IBHWIDISU IBHANGA O MINZANGALA
O Izwatu yê Ilombolola Ihi ya Lungu neye?
Mukonda dyahi watokala kutala o uzwatelu wé? Mukonda o izwatu yetu izwela se etu nanyi. Mu kyenyiki, o izwatu yé ilombolola ihi yalungu neye?
Itondalu itatu yamakota yalungu ni uzwatelu ni kyebhi ki tu ilenga
Kitondalu #1: Kwehela o ima itumona mu internete mba mu mutelembe wa izuzumbya kukulonga kyebhi ki watokala o kuzwata.
Sayi kilumba amwixana Teresa, watange kiki: “Sayi bhabha, ngisota kusumba izwatu mukonda nga imono mu internete mba mu mutelembe wa izuzumbya. Kyoso ki umona mundu wavulu wasumbu o kizwatu kyokyo, eye umesena we kukisumba.”
O ilumba kene ngo adibhana ni maka enya kana. O divulu The Everything Guide to Raising Adolescent Boys (Kikwatekesu Phala Kusasa Tuminzangala Twa Mala), dyatange kiki: “O minzangala ya mala akayela wa o funza ya mundu kala o ahatu. Tunde ku undenge, o mutelembe wa izuzumbya u alondekesa o izwatu yatokala kuta.”
Njila yabeta o kufwama: O Bibidya yamba kiki: “Kilalu maka oso a zwela kwala athu, mwene u a xikina; maji yó wa sunguluka-phe, u zonga kyambote kyoso kyenda.” (Jisabhu 14:15) Kala kyazwela o velusu yiyi, tongolola kyambote o ima i umona mu mutelembe wa izuzumbya. Mu kifika, kyoso ki umona amulondekesa izwatu ya amuzwela kwila izwatu “sunga,” “ititidisa o muxima,” mba izwatu “ibhangesa kukuwabhela,” imana hanji, udibhwidisa kiki:
‘Se ngisumba o izwatu yiyi, nanyi wandanganyala?’
‘Se ngita o izwatu yiyi, ngandadifwangana ni nanyi?’
‘O kwila o izwatu yiyi ilombolola kyambote o ukexilu wami?’
Kwata o ndunge yiyi: Mu semana imoxi, tala kyambote o izwatu yene mulondekesa mu mutelembe wa izuzumbya, mu internete mba mu madivulu. Idifwa yebhi ilondekesa o izwatu yiyi? O kwila amesena kuma usumba o izwatu yiyi phala kukubhangesa kukayela o uzwatelu wa athu? Sayi kilumba amwixana Karen wambe kiki: “Kwene ijijidiku yavulu phala eye kufwama kyavulu, kuzwata kyambote ni kulondekesa o mukutu wé ‘wawabha.’ O matenda a izwatu ejiya o kidi kiki, mukonda dya kiki asota kukwata o minzangala.”
Kitondalu #2: Kusumba izwatu mukonda wamesena kudifwangana ni athu.
Sayi munzangala amwixana Manuel, wambe kiki: “Se kwala izwatu athu avulu amu ita, mundu woso wandamesena ku izwata. Se ku isumbu, andakufundisa kyayibha.” Kilumba amwixana Ana, kyene we kyatange, wixi kiki: “Ki mukonda ngó dya kwila athu avulu amu izwata, maji o kumesena kudifwangana ni akwenu.”
Njila yabeta o kufwama: O Bibidya yamba: “Ki mwehele o mundu yú ku mifunyisa.” (Loma 12:2) Kala kyatange o velusu yiyi, tala o izwatu yé yoso anga udibhwidisa kiki:
‘Mu kithangana kya kusola o izwatu yami ngibanza mu ihi?’
‘O kwila mudyami kima kyala ni valolo yavulu kuta izwatu a ijiya ku athu avulu?’
‘O kwila ngamesena kuma o athu angifumanesa mukonda dya izwatu yami’
Kwata o ndunge yiyi: Kubanze kwila kwene ngó ima iyadi: Muthu amutala kyambote (yó uta izwatu a ijiya ku athu avulu) ni yó kamutala kyambote (yó ukamba kuta kate izwatu a ijiya ku athu avulu). Mu veji dya kiki, xinganeka mu kima kya katatu: Londekesa kwila u muthu wejiya o ima i usola. Kyoso ki usanguluka ni ima i usola, ki wandamesena kwila akwenu akufumanesa.
Kitondalu #3: Kubanza kwila kota kuta izwatu inaminina ku mukutu.
Sayi kilumba amwixana Jennifer, wambe kiki: “Mu kuzwela o kidi, sayi bhabha ngikala ni vondadi ya kuta izwatu yabutu mba inginaminina mu mukutu.”
Njila yabeta o kufwama: O Bibidya yamba: “O kubhenya kwenu ki kukale ngó kwa kanga . . . maji o kubhenya kwenu kukale kwa muxima.” (1 Phetele 3:3, 4) Mu kuxinganeka mu kitendelesu kiki, dibhwidise: ‘O kwila awabhela dingi yó ata izwatu ibhangesa akwâ kumukutala ngó mwene inga kukala ni idifwa yanda mubhangesa kukala ni makamba ambote?
Kwata o ndunge yiyi: O kima kyabetakota mu uzwatelu wé, o kuzwata ni kuxila kwoso ni kilunji. Sumbala lelu o athu kazwata mu ukexilu yú, maka xinganeka mu maka enyá:
O kwila wazwela kyá ni muthu uzwela kyavulu, anga mu ithangana yoso uzwela ngó yalungu nê? Kituwabhela kuzwela ni muthu wala ni ukexilu yú, o kyayibha dingi mwene kejiya kwila mu kubhanga kiki wamu tuluwalesa kyavulu!
Seku muthu wamesena kukala ni muthu uzwela ngó yalungu nê. Kyene kimoxi we ni muthu uzwata phala kudifumanesa
O muthu uzwata kyayibha, uzwata mu ukexilu wa kudifumanesa, wadifu ni muthu uzwela ngó yalungu nê. Kyedi kala eye wamuzwela kiki: “Enu akwetu, ngitalyenu!” Kiki kyanda bhangesa ku kumona kala eye ki wadijiya luwa mba wamudizangeleka. O athu atena we kubanza kwila, wandala kuma akusuwa ngó eye mba u kilalu.
Mu veji dya kubhanga kiki, kota se uzwata ni kuxila kwoso ni kilunji. Sayi kilumba amwixana Monica, wambe kiki: “Kuzwata ni kuxila kwoso ni kilunji, ki kilombolola kwila wandazwata kala kuku’é. Maji kilombolola kwila eye udixila, uxila we akwenu.”