Sakidila o Ukexilu ua Jihova ua Kubhana

JIHOVA NZAMBI, mukua kubhana. (Tiiaku 1:17) O ima ioso ia bhange, ilondekesa kuila, muéne mukua kubhana. Muéne ua bhange jithéthembua javulu ku diulu, anga ua bhange ué ithulu iavulu mu ixi.—Jisálamu 65:12, 13; 147:7, 8; 148:3, 4.

O musoneki ua divulu dia Jisálamu 104, ua sangulukile kiavulu ni ibhangelu ia Jihova, mukonda dia kiki, muéne ua soneka muimbu phala ku mu ximana. Kioso ki u tanga o Jisálamu jiji, o kuila eie uene mu sakidila ué Jihova, kála kia bhangele o mukua jisalamu? Muéne uambe: “Kioso ki ngala kulaia, ngenda ni kuimbila Jihova; ngi ximana Nzambi iami, katé bhua kà suka muenhu uami.” (Jisálamu 104:33) O kuila eie ua mesena ué kubhanga kiki?

O PHANGU IA DIKOTA IA KUBHANA

Jihova ua mesena kuila, tu kaiela o phangu iê ia kubhana. Muéne u tu jimbuluila kiambote o ima, phala ku tu kuatekesa kulondekesa o ukexilu ua kubhana. Muéne ua bhangesa poxolo Phaulu kusoneka o izuelu íii: “Oso ala jimvuama mu ngong’umu, a tendelele, ka di kake, ka dielele o jimbongo ja makutu’iji, ki ji tena ku bhandulula kima. Maji a dielele Nzambi, Ió ua tena ku tu bhana kumona kia nzungule o ima ioso ia kuzediua phala o mbote ietu. A tume kuila a bhange jinge o mbote, mbé a kale ni umvuama ua ikalakalu iafuama, ende ni kubhana, ende ni kubindumuna akuá oso kala ni kima. Mu kubhanga kiki, a kale mu lunda dimanenu diambote katé bhu thembu ia hàdia, phala kienhokio a tene kunganhala muenhu, uene o muenhu ua kidi.”—1 Timote 6:17-19.

Mu mukanda ua kaiiadi ua sonekena akua Kolindo, Phaulu ua jimbulula o ukexilu u tua tokala kulondekesa, kioso ki tu bhana kima ku akuetu. Muéne uambe: “Kala muthu a bhane uila kia mu kala mu muxima uê, ka bhane ni kuluuala, mba mu ku mu bhinjika. Mbata Nzambi ua zola mukua kubhana ni ngalasa ioso.” (2 Kolindo 9:7) Nanhi u tu mu kuatekesa kioso ki tu londekesa o ukexilu ua kubhana? Phaulu uambe kuila, tu kuatekesa akuetu kioso ki tu a bhana kima kia bhindamena, maji etu uetu tu di kuatekesa, mukonda kioso ki tu bhanga kiki, Jihova u tu besoala.—2 Kolindo 9:11-14.

Mu kusuluka, Phaulu ua londekesa kuila, Nzambi mukua kubhana, kioso kiambe: “Tu sakidilienu Nzambi mukonda dia henda iê ku i tanga ki i [xikina.]” (2 Kolindo 9:15) Jihova ua londekesa o “henda” iê, mu ima ioso ia tu bhana bhu kaxi ka Jezú Kristu. Ki tuala ni kutena kua kujimbulula o valolo ia ujitu ua tu bhana.

Kiebhi ki tu londekesa o kisakidilu kietu kua Jihova ni Jezú, mu ima ioso iene mu bhanga, ni ima ia-nda bhanga phala o mbote ietu ku hádia? Tu bhanga kiki, mu kubhana o kithangana kietu, nguzu ni ima ietu phala kubheza Jihova, ni kukuatekesa akuetu kuijiia o kidi kia lungu ni muéne. Ki kale se tuala ni ima iavulu mba kana, etu enioso tu tena ku bhanga kiki.—1 Malunda 22:14; 29:3-5; Luka 21:1-4.

Maukexilu A Kusangela Kitadi Phala Kukuatekesa O Kikalakalu Kietu Ku Mundu Uoso

Kála o Jikidistá ku hama ia dianga, lelu athu avulu a bhaka kama mba ka kitadi, phala ku ki ta mu ji kaxa mu kilunga. (1 Kolindo 16:2) Mbeji joso, o ilunga iene mu tumikisa o kitadi kiki ku filiiale ia Jimbangi ja Jihova, mu ixi iâ. Eie u tena ué ku tumikisa kitadi ku filiiale ia Jimbangi ja Jihova, ku ixi iê. Phala kuijiia o dijina dia filiiale ia Jimbangi ja Jihova ku ixi iê, tua ku dióndo sota kuzuela ni athu ala ku pholo ku filiiale ia Jimbangi ja Jihova mu ixi iê, mu kijimbuete kietu kia www.jw.org. U tena kusangela o ima íii:

KUSANGELA NI MUXIMA UOSO

Kitadi, ulu, ni ima ia mukuá i uala na-iu ia valolo. Tá mu mukanda ulondekesa kuila, o kitadi, mba ima ia mukuá, ua i sangela ni muxima uoso.
Kitadi, ulu, ni ima ia mukuá i uala na-iu ia valolo. Tá mu mukanda ulondekesa kuila, o kitadi, mba ima ia mukuá, ua i sangela ni muxima uoso.

UKEXILU UA MUKUÁ UA KUSANGELA KITADI

Kusangela kitadi, maji a tena ku ki vutula, kioso kia ki bhindamena ku mukuá kitadi.
Tá mu mukanda ulondekesa kuila, o kitadi kiki, ua-nda ki tambula..

MAUKEXILU A MUKUÁ A KUSANGELA

Kuene maukexilu a mukuá a kusangela kima, phala ku kuatekesa o kikalakalu kietu kia Utuminu ku mundu uoso. Phala kuijiia o ukexilu u ua mesena kusangela, dianga kusota o jiphange ala ku pholo ku filiiale ku ixi iê, n’a ku tangela se eie u tena kusangela mu ukexilu uebhi. Sota ué kuijiia o itumu ia ixi iê, phala kuijiia kusola kiambote o ukexilu u ua tokala kusangela.

Kusangela ni Kikutu: O kusangela mu ukexilu iú, kulombolola kuila, o Jimbangi ja Jihova a tambula ngó o ima, kioso ki fuá o muthu ua i sangela, maji se o muthu iú uala hanji ku muenhu, o ima íii ia mu tokala hanji.

Undundu: O ukexilu iú ulombolola kuila, o ima ioso ia tena kubhana o muthu ua mesena kusangela kima ku filiiale ia Jimbangi ja Jihova, u ki bhana bhu kaxi ka mukanda ua bhanga ni kidimbu kiê.

Phala kuijiia dingi ia lungu ni maka enhá, sota o filiiale ia Jimbangi ja Jihova.