Bhana Valolo ku Athu Kala Kibhanga Jihova

1. O abhezi a Jihova a londekesa kyebhi kwila a dizolo mudyâ?

O ABHEZI oso a Jihova ku mundu, mwiji umoxi ngó. Jiphange ja mala ni ahatu, a di zolo mudyâ. (1 Nzwá 4:16, 21) Sayi ithangana ene a xixa o jivondadi jâ ni ima, phala kukwatekesa o jiphange jâ, maji mu ithangana yavulu ene a di londekesa henda mu ima yofele kala kuzwela kima ki swinisa o jiphange jâ, mba ku a talatala ni henda. Kyoso ki tu xinganeka akwetu, twa mu kayela Tata yetu ya dyulu.—Efezo 5:1.

2. Kyebhi Jezú kya kayela o henda yene mu londekesa Tat’ê?

² Jezú wa kayela kyambote o phangu ya Tat’ê. Mwene wa talatala akwa ni henda mu ithangana yoso. Mwene wambe: “Zenu kokwami enu oso mwa bhwila, enu mwa tate ni imbamba ya mi nemena, eme nda ngi mi nyohese.” (Matesu 11:28, 29) Se tu kayela o phangu ya Jezú ya ku ‘xinganeka o jingadyama,’ twa-nda sangulukisa Jihova, etu twa-nda sanguluka we. (Jisálamu 41:1) Mu milongi yiyi, twa-nda mona kyebhi ki tu tena kuxinganeka o jindandu jetu, o jiphange jetu, ni athu u tu sanga mu ukunji.

BHANA VALOLO KU MWIJI

3. Kyebhi o munumi kya londekesa kwila u bhana valolo ku muhatw’ê? (Tala o foto ya dyanga.)

³ O anumi a bhingi kubhana phangu ilondekesa kwila ene a bhanga yoso phala kulanga o miji yâ. (Efezo 5:25; 6:4) O Bibidya yamba kwila o anumi a tokala kubhana valolo ni kutendela ahat’wâ. (1 Phetele 3:7) O munumi u tendela o muhat’wê wejiya kwila, sumbala o muhat’wê ka difu-nê mu mawukexilu avulu, mwene ka beta kota, o muhatu ndenge. (Dimatekenu 2:18) Mwene u banza mu ixinganeku ya muhat’wê, u mu xila, u mu bhana kijingu. Sayi muhatu ku ixi ya Canadá, wa zwela ya lungu ni munumi’ê: “Mwene ka xongwena o ibanzelu yami mba wamba: ‘Kubhinga we kya kudivwa kiki?’ Mwene ngividi yambote. Se kubhinga ku ngi kwatekesa kulungulula o kibanzelu kyami kya lungu ni kima, mwene u ki bhanga ni kilendu.”

4. Kyebhi o munumi kya londekesa kwila u xila o muxima wa muhat’wê mu ukexilu wa ku dibhana ni ahetu engi?

⁴ O munumi u xila o muhat’wê ka tonginina mba u toka mesu ku muhatu wengi mba u londekesa ukexilu ki u tokala, ki kiale pholo ni pholo, mu rede social mba mu internete. (Jobe 31:1) Mwene ka kibhange né mwene mu iselekete ya kafwetele, ka jikula we ji site jilondekesa ima ya ufusa. Mu kidi, mwene ulondekesa ufiyele kwa muhat’wê, mukonda wa mu zolo; wa zolo Jihova, wa zembe o ima yayibha.—Tanga Jisálamu 19:14; 97:10.

5. Kyebhi o muhatu kya londekesa kwila, u bhana valolo kwa mwadiwê?

⁵ Se o munumi u kayela o phangu ya henda ya Jezú Kidistu wa mu kala kupholo, ki kwa-nda bhonza phala o muhatw’ê ku mu ‘xila ni muxima woso.’ (Efezo 5:22-25, 33) Kyoso muhatu kya mu xila, mwene wa-nda bhanga nguzu phala kutendela o ibanzelu ya munumi’ê ni ku mu talatala ni kilendu se u tandanganya ni ikalakalu ya kilunga, mba kyoso kya mu batula maka. Sayi munumi ku Gra-Bretanha wambe: “Sayi kithangana muhatw’ami wa mwene kwila, sayi kima kya kexile mu ngi tandanganyesa. Mu kiki, mwene wa kumbidila o milongi i tu sanga mu divulu dya Jisabhu 20:5, sumbala kweji lombolola kukingila o kitangana kya tokala phala kukatula o ixinganeku yami ku muxima, se maka u Ngi tena ku di kunda-nê.”

6. Kyebhi etwenyoso ki tu tena kuswinisa o tumbonga phala n’a xinganeka ni kutalatala akwâ ni henda? Mbote yahi ya katula ana ndenge mu kubhanga kiki?

⁶ Kyoso jitata kya dixila mudyâ, ene a bhana phangu yambote ku twana twâ. Ene a bhingi we kulonga o twana twâ phala nende ni kuxinganeka ni ku talatala akwa ni henda. Mu kifika, o jitata a tena ku a longa kwila, kyoso kya kala mu Kididi kya Ubhezelu, ene ka tokala kulenga-lenga. Ene a tena ku a longa kwila, a tokala kwehela o adyakimi ku dyanga ku di sidivila, se ala mu fesa mba mu itonokenu. Mu kidi, oso mu kilunga a tena kukwatekesa o jitata. Tu tena kuximana kambonga se u bhanga kima kyambote, kala o ku tu jikwila o dibhitu. Kiki kya-nda bhangesa o kambonga kudivwa kyambote, kya-nda mu longa we kwila, “o kubhana kota mu kuzediwisa, o kutambula ndenge.”—Ikalakalu 20:35.

BHANA VALOLO KU JIPHANGE MU KILUNGA

7. Kyebhi Jezú kya londekesa kwila wa xila o muxilu? Ihi i tu dilonga mu phangu yiyi ya Jezú?

⁷ Say kizuwa, Jezú wexile mu mbanza ya Dekapolo o athu a mu bhekela ‘muxilu, mukwa kukukuma mu kuzwela.’ (Marku 7:31-35) Jezú wa mu sake, maji mu kaswekele. Mukonda dyahi wa kibhange mu kaswekele? Mukonda o diyala wexile muxilu, nange mwene ka divu kyambote bhu kaxi ka mundu. Jezú wa mu bhana valolo, wa xila o ixinganeku yê, wa ‘mu katula mu kifuxi,’ wa mwambata bhwa kambele o athu, yú wa mu sake. Etu ki twala ni kutena kwa kusaka o athu, maji tu tena kuxinganeka o ibhindamu ya jiphange jetu, ni kwa londekesa henda. Poxolo Phawulu wa soneka: “Tu di xinganekyenu mudyetu, tu di suynise mu ku dizola, ni kubhanga o mbote.” (Jihebelewu 10:24) Jezú wa tendela kyebhi kya kexile mudivwa o muxilu, wa mu talatala ni kilendu. Yiyi phangu yambote phala etu!

8, 9. Kyebhi ki tu londekesa kwila twa mesena kukwatekesa o jiphange a kuka ni inema? (Bhana phangu.)

⁸ Xinganeka yo akuka ni inema. O ukexilu wa beta-o-kota u londekesa o kilunga kya Jikidistá ja kidi o henda, ko lusolo lwa kubhanga o ima. (Nzwá 13:34, 35) O henda i tu swinisa kubhanga yoso i tu tena phala kukwatekesa o jiphange a kuka ni inema, kuyá mu yônge ni mu sidivusu ya kuboka. Etu tu a kwatekesa, sumbala kubhanga kiki ku tena ku tu lalekesa bhofele, mba ku tu bhangesa ku zumbuka selu. (Matesu 13:23) Michael, wendela mu kyalu kya malola, u sakidila o kikwatekesu kya tambula ku mwiji ni jiphange mu kilunga kyê. Mwene wambe: “Mukonda dya kikwatekesu kyoso kya Ngi bhana, nga tena kuya dingi mu yônge, ni ku kalakala dingi mu sidivisu ya kuboka. Eme nga wabhela kyavulu kuboka mu ididi mu bhita athu avulu.”

⁹ Ku ji Betele javulu, kwala jiphange ja fiyele a kuka mba a kate. O jiphange a langa o jiphange jiji, a londekesa henda mu kusojeka o ima phala n’a tena kuboka, bhu kaxi ka mikanda ni mitelembe ya kafwetele. Bill, wala ni 86 a mivu, wene mu sonekena mikanda phala athu a tungu dikanga, wambe: “Twa wabhela kyavulu o ujitu wa kusoneka o mikanda.” Nancy, wa-nda tenesa 90 a mivu, wa zwela: “Etu ki tu tale o ukexilu yú wa kuboka wila kujika-jika ngó jivolope, kana. Kiki, kikalakalu kya kuboka. O athu a bhingi kwijiya o kidi!” Ethel, a mu vwala ku muvu wa 1921, wambe: “Jindolo ja ngijidilami kyá. Sayi izuwa ki Ngi bhonza katé ngó o kuzwata.” Né kiki, mwene wa wabhela kyavulu kuboka bhu kaxi ka mutelembe wa kafwetele, wene mu kunda dingi o athu. Barbara, wala ni 85 a mivu, u jimbulula: “Mukonda dya uhaxi wami, kyene mu Ngi bhonza kukalakala kyavulu mu sidivisu ya kuboka. Maji o kuboka ni mutelembe wa kafwetele, kwene mu ngi kwatekesa kulonga akwetu. Nga ku sakidila kyavulu Jihova!” Né muvu ki wa tena, sayi kibuka kya jiphange ja kazola a kuka, a bhange 1.228 a ji ola mu sidivisu ya kuboka, a soneka 6.265 kya mikanda, a zwela ni 2.000 a athu bhu kaxi ka mutelembe wa kafwetele, a bhana 6.315 a madivulu! Sé phata, Jihova wa sanguluka kyavulu ni nguzu ya bhange o jiphange jiji!—Jisabhu 27:11.

10. Kyebhi ki tu tena kukwatekesa o jiphange jetu kukatula dingi mbote mu yônge?

¹⁰ Bhana valolo mu yônge Yetu. Kyoso ki tu xila o kithangana kya kyônge kyetu, tu kwatekesa akwetu ku katula-mu dingi mbote. Kyebhi ki tu bhanga kiki? O ukexilu umoxi wa kubhanga kiki o kubhixila selu, phala ki tu landukise akwetu. Sayi ima, ki tu i fikile, i tena ku tu bhangesa kubhixila tádidi mu yônge. Maji se kifwa kyetu kyá o kulaleka, twa tokala kuxinganeka kyebhi kya-nda divwa o jiphange, ni kuxinganeka se ima yebhi i twa tokala kulungulula phala kubhixila mu ola ya tokala. Kana kujimba we kwila, Jihova ni Mon’ê ene a twixana phala kwiza mu yônge. (Matesu 18:20) Twa tokala kwa xila, mu kubhanga yoso phala kubhixila mu ola ya tokala!

11. Kyebhi o jiphange a bhanga mbandu mu yônge, kyene mu kayela o kitendelesu ki tu sanga mu 1 Kolindo 14:40?

¹¹ Se tu bhana valolo ku jiphange jetu, twa mu kayela o kitendelesu kiki kya Bibidya: “Kala kiki, ima yoso-phe mu i bhanga mu ujitu, ni mu uyukilu wê.” (1 Kolindo 14:40) O jiphange ene mu bhanga mbandu mu yônge, a kayela o kitendelesu kiki, kyoso kya zubha o mbandu yâ mu kithangana kya a xindi tokala. Mu kubhanga kiki, ene a mu xinganeka, yó wa-nda mu bhingana ku ditala ni kilunga kyoso. Xinganeka kyambote kyebhi akwetu kya-nda divwa se o kyônge ki ki-bhu mu ola ya tokala. Sayi jiphange a bhingi hanji kwenda njila ya dikanga mu kuvututa, ku mabata-mâ. Amukwâ abhingi kukwata maximba, komboyo mba taxi. Sayi jiphange a kazala ni athu ka mu bheza Nzambi, ene ejiya kyá o ola ya makaza mâ kubhixila kubhata.

12. Mukonda dyahi twa tokala kuxila ni kuzola o tufunga? (Tala o kaxa “Xila yó ala Kupholo.”)

¹² O tufunga a kalakala kyavulu mu kilunga ni mu kuboka. Kyenyiki-phe, twa tokala kwa zola ni ku a xila. (Tanga 1 Tesalonika 5:12, 13.) Sé phata u sakidila mu yoso yene mu bhanga phala eye. U tena kulondekesa o kisakidilu kyê mu kwa belesela ni kwa kwatekesa, mukonda ‘ene a langa o myenyu yenu, mbata ene a bhinga hinu a kà ki bhela konda kwa Nzambi.’—Jihebelewu 13:7, 17.

BHANA VALOLO KU ATHU MU UKUNJI

13. Ihi i tu dilonga mu ukexilu wa Jezú wa ku talatala athu?

¹³ Mu kikanenu kya lungu ni Jezú, Izaya wambe: “Dithethele dya bukuka mwene ka di sasujula, o mwanga u xongota ka kà u jima.” (Izaya 42:3) O henda yexile na-yu Jezú ya mu bhangesa kudivwa kala kyexile mu divwa o athu. Mwene wa tendela o ndolo ya yó a bhwila ni yó exile mu divwa kala “dithethele dya bukuka,” mba “mwanga u xongota,” mwene wexile mu a talatala ni henda ni mwanyu. Katé mwene ni ana ndenge a mesenene kukala ni Jezú. (Marku 10:14) Mu kidi, etu ki tu tena kutendela ni kulonga o athu kala kya bhangele Jezú! Maji tu tena kulondekesa kwila tu bhana valolo kwa yó u tu sanga mu mbambe yetu, mu ukexilu u tu zwela na-u, mu ima i tu bhanga ni kithangana ki tu bhanga na-u.

14. Mukonda dyahi twa tokala kuxinganeka mu ukexilu wetu wa kuzwela ni athu?

¹⁴ Kyebhi ki twa tokala kuzwela ni athu? Mazunda ni mazunda a athu lelu a “mwa tatesa ni kwa lundujula” mukonda dya mawenji a wiyi, jinguvulu, ni atwameni a jingeleja ja mundu yú. (Matesu 9:36) Mu kyenyiki avulu ala ni héle ya athu, kala ni kidyelelu. Mu kiki o maba ni ukexilu wetu wa kuzwela wa tokala kulondekesa kwila twala ni henda, ni kwila twa a zolo! Athu avulu a mesena kwivwa o njimbu yetu, ki mukonda ngó dya uhete wa kwa longa o Bibidya, maji mukonda twa mesena o mbote yâ, tu a xila.

15. Mawkexilu ebhi dingi u tu tena kulondekesa henda ku athu mu mbambe yetu?

¹⁵ Kwene mawukexilu avulu u tu tena kubhana valolo ku athu mu mbambe yetu. Twa bhingi kubhanga kibhwidisu ilondekesa henda ni kuxila. Sayi muboki wa sidivila mu mbambe mwexile athu akwa jisonyi, kexile mu bhanga ibhwidisu yexile mu thandanganyesa o athu benge-benge se kejidile o kitambwijilu. Mwene kexile mu bhanga ibhwidisu kala yiyi: “Dijina dya Nzambi nanyi?” mba “Wejiya se Utuminu wa Nzambi ihi?” Mu veji dya kiki, mwene wexile mu zwela: Eme nga dilongo mu Bibidya kwila Nzambi wala ni dijina. O kwila ngi tena ku kulondekesa o dijina dyê?” O ndunge yiyi ki i fwama mu ididi yoso mukonda athu ala ni ijila ki i difu. Maji etu twa tokala kutalatala o athu ni henda ni ku axila mu ithangana yoso. Phala kubhanga kiki twa tokala ku a ejiya kyambote.

16, 17. Kyebhi ki tu londekesa o mbote (a) kyoso ki tu kunda o athu? (b) mu kithangana ki tu bhanga ni kuzwela na-u?

¹⁶ Ithangana yebhi i twa tokala kukunda o athu? Kyoso ki tu boka nzo ni nzo o athu ka twixana. Mukonda dya kiki nange kima kyambote ku a kunda mu ola yala polondo phala kuzwela. (Matesu 7:12) Mu kifika, o kwila mu mbambe yé o athu ku disukilu dya semana a wabhela kubalumuka tádidi? Mu kiki-phe, sembele se u mateka mu kuboka mu kikoka mba mu kididi mu bhita athu avulu, ni kukunda o athu u wejiya kwila a-nda kwivwa.

¹⁷ Thembu kuxi i twa tokala kubhanga-ku? O athu ala ni ikalakalu yavulu; mu kiki kima kyambote kulenguluka benge-benge mu dimatekenu. Kima kyambote kudikunda na-u ni lusolo mu veji dya kubhanga ithangana yavulu. (1 Kolindo 9:20-23) Kyoso o athu kya mona kuma tu tendela kwila ala ni ikalakalu, nange mu kithangana kyengi ki twa-nda kwila twa vutuka phala ku a kunda, ene a tena ku twivwa. Se tu londekesa o idifwa i tu bhana o nzumbi ikola ya Nzambi, mu kidi mwene twa-nda kala ‘tu jingunza ja Nzambi.’ Nange bhu kaxi ketu Jihova u kwatekesa athu kudilonga o kidi!—1 Kolindo 3:6, 7, 9.

18. Kyoso ki tu bhana valolo ku akwetu ni ku a xinganeka, mabesá ebhi u twa-nda tambula?

¹⁸ Twa-nda bhanga yoso i tu tena phala kubhana valolo ku mwiji wetu, jiphange jetu ni yó u twene mu sanga mu kuboka. Se tu bhanga kiki, twa-nda kala ni mabesá avulu kindala ni ku hádya. Kala kizwela Jisálamu 41:1, 2: “U zediwa o muthu yó woso u xinganeka [o] ngadyama; kuma mu kizuwa kya dilamba, Jihova u mu kudila wé bhwoso bhwa tatela. Jihova u mu kondeka, u mu bhana mwenyu; u mu bhana o kukala ni dibesá mu ngongo; ka xikina ku mu bhakula mu vondadi ya jinguma jê.”