Kala ni Kutululuka kwa Muxima né Mwene se Ima i Lunguluka

1, 2. (a) Se ima i lunguluka ni lusolo kyebhi ki kala o mwenyu wetu? (Tala o foto ya dyanga.) (b) Kala ki zwela o Salamu ya 131, ihi i tena ku tu kwatekesa kukala ni kutuluka kwa muxima?

LLOYD ni Alexandra a sidivila ku Betel mu 25 a mivu ndenge. Mu kusuluka a a tumikisa mu ukunji. Ku dimatekenu ene a luwalele. Lloyd wambe: “Mu dyami o Betele ni sidivisu i nga kexile mu bhanga-ku, yexile kala mwenyu wami. Mu kilunji kyami nga xikina o kima kya bhangesa ku tu tumikisa kwengi, maji mu kubhita jisemana ni jimbeji, nga mateka kudívwa kala ki twexile dingi ni valolo.” Sayi kithangana, Lloyd wa kexile ni ibanzelu yambote ya lungu ni ku a tumikisa kwengi, mu kithangana kya mukwá, o muxima wa mu tolokele.

² Ithangana ni ithangana, o ima ku mwenyu wetu ya-nda lunguluka, né mwene se ki tu ki fikile, o kulunguluka kuku, ku tena ku tu thandanganyesa ni ku tu bhekela héle. (Jisabhu 12:25) Ihi i tu tena kubhanga se kya mu tu bhonza kuxikina o ukexilu wa ubhe wa mwenyu wetu? (Tanga Jisálamu 131:1-3.) Tu mone kyebhi o jiselevende ja Jihova ki kale m’ukulu kikale lelu, kya tena kukala ni kutululuka kwa muxima né mwene kyoso o munyu wâ wa lunguluka ni lusolo.

“O KUTULULUKA KWA NZAMBI” KU TU KWATEKESA KYEBHI?

3. Kyebhi o mwenyu wa Zuze wa lunguluka mu kithangana ni mbandu?

³ Mu kifika, xinganeka ya bhitile ni Zuze. Ku ana oso a Jakobo, Zuze mwene a mu zolele dingi. Kiki kya bhangesa o jiphange jê kukala ni difumba. Kyoso Zuze kya kexile ni 17 a mivu, ene a mu sumbisa kala mubhika. (Dimatekenu 37:2-4, 23-28) Mwene wa tale hadi ku Ijitu mu 13 kya mivu, kya dyanga kala mubhika, kayadi kyoso kya mu te mu kangolonda. Zuze wa kexile dikamba dya tat’ê, mwene wa mu zolele kyavulu. O maka yá hinu a mu bhangesa kuluwala kyavulu mba kukala ni njinda, maji ki kyene kya bhiti. Ihi ya mu kwatekesa?

4. (a) Ihi ya bhange Zuze kyoso kyexile mu kaleya? (b) Kyebhi Jihova kya tambwijila o misambu ya Zuze?

⁴ Kyoso Zuze kyexile mu tala hadi mu kaleya, nange mwene wa banzele kyebhi Jihova kya mu kwatekesa m’ukulu. (Dimatekenu 39:21; Jisálamu 105:17-19) Nange mwene wa banze mu jinzoji ja loto kyoso kyexile hanji munzebeta. O kubhanga kiki, kwa mu swinisa, mu kwijiya kwila Jihova wexile-nê. (Dimatekenu 37:5-11) Mwene nange wa sambe lwavulu, wa zwela kwa Jihova yoso ya kexile ku muxima wê. (Jisálamu 145:18) Jihova wa tambwijila o misambu ya Zuze mu ku mu dyelelesa kwila weji “kala-nê,” kiza ki kizé.—Ikalakalu 7:9, 10.a (Tala ku lwiji.)

5. Kyebhi “o kutululuka kwa Nzambi” ku tu swina dingi kusidivila Jihova?

⁵ Né mwene se kibhidi kyetu kya dikota, “o kutululuka kwa Nzambi,” kulanga o “ilunji” yetu, ku tu tululukisa. (Tanga Filipe 4:6, 7.) Kyoso ki tu thandanganya mba tu kala ni héle, “o kutululuka kwa Nzambi,” ku tena ku tu swinisa kusuluka ni kusidivila Jihova, mu veji dya kubhwila. Twa-nda dilonga phangu ya jiphange ja izuwa yetu a di bhana ni maka yá.

BHINGA KWA JIHOVA N’A KUKWATEKESA DINGI KUTULULUKA

6, 7. Kyebhi o misambu yetu i tena ku tu kwatekesa kukala dingi ni kutululuka kwa muxima? Bhana phangu.

⁶ Kyoso Ryan ni Juliette kyevu kwila keji kala dingi aboki a katunda, ene a luwala. Ryan wambe: “Twa soto nguzu kwa Jihova bhu kaxi ka musambu. Twa kijidile kwila, kyokyo kyexile kithangana kyambote phala kulondekesa o kixikanu kyetu kwa mwene. Jiphange javulu mu kilunga kyetu, akexile athu a ubhe mu kudilonga o kidi, twa sambe phala Jihova ku tu kwatekesa kubhana phangu yambote ya kixikanu.”

⁷ Kyebhi Jihova kya tambwijila o misambu yâ? Ryan wambe: “Kyoso ki twa zubha o kusamba, o kutandanganya ni kuluwala ku twexile na-ku ku dimatekenu kwa bhiti. O kutululuka kwa Nzambi kwa lange o mixima yetu, kwa tu bhana nguzu. Twa mono kwila tu tena kukala ni valolo ku pholo ya Jihova se tu kala ni ixinganeku yambote.”

8-10. (a) Kyebhi o nzumbi ya Nzambi i tu kwatekesa kyoso ki tu kala ni héle? Kyebhi Jihova kya tena ku tu kwatekesa kyoso ki tu kolokota ku mu sidivila?

⁸ O nzumbi ya Nzambi i tena ku tu tululukisa, i tena ku tu lembalesa jivelusu ja Bibidya, ja-nda tu kwatekesa kutendela o kima kya beta o kota ku mwenyu. (Tanga Nzwá 14:26, 27.) Tala ya bhiti ni Filipe ni Madiya, dikaza dya sidivila ku Betele mu 24 kya mivu ndenge. Mu mbeji jiwana, ene a fundu manya Felipe ni manya Madiya, ni jindandu jengi. A bhingile kulanga tata ya Madiya wa katele kyavulu.

⁹ Filipe wambe: “Sayi kithangana nga fikile kwila, nga kexile mu dibhana kyambote ni maka yá, maji kwa kambele kima. Nga sange o divulu dya Kolose 1:11 mu Mulangidi wa kudilonga. Nga tonginina kwila, nga kexile mu kolokota, maji kwa kambele kima. Nga bhingile ‘kukolokota ni mwanyu ni kusanguluka.’ O velusu yiyi, ya ngi londekesa kwila o kusanguluka kwami ki kwijila mu kudibhana ni ibhidi, maji kwijila mu kutena kwala na-ku o nzumbi ya Nzambi ku mwenyu wami.”

¹⁰ Kuma Filipe ni Madiya a suluka mu sidivisu ya Jihova, mwene wa a besowala mu mawukexilu avulu. Kyoso kya tundu ku Betele, ene a mateka kulonga maxibulu a Bibidya a kulu kyambote mu nzumbi, ene ka mesenene kudilonga ngó lumoxi ku semana. Madiya wambe: “Éne exile o kusanguluka kwetu, yú wene o ukexile wa Jihova ku tu londekesa kwila ima yoso yeji bhita kyambote.”

BHANGA KIMA KI BHANGESA JIHOVA KU KUBESOWALA

11, 12. (a) Kyebhi Zuze kya bhange kima kya bhangesa Jihova ku mu besowala? (b) Kyebhi Jihova kya besowala Zuze?

¹¹ Kyoso o mwenyu ki u lunguluka ni lusolo, tu xinganeka kya ngó mu ibhidi i twa mu bhita nayu. Kiki kyeji tena kubhita we ni Zuze. Maji, mu veji dya kuxinganeka ngó mu ibhidi yê, mwene wa solo kubhanga yoso ya tenene mu kithangana kyokyo. Zuze wa kalakala kyavulu mu inzo ya Potifale, kyene we kya bhange mu kaleya. Kikalakalu kyoso kya mu bhele o kabhitangu ka kilangidilu, mwene wa kexile mu kibhanga ni nguzu yoso.—Dimatekenu 39:21-23.

¹² Sayi kizuwa, Zuze a mu solo phala kulanga ji pelezu jiyadi, ja kexile mu kalakela Falawo. Zuze wexile mu a talatala ni henda, kyenyiki, ene a mu dyelele kyavulu, katé a tena ku mu tangela o jinzonji jâ ja loto mu usuku, ni ima ya kexile mu a tandanganyesa. (Dimatekenu 40:5-8) Zuze kya kijidile, maji o jinzoji jojo jene jeji mu kwatekesa kutunda mu kaleya. Mu kubhita mivu iyadi, a mu katula mu kaleya, wa kituka mutumini wa dikota mu Ijitu. Falawo mwene ngó wa túndile Zuze mu kutena!—Dimatekenu 41:1, 14-16, 39-41.

13. Kyebhi ki tu tena kubhanga kima kya-nda besowala Jihova, né mwene se twa mu dibhana ni ibhidi yavulu?

¹³ Kala Zuze, tutena we kudibhana ni maka a túndu o nguzu yetu. Maji se tu kala ni mwanyu, tu bhanga yoso i tu tena, Jihova wa-nda tu besowala. (Jisálamu 37:5) Né mwene kyoso ki tu tandanganya, mba tu kala ni héle ku muxima, ki twa tokala ku kala ni “kikote” mba tu kamba ki dyelelu. (2 Kolindo 4:8) Jihova wa-nda kala n’etu jinga, kotelele kya mwene se tu tá ku pholo o ukunji wetu.

TA O UKUNJI WÉ KU PHOLO

14-16. Kyebhi Filipe kya te o ukunji wê ku pholo né mwene kyoso o mwenyu wê ki wa lunguluka?

¹⁴ Filipe o mukunji, phangu yambote ya ku tá kupholo o ukunji, né mwene o ima ku mwenyu wé ya lungulukile. Mu kithangana, mwene wa sangulukile ni kikalakalu kya ubhe mu Jeluzaleme. (Ikalakalu 6:1-6) Maji mu kubhita thembu, yoso ya lunguluka. Kyoso kya jibha Xiteva, o jikidistá a mateka ku a zukutisa kyavulu. Mukonda dya izukutisu yiyi, o Jikidistá a xisa Jeluzaleme. Kuma Filipe wa mesenene ku suluka ni ku sidivila Jihova, mwene wayi ku mbonge ya Samádya. Kwenyoko, kwexile athu a bhingile kwivwa o njimbu yambote.—Matesu 10:5; Ikalakalu 8:1, 5.

¹⁵ Filipe wexile polondo phala kuya kabasa kididi kwa mu tumikisa o nzumbi ya Nzambi. Kyenyiki, Jihova wa mu tumikisa mu ididi mwexile athu, a kambele kwívwa o njimbu yambote. Jijudé javulu a kexile mu sebhulula akwa Samadyá, a kexile mu a talatala kyayibha. Maji Filipe kexile mukwa katombo. Mwene ni kufulujuka kwoso wa a bokela o njimbu yambote. Akwa Samadya a mwivu ‘ni muxima umoxi.’—Ikalakalu 8:6-8.

¹⁶ Mu kusuluka o nzumbi ya Nzambi ya bhangesa Filipe kuboka mu jimbanza ja Azoto ni Sezaleya, kwa kexile athu avulu a kambele kwijiya Nzambi. (Ikalakalu 8:39, 40) Mu ku suluka, o mwenyu wa Filipe wa lunguluka dingi. Mwene wa tungu ku inzo yu wa kexile ni mwiji. Maji ne kyoso o mwenyu wa Filipe wa lunguluka mwene wa suluka mu ta o ukunji wê ku pholo, Jihova wa besowala mwene ni mwiji we.—Ikalakalu 21:8, 9.

17, 18. Kyoso o mwenyu wetu ki u lunguluka, o kulunga o muxima mu ukunji ku tu kwatekesa kyebhi?

¹⁷ Phange javulu ala mu sidivisu ya thembu yoso, ambe kwila, kulunga o mixima mu ukunji wâ, kwa a kwatekesa kusanguluka ni kukala ni ixinganeku yambote né mwene kyoso o ima ki ya lunguluka. Mu kifika, kyoso dikaza ku Africa do Sul, Osborne ni Polite kya tundu ku Betele, ene a fikile kwila ki kweji bhonza kusanga salu ya kaxaxi ka kizuwa, ni inzo phala kukala. Osborne wambe: “Maji o salu ya mesenene ki i moneka ni lusolo.” Polite wambe: “Kwa bhiti mbeji titatu, ki tu sange salu, ki tu kexile dingi ni kitadi. Kyexile kibhidi kya dikota.”

¹⁸ Ihi ya kwatekesa Osborne ni Polite mu kithangana kiki? Osborne wambe: “ Kuboka lwavulu ni kilunga kwa kwatekesa kukala ni ixinganeku yambote.” Mu veji kya kuxikama kubhata ni héle, ene a solo kukalakala dingi mu ukunji. Kubhanga kiki kwa a bhekela kisangusangu kya dikota! Osborne wambe dingi: “Twa soto salu mu ididi yoso, ku disukilu, twa i sange.”

DYELELA KWA JIHOVA NI MUXIMA WOSO

19-21. (a) Ihi ya-nda tu kwatekesa kukala ni kutululuka kwa muxima? (b) Mbote yebhi ijila mu ku xikina o ukexilu wa ubhe wa mwenyu wetu?

¹⁹ Kala ki twa mono, se tu bhanga yoso né mwene se ima i lunguluka, anga tu dyelela kwa Jihova ni muxima woso, twa-nda tena kukala ni kutululuka kwa muxima, né mwene ni ibhidi. (Tanga Mikeia 7:7.) Kupholo dya kwenda, nange tu mona kwila o kuxikina o ukexilu wa ubhe wa mwenyu kwa kolesa dingi o ukamba wetu ni Jihova. Polite wa jimbulula kwila, ku a tumikisa kwengi ni kutunda ku Betele, kwa mu longo ihi ilombolola kukingila kwa Jihova, né mwene se o mwenyu u moneka wila wa bhonzo kyavulu. Mwene wambe: “O ukamba wami ni mwene wa kolo dingi.”

²⁰ Madiya, twa mu tumbula ku dimatekenu, wa mu langa haji tat’ê wa kuka, maji keha o sidivisu ya muboki wa thembu yoso. Mwene wambe: “Nga dilongo kwila, kyoso ki ngi kala ni héle, nga bhingi kwimana, kusamba ni kutululuka. Kweha o ima mu maku ma Jihova, nange dyene o disá dya katunda di nga dilongo. Kyene we ki nga-nda bhinga kubhanga ku hádya.”

²¹ Lloyd ni Alexandra a xikina kwila, o kulunguluka kwa ima ku mwenyu wâ, kwa te o kixikanu kyâ mu kilwezu, ene ka ki fikile. Maji ene a tena kumona kyebhi o ibhidi yiyi, ya a kwatekesa. Lelu ene ejiya kwila, o kixikanu kya kya kolo, ki tena ku a konda o malamba kyoso kya kala ni maka, ene a mu dívwa kwila a kituka athu ambote.

22. Se tu bhanga yoso i tu tena né mwene se mwenyu wetu u lungulula, ihi i tu tena kukingila?

²² Ku mundu yú, o mwenyu wetu u tena kulunguluka mu kithangana ni mbandu. Nange a-nda tu bhana ikalakalu ki i difu mu sidivisu ya Jihova, kumoneka maka a lungu ni kukata, mba tu bhinga kulanga o mwiji wetu mu ukexilu wengi. Maka oso-oso a moneka ku mwenyu, dyelela kwila Jihova u kulanga, wa-nda kukwatekesa mu kithangana kya tokala. (Jihebelewu 4:16; 1 Phetele 5:6, 7) Kindala kiki, bhanga yoso i u tena né mwene se mwenyu wé u lunguluka. Samba kwa Tat’é Jihova, dilonge ku mu dyelela ni muxima woso. Mu kubhanga kiki, né mwene se mwenyu wé u lungululuka, wa-nda kala ni kutululuka ku tunda kwa Jihova.