyulu. Sumbala o maxibulu a Jezú kexile mutendela o ima yoso, maji Jezú wadyelele kwila ene andalele kusidivila Jihova. (Nzw. 14:​1-5, 8) Mwene wejidile kwila, sayi ima, kala o kidyelelu kya kuya ku dyulu, o maxibulu abhindamene kithangana phala ku itendela. (Nzw. 16:12) Etu we tutena kudyelela kwila o maxibulu metu amesena kusidivila Jihova.

20. Kyebhi phange yamuhatu mu ixi ya Malawi walondekesa kwila wadyelele ku dixibulu dyê?

²⁰ Dyelela kwila o dixibulu dyé wamesena kubhanga o ima yatokala. Tala yabhiti ni phange ya muhatu, amwixana Xifundu watungu mu ixi ya Malawi. Mwene wamateka kudilonga o Bibidya ni kilumba mukwa Katólika, amwixana Alinafe. Ene akexile mudilonga mu divulu Sanguluka Katé Kuhádya ni Hádya! Kyoso kyazubha kudilonga o disá dya 14, mana Xifundu webhwidisa ku dixibulu dyê se mwene ubanza ihi yalungu ni kubheza Nzambi ni iteka. Mana Alinafe waluwalele kyavulu, yu wamwambela: “Éme ngejiya se ngibheza Nzambi ni kiteka mba kana!” Mukonda dya kitambwijilu kiki, mana Xifundu wafikile kwila, o dixibulu dyê keji suluka mu kudilonga. Maji ni mwanyu woso mwene wasuluka ni kumulonga o Bibidya, wadyelele kwila ku pholo dya kwenda dixibulu dyê weji tendela kwila o kubheza iteka, kituxi. Mu kubhita jimbeji, mana Xifundu wamubhange o kibhwidisu kiki kimoneka mu disá dya 34: “Kyebhi o ima iwadilongo mu Bibidya ya lungu ni Jihova, yene mukukwatekesa katé mu kithangana kiki?” Mana Xifundu wambe kiki: “O dixibulu dyami wazwela ima yavulu yambote. Kima kimoxi mwene wambe kwila o Jimbangi ja Jihova kene mubhanga o ima izwela o Bibidya kwila kituxi.” Ku pholo dya kwenda mana Alinafe weha kubheza o iteka, anga amubatizala.

21. Kyebhi kitutena kukwatekesa dixibulu dyetu kukula mu nzumbi?

²¹ Sumbala Jihova mwéne ‘utena kukudisa kima’, etu tutena kukwatekesa dixibulu dya Bibidya kukula mu nzumbi. (1 Ko. 3:7) Kituzwela ngo ku maxibulu metu o itendelesu ya Jihova. Maji tu akwatekesa we kuzola Jihova, kuta ku pholo o kikalakalu kya Jihova ni kumudyelela kyoso kya azukutisa. Kyoso kitutangela ku dixibulu dyetu kwila, twadyelela kuma mwene wamesena kubhanga o kima kyatokala, mwene wanda sidivila Jihova.