Kukwatekesa o Jiphange Mukonda dya Uhaxi yú Wala ku Mundu Woso

Mu mbeji ya Katanu ka 2020, kyoso o Organização Mundial da Saúde kyazwela kwila o uhaxi wa COVID-19 wejisambukila kumundu woso, athu avulu kabanzele kwila o uhaxi yú weji nangenena hanji ku mundu né mwene mukubhita muvu umoxi. Mazunda ni mazunda a athu, kate mwene ni Jimbangi ja Jihova, amutala hadi mukonda dya uhaxi yú, kikale muxitu, mu ibanzelu ni mumaka alungu ni kitadi. Kyebhi o Jimbangi ja Jihova kyene mudisokejeka phala kukwatekesa o athu mu jithembu jiji jabonzo?

Kikwatekesu Phala yó Abhindamena

O Kibuka Kya Tufunga Ala Kupholo, kya Kibuka Kya Utuminu kya Jimbangi ja Jihova, kyasokejeka 950 a ibuka yakukwatekesa (CAH) ku mundu woso, mukonda dya uhaxi wa COVID-19. Sayi bhabha o ibuka yiyi yakwatekesa bhukaxi ka ima yabhana o jiphange, kumbandu yamukwa, o Jimbangi ja Jihova a akwatekesa kwala o jinguvulu. O Ibuka ya CAHs akwatekesa we kyavulu.

Mu kifika, xinganeka mu ima yabhiti ku Paraguai. Sayi jurnale yambe kwila, mukonda dya maka alungu ni kukamba kitadi kyabheka o uhaxi yú, “athu avulu akwa ixi ya Paraguai amubhita nzala ku mabhata mâ.” Maji o ibuka yakukwatekesa (CAH) yakexile kya muwanena makudya ejisoka phala semana imoxi, mu jikits jamakudya mwexile kudya, ima yakuzelesa ni ima yakudizelesa ku muthu, kit imoxi phala we mwiji umoxi wala ni kiwana kya athu. O kiti imoxi yate 30 ajidolale (19.269,72 ajikwanza).

Kyebhi o yó akalakala mu ibuka yakukwatekesa kyadilanga ni kulanga we akwâ mu uhaxi yú wa COVID-19? Ene akalakala ni jimaskara, adisandula we. Ene we atonginina se o matenda amubhanga o makudya, amubhanga mwene mu kididi kyazele, ni kwila se amudilanga we. Atonginina we se o yó amwabhana o jikit ja makudya, amwabhana mwene o itendelesu yalungu ni kuta o jimaskara, kudizinfetala ni kuzelesa o makalu mâ, ni kubhaka we o makudya mu ididi mwadizinfetala kya. Mu kusukaku, o jiphange awanena o makudya, kadizukama kyavulu ni akwâ, adisandula.

O Kitadi Kyene Musangela, Akingastala ni Unjimu

Mu mbeji ya Katatu ka 2021, O Kibuka Kya Tufunga Ala Kupholo, kyasolo kungastala 25 milhões ajidolale (18.130.879,548 ajikwanza) phala kukwatekesa o jiphange, mukonda dya uhaxi wa COVID-19. O jifiliyale ni ibuka ya CAH angastala o kitadi kiki kyasangela ni unjimu woso, abhange we nguzu yavulu phala kusumba ima mu ididi mwasosolola o pelesu. Mu kifika mu ixi ya Chile, o jiphange akalakala ku kibuka kyakukwatekesa, amesenene kusumba 750 ajikilu ya lentilhas. Maji mu mbeji imoxi, o pelesu ya lentilhas yabandele mu luyadi! O jiphange asolo kusumba o lentinhas mu pelesu yate mwene kalu, maji mu kubhita ola jiyadi, o musumbisi watangela kujiphange kwila sayi muthu wasumbile o jilentilha, wezu yu wavutula o ima yasumbile. Mukiki, muveji dya kusumbisa o lentilhas mu pelesu yatekalu, o musumbisi wasumbisa o lentilha kujiphange jetu mupelesu yokulu!

O kyoso o jiphange kyayi mutakana o jilentilhas, o mukwa kusumbisa kamesenene dingi kusumbisa ku jiphange, yu wamateka kutatela o jiphange kwila, exile muwanena kyayibha o makudya kala kyexile mubhanga o ibuka yamukwa. Sayi phange kyoso kyazubha kusamba ni lusolo mukaswekele, wazwela ku musumbisi kwila o ilunga yoso yadisokejeka kya phala kumona se nanyi wabhindamena kikwatekesu. O jiphange azwela we kwila o athu ejitambula o kikwatekesu, athu amaukexilu avulu mba ijila. Mukiki-phe ene ejisoneka o majina a athu mu jikaxa ja makudya mukubanza mu ibhindamu ya mwiji ni mwiji. Mukusuluka ene adyelelesa o musumbisi kwila o kitadi kyoso kisangela o athu ni ikalakalu yoso yene mubhanga o Jimbangi ja Jihova, a ibhanga muvondadi yâ. O musumbisi wadiwana ni ima yiyi, mwene we kaxikina ngo kusumbisa mu pelesu yoyo yasosoloka, maji wabhana we dingi 400 a jikilu ja lentilhas ku jiphange.

“KILONDEKESU KYA HENDA YAKIDI”

Lusu, mutudi wakuka kya, watungu mu ixi ya Lebéria ni kitanu kya a athu atokala ku mwiji wê. Sayi kizwa mukamene, kyoso kyakexile mu matala ni kutanga o kibatulu kya kizuwa, o mulawula wê wala ni 7 amivu, wamono kwila monzo semo dingi kudya. Mwene webhula: “Ihi itwandadya?” Lusu wamutangela kwila wasambele kya kwa Jihova mukubhinga kikwatekesu, wambe we kwila, mwene wadyelele ni kidi kyoso kwila Jihova weji kwabhana o ima yabhindamene. Mu kizuwa kyenyokyo, mungoloxi o tufunga twakilunga axindi kwa Lusu, amutangela phala kuya mutakana makudya. Mwene wambe: “O mulawulami wene muzwela kwila, kindala mwene wejiya kwila Jihova wivwa ni kutambwijila o misambu yetu, mukonda Jihova wene mutambwijila o misambu yami.”

Sayi muhatu mu ixi ya República Democrática do Congo, watungu kumbandu yamwiji ya Jimbangi ja Jihova. Mwene wamono o mwiji yú wa Jimbangi kutambula makudya bhumaku a jiphange jâ mu nzumbi, mwene wambe: “Kyoso kyandabhwa o uhaxi yú, etu twandakituka Jimbangi ja Jihova, mukonda ene alanga o jiphange jâ jamala ni ja ahatu mu ithangana yabhonzo.” O mwadi wê webhwidisa: “Eye wandakituka Mbangi ya Jihova mukonda ngó mwene dya saku imoxi yalwoso?” O muhatu watambwijila: “Ki kyene, maji o saku imoxi yiyi yalwoso, kilondekesu kya henda yakidi.”

O Jimbangi ja Jihova atena kudisokejeka ni lusolo phala kukwatekesa o jiphange jâ mu kithangana kya uhaxi, ni kikwatekesu kya kitadi kyene musangela o athu. Twasakidila kyavulu mu ima imwene musangela bhukaxi ka maukexilu akusangela, ala ku sayite donate.jw.org.