O Kwila o Jimbangi ja Jihova Ala ni Bibidya ki Idifu ni Jibibidya Jengi?
O Jimbangi ja Jihova kene mutanga ngó Bibidya imoxi yolungulule. Maji awabhela dingi kutanga o Tradução do Novo Mundo da Bíblia Sagrada yene mu madimi avulu, mukonda mwala o dijina dya Nzambi, o milongi yalamu yakidi, ki ibhonzo ku itendela.
O Bibidya yiyi, itumbula o dijina dya Nzambi. Sayi Jibibidya jolungulule, kijibhana kijingu kwa Ngana yê. Mu kifika, sayi Bibidya itumbula majina a 70 a athu a bhange mbandu mu kikalakalu kya ku ilungulula. Maji o Bibidya yenyiyi ki itumbula o dijina dya Ngana yê, Jihova Nzambi!
Kumbandu ya mukwa, o Bibidya Tradução do Novo Mundo da Bíblia Sagrada, yavutula dingi o dijina dya Nzambi mu ididi mu dyakexile kya mu mikanda ya dyanga. O majina a alunguludi ka atumbula mu Bibidya yiyi.
O milongi yalamu yakidi. Ko Jibibidya joso jitanga o milongi ya Nzambi ni kidi kyoso. Mu kifika sayi Bibidya o divulu dya Matesu 7:13 a dilungulula kiki: ‘Bokonenu bhu dibhitu dya tolo, mbata o dibhitu dya kulu ni njila yazanze iya ku infernu; o athu a di bokona avulu.’ Maji-phe o mikanda yokulu ki mwala o kizwelu “infernu,” maji mwala o kizwelu “mwalunga.” Nange o alunguludi atumbula o kizwelu “infernu”, mukonda axikinine kwila o athu ayibha anda kwa kaxtikala mu infernu ya túbhya katé ku hádya ni hádya. Maji o milongi yiyi kiyala mu Bibidya. Kyenyiki-phe, ni kidi kyoso, o Bibidya Tradução do Novo Mundo da Bíblia Sagrada mu Kimbundu ilungulula kiki o velusu yiyi: “Bokonenu mu dibhitu dyatolo, mukonda o dibhitu dya dikota ni njila ya zanze, iya kw’alunga, avulu abokona-mu.”
Ki ibhonzo ku itendela. O Bibidya yambote yatokala kukala ni milongi yakidi, ki itokala we kubhonza phala ku itendela. Tala kifika kimoxi. Mu divulu dya Matesu 5:3, Jezú watumbulamu kixinganeku, se ku kilungulula kizwelu ni kizwelu, kilombolola “azediwa jingadyama ja muxima.” Kuma o izwelu yiyi ki ijimbuluka kyambote mba kubhonza ku itendela, o Bibidya Tradução do Novo Mundo da Bíblia Sagrada, mu Kimbundu ilungulula o kixinganeku kiki mu ukexilu yú: “Azediwa yó ejiya kwila abhindamena Nzambi.”
Kokotumbula ngó o dijina dya Nzambi, ni milongi kukala yakidi ni kwila ki ya bhonzo ku itendela, sayi dingi kima kyengi kibhangesa o Bibidya Tradução do Novo Mundo da Bíblia Sagrada, kiditungala: O Bibidya yiyi kene mu isumbisa. Mukonda dya kiki, mazunda a athu atena kya kutanga o Bibidya mu dimi dyâ dya uvwalukilu, katé mwene yó kala ni kitadi.