Kya Lumingu, 27 ka Kavwa
Phala atene kuswinisa. . . ni kubazela. —Tit. 1:9.
Phala kukituka diyala dyakulu mu nzumbi, eye watokala kukala ni mauhete. O mauhete ya andakukwatekesa kuxikina ni kubhanga ikalakalu mu kilunga, kusanga salu phala kulanga o ibhindamu ye mba ya mwiji we, ni kukala ni ukamba wambote ni akwenu. Mu kifika, dilonge kutanga ni kusoneka kyambote. O Bibidya izwela kwila wazediwa o muthu ukatula kithangana izuwa yoso phala kutanga ni kuxinganeka mu Mak’a Nzambi. (Jisá. 1:1-3) Mu kutanga o Bibidya izuwa yoso, mwene wandakwijiya o ukexilu wa Jihova wa kuxinganeka. Kiki kyandamukwatekesa kuxinganeka kyambote ni kudilonga kukumbidila o itumu ya Nzambi. (Jisa. 1:3, 4) O jiphange jetu abhindamena mayala atena kulonga ni kubhana itendelesu bhukaxi ka Bibidya. Se wijiya kutanga ni kusoneka kyambote, wandatena kupelepalala madiskulusu ni itambwijilu ibhekela mbote ku akwenu ni kuswinisa o kixikanu kya. Wandatena we kusoneka o mbote i ukatula, o kiki kyandakukwatekesa kukolesa o kixikanu kye ni kuswinisa akwenu. w23.12 26-27 §9-11
Kya Sekunda, 28 ka Kavwa
O yó wala kumoxi ni enu wabetakota, o wala kumoxi ni mundu ndenge. —1 Nzwá 4:4.
Kyoso ki ukala ni woma, xinganeka mu ima yandabhanga Jihova ku hadya. Xinganeka kyebhi kiwanda divwa kyoso Satanaji kanda kalaku dingi. Mu kyonge kyadikota kya muvu wa 2014, abhangemu kifika kyalondekesa tata wexile muzwela ni mwiji we se kyebhi kyejikala o dilombolwelu dya divulu dya 2 Timote 3:1-5, se muveji dya kuzwela yalungu ni ukexilu wayibha wa athu mu izuwa yasukidilaku, dyejizwela yalungu ni ukexilu wa athu mu Palayizu. Mwene wambe: “Ku mundu wa ubhe, kwanda kala kusanguluka kwavulu. Mukonda o athu anda zola akwa, anda zola o ima ya nzumbi, anda lenduka, anda ximana Nzambi, anda belesela tata ni mama, anda kala akwa kusakidila, anda kala jifiyele, anda kala ni henda ya miji yâ, anda kumbidila o ima yabakana, anda zwela jinga ima yambote yalungu ni akwa, anda ditumina jihanji, anda kala athu a batama mixima, anda wabhela kubhanga o mbote, anda kala athu a kidi, anda kala athu ambote, anda ditulula, anda kala azodi a Nzambi kana a jivondadi jâ, anda xila Nzambi ni muxima woso; kala jinga ni athu a kala kiki.” O kwila eye wene muzwela ni mwiji we mba jiphange mu nzumbi, yalungu ni kyebhi kyanda kala o mwenyu ku mundu wa ubhe? w24.01 6 §13-14
Kya Telesa, 29 ka Kavwa
Eme nga kuxikina. —Luk. 3:22.
Kimakima kyambote kwijiya kwila Jihova uxikina o mundu wê woso kala kibuka! O Bibidya yamba: “Jihova u sanzuka ni mundu wê.” (Jisá. 149:4) Maji sayi bhabha, amoxi mukonda dya kuluwala adibhwidisa: ‘O kwila Jihova ungixikina?’ Jiselevende javulu ja Jihova otumbule mu Bibidya, mukonda dya kuluwala sayi bhabha exile we ni phata se Jihova wa axikinine.(1 Sam. 1:6-10; Jobe 29:2, 4; Jisá. 51:11) O Bibidya ilonga kwila o athu akwa ituxi atena ku axikina kwa Jihova Nzambi. Kyebhi? Mu kukala ni kixikanu kwa Jezú Kidistu ni kwabatizala. (Nzw. 3:16) Mu kubhanga kiki tulondekesa ku athu kwila twadyela o ituxi yetu ni kwila twakanena kwa Nzambi kubhanga o vondadi yê. (Ika. 2:38; 3:19) Jihova usanguluka kyavulu kyoso kitubhanga o ima yiyi phala kukala ni ukamba ni mwene. Se tubhanga yoso phala kukumbidila o kikanenu kyetu, Jihova wandatuxikina ni kutumona kala tu makamba mê.—Jisá. 25:14. w24.03 26 §1-2