Dyala dimoxi wakwata kitutu kya ujitu phala kubhana

Ihi Yamba o Bibidya ya Lungu ni Ukexilu Wakubhana?

O Bibidya itambwijila

O Bibidya ituswinisa kubhana ima ku akwetu ni muxima woso. Yene itulondekesa kwila, o ukexilu wakubhana ki ibhekela ngo mbote kwa yo utambula, maji we ibhekela we mbote kwa yo ubhana. (Jisabhu 11:25; Luka 6:38) Jezú wambe: “O kubhana kusangulukisa dingi, o kutambula ndenge.”—Ikalakalu 20:35.

Ukexilu webhi wakubhana usangulukisa Nzambi?

Nzambi usanguluka kyoso kitubhana kima ku muthu ni muxima woso. O Bibidya yamba: “Kala muthu abhane kala kya xinganeka ku muxima wê, kabhane ni kuluwala mba ni ku mu jijidika, mukonda Nzambi wazolo o muthu ubhana ni kusanguluka.”—2 Kolindu 9:7.

O kubhana ni muxima kibhanga mbandu ya “ubhezelu wazele” (Tiyaku 1:27, nota) Woso ubhana ni muxma woso kwa yo wabhindamena kikwatekesu, wa mu kalakala ni Nzambi, mwene umona kala dikongo dya bhange kwamwene. (Jisabhu 19:17) O Bibidya ilonga kwila Nzambi wanda besowala yo ala ni ukexilu wakubhana.—Luka 14:12-14.

Ukexilu webhi wakubhana uluwalesa Nzambi?

Kubhana ni muxima wayibha. Mu kifika:

Phala kutuximana ku athu.—Matesu 6:2.
Phala kukingila we kivutwilu.—Luka 14:12-14.
Phala kusumba o kubhuluka.—Jisálamu 49:6, 7.

Kubhana ima phala kukwatekesa ikalakalu ya zembe Nzambi. Mukifika, kima kyayibha kuhana kitadi kwa yó wanda ngastala ngo kujijoko jayibha, phala kusumba jidroga mba uholuwa. (1 Kolindu 6:9, 10; 2 Kolindu 7:1) Kikima kyambote we kubhana kima ku muthu utena kukalakala phala kudidikila, maji udituna kukibhanga.—2 Tesalonika 3:10.

Kyoso kya tandanganya ni mawujitu amubhana kwa Nzambi. O Bibidya yamba kwila o atwameni a mwiji atokala kudikila o ibhindamu ya mwiji wa. (1 Timote 5:8) Ki kyeji fwama se o mutwameni wa mwiji ukwatekesa athu ku kanga mu kwabhana kama, maji wehela o mwiji we kutala hadi. Jezú watendelesa yó kene mu kwatekesa o jitat’â ja jakuka kya, mu kwamba “yoso i ngala nayu yeji kukwatekesa, nga ibhakula kwa Nzambi ”—Máluku 7:9-13.

Jivelesu ja Bibidya jalungu ni kubhana

Jisabhu 11:25: “Mwenyu wa muthu wa wabhela ku wanena akwá, u mona mbote; kuma woso u tekela, mwene we a mu tekela.”

O velesu iyiy ilombolola ihi: O kubhana kikima kyambote ngó phala yó utambula, maji kate phala yó ubhana we.

Jisabhu 19:17: “Woso ubhindumuna ngadyama, wa sobhesa kwa Ngana; Jihova mwene hinu u mu futa o mbote yê.”

O velesu iyiy ilombolola ihi: O yó ene mu kwatekesa akwa abhindama, Nzambi wamona kala wala ni dikongo kwa ene, mu kiki mwene wa kanena kwa abesowala.

Matesu 6:2: “kyoso ki ubhana ujitu ku ngadyama, kana kuxika koloneta bhu pholo yé, kala kibhanga o akwa mangonya . . . mu malombe ni mu ikoka, phala kwa ximana ku athu.”

O velesu yiyi ilombolola ihi: Kitutokala kubhana phala kudilondekesa ngó ku athu, mba phala kutuximana.

Ikalakalu 20:35: “O kubhana kusangulukisa dingi, o kutambula ndenge.”

O velesu yiyi ilombolola ihi: O kubhana ni muxima woso usangulukisa dingi.

2 Kolindu 9:7: “Kala muthu abhane kala kya xinganeka ku muxima wê, kabhane ni kuluwala mba ni ku mu jijidika, mukonda Nzambi wazolo o muthu ubhana ni kusanguluka.”

O velusu yiyi ilombolola ihi: Nzambi usanguluka kyoso kitubhana kima ku muthu ni muxima woso.