Kyebhi o Sata ya Jezú ‘Itena Kubhulula Athu Avulu’?
O Bibidya i tambwijila
Bhukaxi ka sata ya Jezú, Nzambi ubhulula o athu oso ku kituxi ni kalunga. O Bibidya yamba kwila, o manyinga a Jezú asoko ngó ni futu phala kukúla kima. (Efezu 1:7; 1 Phetele 1:18, 19) Mukonda dya kiki, Jezú wambe kwila weza mu ngongo phala “kubhana o mwenyu wê kala sata ya kukúla o mundu.”—Matesu 20:28.
Mukonda dyahi kwabhingile “kukúla o mundu”?
O diyala dya dyanga Adá, amubhange kala muthu wayuka, kifwa sé kituxi. Mwene weji kala ni mwenyu wakalelaku. Maji watexi o ujitu yú kyoso kyasolo kubhukumukina Nzambi. (Dimatekenu 3:17-19) Kyoso mwene kyamateka o kuvwala, o twana twakexile mulundula o kituxi. (Loma 5:12) Mukonda dya kiki, o Bibidya yamba kwila, Adá ‘wadisumbisa’ mwene ni twana twê kala abhika a kituxi ni kalunga. (Loma 7:14) O twana twa Adá keji tena kufuta kima phala kubhulula o kima kya texi o tata yâ, mukonda ene oso exile akwâ ituxi.—Jisálamu 49:7, 8.
Kyenyiki, o twana twoso twa Adá, kexile dingi ni kidyelelu. Maji Nzambi wa akwatela henda. (Nzwá 3:16) Mukonda dya kuyuka kwa Nzambi, mwene katokalele kuloloka o ituxi ya twana twa Adá, mu kingoho. (Jisálamu 89:14; Loma 3:23-26) Nzambi wazolo o athu, mu kiki, mwene wasoto ndunge phala kuloloka ni kujima o ituxi yetu. (Loma 5:6-8) Bhukaxi ka sata ya kukúla ya Jezú, Nzambi wasange o ndunge yafwama phala kubhulula o athu.
O kukúla ihi?
Mu Bibidya o kizwelu “kukúla”, kwalungu ni ima itatu:
O Kukúla futu.—Dyalwilu 3:46, 47.
O kukúla kubhekela kubhuluka.—Makatukilu 21:30.
O valolo yê yasoko ngó ni kima kyanda kikúla.a
Tala kyebhi o sata ya kukúla ya Jezú Kidistu ikumbidila o ima itatu yiyi.
Futu. O Bibidya yamba kwila o Jikidistá a asumbu ni “kima kyala ni valolo yadikota.” (1 Kolindu 6:20; 7:23) O kima kyala ni valolo yadikota, o manyinga a Jezú, mukonda mwene “wasumbu athu phala Nzambi ni manyinga mé, atundu ku miji yoso, ku madimi moso, ku madyembu moso ni ku ifuxi yoso.”—Dijingunwinu 5:8, 9.
Kubhuluka. O sata ya Jezú ibhekela ‘kubhuluka ku ituxi, mukonda dya kukúla.’—1 Kolindu 1:30; Kolose 1:14; Jihebelewu 9:15.
Valolo Yasoko. O sata ya Jezú yasoko phala kufuta o kima kyatexi Adá, o mwenyu wayuka. (1 Kolindu 15:21, 22, 45, 46) O Bibidya yamba: “Mukonda bhukaxi ka kuxibhaka kwa muthu umoxi [Adá] athu avulu akituka akwa ituxi, kyene we kimoxi, bhukaxi ka kutumaka kwa muthu umoxi, [Jezú Kidistu] avulu anda kituka athu a yuka.” (Loma 5:19) O velusu ilondekesa se kyebhi o kufwa kwa muthu umoxi, kwasokele phala kukúla athu avulu ku kituxi. Mu kidi o sata ya Jezú yasokele phala “kukula athu oso.” Oso abhanga o ima yatokala, atena kukatula mbote mu sata yiyi.—1 Timote 2:5, 6.
a Mu madimi asoneka o Bibidya, o kizwelu “kukúla” kilombolola kima kya valolo kyobhakule phala kutambula kima kya mukwá. Mu kifika mu dizwyi dya Hebalayiku o kizwelu ka·fár kilombolola “kufuta.” (Dimatekenu 6:14) O kizwelu kiki akitumbula dingi phala kulombolola kufuta o ima yayibha yabhekela o kituxi. (Jisálamu 65:3) O kizwelu kó·fer akitumbula phala kulombolola o kima kyabhana phala kufuta o ibhidi ibhekela o kituxi. (Makatukilu 21:30) Kyene we kimoxi, o kizwelu lý·tron a kilungulula “kukúla” kilombolola o futu phala “kukúla” kima. (Matesu 20:28) O asoneki mu Ngeleku, atumbula o kizwelu kiki phala kulombolola o futu yabhana phala kubhulula o muthu amukutu mu kaleya, mba phala kubhana ufôlo ku mubhika.