Kikalakalu Kya Kubhanga o Divulu Dyabeta Dingi Kota

“Nga kingila o kithangana kiki mu 19 dya mivu!” O phange yú wakexile mu kinga ihi mu mivu yoso yiyi? O Bibidya Tradução do Novo Mundo das Escrituras Gregas Cristãs mu dimi dyê dya uvwalukilu, Bengali. Athu avulu asanguluka we kyoso kyatambula o Bibidya Tradução do Novo Mundo das Escrituras Gregas Cristãs mu dimi dyâ. Waxinganeka kya mu kikalakalu kyabhingi phala kulungulula ni kubhanga Bibidya?

Kyadyanga asola kibuka kya kulungulula ni kixikinisu kya Kibuka Kya Kusoneka kya Kibuka Kya Utuminu. Thembu kuxi yabhingi phala kulungulula o Bibidya? Phange Nicholas Ahladis, ukalakala mu Kibuka kya Sidivisu ya Kulungulula ku Warwick, Nova York, ujimbulula: “Ibhidi yavulu itena kumoneka, kala o numulu ya alunguludi andabhanga o kikalakalu kiki, se o dima dyabhebhuluka mba kana, o ima yejiya o atangi yalungu ni mwenyu wa athu m’ukulukulu, se o dimi dilunguluka mu mbanza yamukwa. Mu kidi, nange kubhinga muvu umoxi ndú mivu itatu phala kulungulula o mbandu ya Mikanda ya Ngeleku (Escrituras Gregas Cristãs). Phala kulungulula o Bibidya yamuvimba nange kubhinga mivu iwana mba isombokaku. Kunanga dingi thembu bengebenge mu dimi dya ijimbwete.”

Phala kulungulula o Bibidya, ki kubhingi ngó o kibuka kya alunguludi, kana. Kukala we kibuka kya atangi akanga, sayi bhabha, mu kibuka kiki mu kala we athu ajixi jengi, a exana phala kulola ni kutonginina o kikalakalu kya mulungulula. Ene abhanga kiki sé kukobhalala kitadi. O jindunge jâ jikwatekesa o alunguludi phala kulungulula o Bibidya mu ukexilu watokala, ibhebhuluka, itula we ku muxima. Kima kyambote kubhanga kiki, kala kyambe phange wene mulonga o ibuka ya alunguludi a Bibidya mu África do Sul, wixi: “O alunguludi ejiya kwila ene ala ni kikalakalu kya dikota, ene amesena kubhanga yoso phala Jihova ni phala yó atanga o Maka mê.”

Kyoso kyazubha kujilungulula, o ji Bibidya jibhinga kujimprimila ni ku jinkardenala. Phala kubhanga Bibidya, o jigrafika jibhinga dikwinyi dya ima, kala: Jipapela, tinda, adesivo, ngoji ya prateadu, ngoji ya kuxindila o jimbandu, cabeceado, o ima ikwatekesa o lombada, ima phala o kanga dya kapa, ima phala moxi dya kapa ni kima kikwatekesa kubunda o madivulu ni kapa. Ku muvu wa 2019, phala kubhanga ji Bibidya a ngastala 20 milhôes ya jidolale mba (13,018,780,000 a jikwanza) mu kusumba o ima yabhingi phala kubhanga o ji Bibidya. Hanji ku muvu wenyú, a ngastala 300.000 a ji ola ku jigrafika phala kubhanga ni kutumikisa o ji Bibidya.

Mukonda dyahi a ngastala thembu yavulu ni kitadi kyavulu mu kikalakalu kiki? Phange Joel Blue, ukalakala mu Departamento Internacional de Impressão, wambe kiki: “Mu madivulu oso utwene mubhanga, o Bibidya yene yabeta dingi kota. Kyenyiki, twamesena kwila yene ibhana kijingu kwa Nzambi utwene mu mubheza, ifumanesa we o njimbu itwene muboka.”

Katuku o ji Bibidya jene mubhanga phala kuboka ni kulonga, etu twene mubhanga we ji Bibidya phala yó ala ni kibhindamu kya dikota. Mu kifika, o Tradução do Novo Mundo mu dimi dya braille dyala kya mu dikwinyi dya madimi. Phala ku imprimila Bibidya imoxi mu dimi dya braille nange kubhinga dinake dya ji ola, dyala ni jivolume javulu, itena kutenesa 2,3 a jimetulu ku ditala. Sayi we Bibidya yakatunda phala kukalakala nayu mu jikaleya kene mu kwehela kubokonamu ji Bibidya jala ni jikapa ka kolo.

O Bibidya Tradução do Novo Mundo yene mukwatekesa kyavulu o mwenyu wa athu ene mu itanga. Mu kifika, tala yabhiti mu kilunga kya dimi dya kiluba mu dyembu dya Tombe, mu ixi ya República Democrática do Congo. Túnde ku Tombe ndú ku mbanza ya ixi kubhinga kwenda 1.700 ajikilometulu. Mu kilunga kiki, mwexile ngó Bibidya imoxi, yexile ni izwelu yokulu kyá. O Bibidya yiyi exile mu ibhana kujiphange phala ene atene kusokejeka o jimbandu jâ. Maji mu mbeji ya Kakwinyi ka muvu wa 2018, o Bibidya Tradução do Novo Mundo yatenena, a ibhana mu dimi dya kiluba, o jiphange joso mu kilunga atambula Bibidya ni izwelu yabhebhuluka ya izuwa ya lelu.

Yalungu ni Bibidya Tradução do Novo Mundo revisada mu dimi dya alemão, sayi phange yamuhatu wambe kiki: “Eme ki ngene muzwela dingi kwila eme ngabhingi kutanga o Bibidya. Kindala ngene muzwela: ‘ngamukingila ni hanji yoso o kithangana phala kutanga dingi bhofele!’” Sayi pelezu, wasoneka: “Eme ngatambula o Bibidya Tradução do Novo Mundo, o yene yamulungulula o mwenyu wami. Tunde ki ngamateka kutanga o Bibidya yiyi, nga mutena kutendela o Mak’â Nzambi, mukulu ndenge.Eme ngamesena kwijiya dingi yalungu ni Jimbangi ja Jihova ni ihi ingabhingi kubhanga phala kukituka Mbangi ya Jihova.”

O atangi oso a Bibidya Tradução do Novo Mundo asakidila kyavulu o kitadi kyene mu sangela phala kubhanga o Bibidya yiyi. O kitadi kiki ene mu kisangela phala o kikalakalalu ku mundu woso, bhukaxi ka maukexilu akusangela utusanga mu sayite donate.jw.org. Twasakidila o ukexilu wenu wakubhana.