Divulu Dya Kudilonga Dyadifu Kyengi

Mu mbeji ya Katatu ka 2021, o Kibuka kya Utuminu kyabhange o ngolokela ya divulu dya ubhe ya kulonga o Bibidya, Sanguluka Katé Kuhádya ni Hádya!a Kyebhi kiwadivwile ni ngolokela yiyi? Manu Matthew, mukwa Canada wambe: “Eme ngasangulukile kyavulu! O kusanguluka kwami kwexile mudibandekesa kyoso kingexile mukwivwa o diskulusu ni kyoso o vidyu yexile mujimbulula se mukonda dyahi abhange o divulu didi ni kyebhi o aboki kyaditundu mukufikisa kukalakala nadyu mukuboka. Eme ngexile ni hanji yavulu yakumona o divulu didi ni kukalakala nadyu m’ukunji.”

O divulu Sanguluka Katé Kuhádya ni Hádya! dyala ni ukexilu wa ubhe wakulonga o Bibidya. Maji o ukexilu wa ubhe wakulonga kiwene ngó umubhangesa kuditungula mu madivulu akamukwa a kulonga. Se eye wakalakala nadyu kya watena kumona kwila o divulu didi dyadifu mwene kyengi. Phala kwijiya se mukonda dyahi dyene dyadifu kyengi, tudilonge dingi yalungu ni kyebhi kyabhange o divulu didi.

Divulu Dya Ubhe Kidyadifu

Difwe dyaneme. Mukonda dyahi kwabhingile kubhanga difwe dyaneme? O divulu Sanguluka Katé Kuhádya ni Hádya! dyala ni 600 a jifoto ndenge, kifwa, dikwinyi dya jiveji ndenge mukusokelesa ni jifoto jala mu divulu Ihi i Tu Longa o Bibidia! Mu divulu dya ubhe kala difwe mwala dingi jimbandu jazele—ibatulu ya Bibidya ni jifoto. O ima iyadi yiyi itena kukala kibhidi: Mukonda dya ukexilu wabhange o jiphaphela, eye utena kumona o jifoto jala kudima dya difwe. Phala kubatula o maka yá, o jiphange akalakala mu Departamento de Impressão Internacional (DII), ku Wallkill, Nova York, Estados Unidos, afikisa jiphaphela jiwana kijidifu jene mukalakala naju phala kubhanga o madivulu. O Kibuka kya Utuminu Kya ku Longa atonginina o mafwe oso, ya asolomu o difwe dya bhebhuluka dingi. Sumbala o difwe didi dyate dingi kalu yavulu, o mafwe utwene mubhanga nawu o madivulu metu ndenge, o difwe didi dyene mukwatekesa o dixibulu kutanga se kuthandanganya ni jifoto jala kudima dya difwe, mu divulu Sanguluka Katé Kuhádya ni Hádya!

Kapa yobhange mu ukexilu wengi. O kapa dya divulu dya ubhe kidyadifu ni jikapa jamadivulu metu jitwala naju mukonda dyene dyobhange mu ukexilu wengi. Akabhange ni iselekete yengi, ikwatekesa o kapa yiyi kukola ni kunangenena dingi. Yobhange mu ukexilu yú phala kukwatekesa kulanga o divulu né mwene mu kukalakala nadyu muveji javulu. O iselekete yabhange nayu o kapa ya divulu dya ubhe yate dingi kitadi kyavulu, o yene mubhanga naju o madivulu engi ndenge. Kyenyiki, o jifiliyale abhingile kukalakala kumoxi phala kangastale kitadi kyavulu.

Mukonda dyahi asolo o iselekete yiyi yate dingi kitadi kyavulu? O phange o ukalakala mu DIP wajimbulula: “Etu tukingila kuma o divulu didi dinanga kithangana kyasoko, kyenyikiphe, twamesena kwila dyene dikala hanji mwene kyambote né mwene se athu akalakala nadyu mu veji javulu.” Phange Eduardo, wala mu filiyale ya Brasil wambe: “Twasanguluka kyavulu mukumona kyebhi o kilunga kya Jihova kyene mukalakala ni unjimu ni kitadi kisangela o athu phala kubhanga nayu o madivulu a fwama.”

Kubhanga o Divulu mu Kithangana kya Dibhebhu dya COVID-19

Mu mbeji ya Katanu ka 2021 twamateka kubhanga o divulu Sanguluka Katé Kuhádya ni Hádya! Kiki kyabhiti mu kithangana kya dibhebhu dya COVID 19, kyatubhekela ibhidi yavulu. Mukonda dya Covid 19 o Betele a ijikile, o jiphange kejitena kwiza ku Betele phala kukwatekesa, mba né mwene kwixana jiphange phala kukala ku Betele. Mukonda dya kiki, sayi jimakina kijexile ni athu asoko phala kukalakala naju, ni kwila o jimakina jamukwa twabhingile kujijika mukonda dya ifidisu ya jinguvulu.

Kyebhi kitwatolola o kibhidi kiki? Kyoso o jimakina jiji kijamateka kukalakala, exana jiphange jatokala mukibuka kyengi ku Betele phala kukwatekesa kubhanga madivulu. Phange Joel ukalakala mu DII wambe: “O ukexilu wâ wakudibhakula wa jiphange ni kukala polondo phala kudilonga ima ya ubhe yakwatekesa phala kubhanga o kikalakalu kiki.”

Sumbala ni ibhidi, etu twabhange kyá mazunda ni mazunda a madivulu Sanguluka Katé Kuhádya ni Hádya! Phala kubhanga o divulu didi, kwabhingile ima yavulu kala jitinta, jiphaphela ni ima yakamukwa. Mu mbeji jitanu, twangastala 2.300.000 ajidolare (1.034.608.310 ajikwanza) ndenge, mukusumba ngó o ima phala kubhanga o madivulu. Phala kuphopheka o kitadi, etu twabhingile kubhanga ngó o madivulu abhindamena o ilunga kindala.

“Kiki Kikalakalu Kya Uhete”

Kyebhi o alongexi ni maxibulu kya divu ni divulu dya ubhe dya kudilonga? Phange Paul, muboki ku Austrália, wambe: “O divulu Sanguluka Katé Kuhádya ni Hádya! ngawabhela kyavulu kukalakala ni divulu didi, mukonda kingisangulukisa kyavulu kulongamu dixibulu. O divulu didi dyafwama kyavulu, dibhenya we. O milongi yalamu yabhebhuluka, mwala ibhwidisu ibhangesa o dixibulu kuzwela kyebhi kyamudivwa, jividyu, jifoto, ni jimbambe phala o dixibulu. Kiki kikalakalu kya uhete, kingibhangesa kubandekesa o uhete wami wakulonga.”

O dixibulu dya Bibidya watungu mu ixi ya Estados Unidos wambe: “Ngawabhela kyavulu o divulu didi. O jifoto jalamu jingikwatekesa kutendela o jipondo jabetakota. O jividyu jingitula mwene kumuxima, jingibhangesa kukumbidila o ima ingamudilonga.” O dixibulu didi udilonga luyadi mu semana ni kuya mu yônge yoso.

Kwakambe hanji mazunda ni mazunda a madivulu Sanguluka Katé Kuhádya ni Hádya! phala kujibhanga mu madimi avulu. Mufika, o Kibuka kya Utuminu kyaxikina kubhanga o divulu Sanguluka Katé Kuhádya ni Hádya! mu 710 a madimi. Maji o divulu Ihi i Tu Longa o Bibidia! adibhangele ngó mu 370 a madimi.

Kwebhi kutukatula o kitadi phala kubhanga o madivulu yá? O kitadi kyene musangela o athu kumundu woso bhukaxi ka, donate.jw.org. Tusakidila kyavulu o ukexilu wé wakubhana phala kubhanga o madivulu yá akudilonga phala yó amesena kudilonga yalungu ni Jihova, ni ku ‘sanguluka katé kuhádya!’—Jisálamu 22:26.