Matendelelu

1 Mozé wazwelela o mundu woso wa Izalayele ku mbandu ya Njolodá, mu kikangalakata kyalulama ni Sufe, bhwazukama* ni Palane, Tofele, Labanu, Hazelote ni Dizahaba. 2 (Tunde ku Holebe kate ku Kadexi-balaneya mu njila ibhitila ku milundu ya Seyile, kubhinga kwenda dikwinyi ni umoxi dya izuwa.) 3 Kwabhitile kya makwinyi awana a mivu tunde akwa Izalayele kyatundu ku Ijitu. Mu kizuwa kya dyanga kya mbeji ya dikwinyi ni kamoxi, Mozé watangela akwa Izalayele* yoso yatendelesa Jihova phala ku atangela. 4 Kiki kyabhiti kyoso kyatolola Sihone sobha ya akwa Mamodi watungile ku Hexebone ni kyoso kyatolola Hoke sobha ya Basane ku Edileyi, watungile ku Axitalote. 5 Mozé wamateka kujimbulula o kijila kiki, ku mbandu ya Njolodá mu ixi ya Mowabe, wixi:

6 “Ku Holebe Jihova Nzambi yetu watwambela kiki: ‘Mwabhiti kya ithangana yavulu ku mbandu yiyi ya milundu. 7 Disokejekyenu, muye ku mbandu ya milundu ya akwa Mamodi kwalungila o azukami’â* oso, ku Halabá ku mbandu ya milundu, ku Sefelá, ku Nengebe ku ndundu ya musanza wa kalunga, ku ixi ya akwa Kanana ni ku Libanu,* kate ku ngiji yadikota, o ngiji ya Ewufalate. 8 Talesenu, nga mu mibhana o ixi yiyi. Bokonenu ni mutambule o ixi yakanena Jihova kubhana ku jitata jenu, Mbalahamu, Izake ni Jakobo ni ku mbutu yâ.’

9 “Mu kithangana kyenyokyo, nga mitangela: ‘Kingitena kumyambata ubheka wami. 10 Jihova Nzambi yetu wa misokolola, lelu enu mwavulu kala o jithéthembwa ku dyulu. 11 Jihova Nzambi ya jikuku jetu a misokolole mu midi ya jiveji, kimwal’iki ndenge, a mibesowale kala kya mikanena. 12 Kyebhi ki ngitena kwambata ubheka wami o muhamba woso yú waneme? Kyebhi ki nganda dibhana ni kuzoka kwenu? 13 Mwaxaxi ka miji yenu, solenu-bhu mayala ala ni unjimu, ala ni kilunji, ala ni uhete. Nganda ku asola n’akale atwameni enu.’ 14 Enu mwa ngitambwijila, mwixi: ‘Kima kyambote kubhanga i wa tutangela.’ 15 Mukyenyiki, ngasolo o atwameni a miji yenu, mayala ala ni unjimu, ala ni uhete, éme nga abhana o kikalakalu mwaxaxi kenu kya kukala atwameni a midi, atwameni a hama, atwameni a makwinyi atanu, atwameni a dikwinyi ni jikabhitangu ja miji.

16 “Mu kithangana kyenyokyo, ngatendelesa o afundixi enu, ngixi: ‘Kyoso ki mwivwa maka amoneka bhukaxi ka jiphange jenu, mwatokala kufundisa ni kuyuka o dimanda dimoneka bhukaxi ka diyala ni phang’yê mba mukwa ixi yengi watungu mwaxaxi kenu. 17 Mu kubatula dimanda, kanenu kufundisa ni katombo. O ukexilu u mwivwa o ngadyama, wene we u mwivwa-nawu o mvwama. Kimukale ni wôma wa athu, mukonda o kufundisa kwatokala kwa Nzambi. Se maka mu amona kwila abhonzo kyavulu, mu ngibhekela-nawu ni nga evwe.’ 18 Mu kithangana kyenyokyo, nga mitendelesa yoso i mwatokalele kubhanga.

19 “Twatundu-phe ku Holebe, étu twabhiti mu kikangalakata kyoso kyonene, kikwatesa wôma ki mwamono mu njila iya ku mbandu ya milundu ya akwa Mamodi, kala kyatutumine Jihova, Nzambi yetu. Ku disukilu, twabhixila ku Kadexi-balaneya. 20 Eme-phe nga mitangela ngixi: ‘Mwabhixila ku mbandu ya milundu ya akwa Mamodi, yanda tubhana Jihova Nzambi yetu. 21 Talesenu, Jihova Nzambi yenu wa mibhana o ixi. Bandenu mu itambule kala kyambele Jihova, Nzambi ya jikuku jetu. Kimukale ni wôma, ki mu tandanganye.’

22 “Maji, enu mwangisange, enu mwambe, mwixi: ‘Tutumikise mayala ku pholo alonde o ixi n’a tutangele yalungu ni njila itwanda ditela ni kyebhi kyala o jimbanza jitwanda sanga.’ 23 O ndunge yiyi nga imono kwila yawabha. Kyene kya ngibhangesa kusola dikwinyi ni kiyadi kya mayala bhukaxi kenu, kala mwiji diyala dimoxi. 24 Ene ayi, abande kate ku mbandu ya milundu, abhixila mu honga ya Exikole, ya alondo o ixi. 25 Akanze-ku we ibundu ya ixi, ya eza-nayu. Abheka we njimbu yambe: ‘O ixi ya mutubhana Jihova Nzambi yetu, yawabha mwene.’ 26 Maji enu mwaditunu kubanda-ku, enu mwabhukumukina o kitumu kya Jihova Nzambi yenu. 27 Mwexile mudikalanganza mu jibalaka jenu mwixi: ‘Jihova watuzembe, kyene kya tukatwila mu ixi ya Ijitu phala kutubhakula ku akwa Mamodi ni kutubwikisa. 28 Twanda ditela-phe kwebhi? O jiphange jetu atubotomokesa o mixima, mu kwamba: “Ene abeta-kota mu nguzu ni mu kulebha, etu ndenge, o jimbanza jâ jamakota, jala ni ilumbu ibhixila ku dyulu.* Twamono-ku we o akwa Anake.’”

29 “Kyenyiki, eme ngamyambela: ‘Kimutandanganye, kimwakwatele wôma. 30 Jihova Nzambi yetu wanda tutwamenena, wanda bhânga bhu kididi kyetu kala kyabhangele ku Ijitu, enu mwakimono ni mesu menu. 31 O mu kikangalakata enu mwamono we ni mesu enu, kyebhi Jihova Nzambi yetu kyamilange kala o tata kyalanga mon’ê, mu ididi yoso mu mwexile muditela kate ki mwabhixila bhu kididi kiki.’ 32 Maji né mwene ni ima yoso yiyi, mwalembwa kukala ni kixikanu kwa Jihova Nzambi yetu, 33 wexile mumitwamenena mu njila phala ku misotela kididi kya kutudila. Mu usuku wexile mumonekena mu túbhya, o mu mwanya mu dituta phala ku milondekesa o njila i mwatokalele kuditela.

34 “Mu kithangana kyoso kiki, Jihova wexile mu kwivwa i mwexile muzwela. Kyenyiki, mwene waluwala kyavulu anga uloka, wixi: 35 Ku mwiji yú wayibha séku muthu wanda mona o ixi yambote i ngakanena kubhana ku jitata jenu, 36 kikale ngo Kalebe mon’a Jefune. Mwene wanda imona. O ixi mwayile, nganda ibhana kwa mwene ni ku an’ê mukonda, wa ngibelesela éme ngi Jihova ni muxima woso. 37 (Mukonda dyenu, Jihova waluwala n’eme, yu wambe: “Eye we kwanda bokona-mu. 38 Jozuwé mon’a Nune selevende* yé mwéne wanda bokona mu ixi. Muswinise,* mukonda mwéne wanda bhangesa Izalayele ku ilundula.”) 39 O tumbonga twenu tumwambe kwila eji kwa ambata ku jinguma ni an’enu akambe kwijiya kyawabha ni kyayibha, éne anda bokona-mu, nganda ku abhana o ixi kala undundu. 40 Enu-phe lungulukenu ni muye mu kikangalakata mu njila ya Kalunga Kakusuka.’

41 “Enu mwangambela: ‘Twate kituxi kwa Jihova. Kindala, twanda banda phala kubhânga kala kyatutendelesa Jihova Nzambi yetu!’ Mukiki kala muthu wakwata o sosa ni jibhata yê, mu kubanza kwila kikweji bhonza kubanda ku mbandu a milundu. 42 Maji Jihova wa ngambela: ‘Wa atangela kiki: “Kimubande-ku, kanenu we kubhânga, mukonda kinganda kala n’enu. Se muya, jinguma jenu janda mitolola.”’ 43 Eme ngazwela n’enu, maji kimungivu. Muveji dya kiki, mwabhukumukina o kitumu kya Jihova. Mu kukaka kwenu, mwasoto kubanda mwene kate ku mbandu a milundu. 44 Kyenyiki, o akwa Mamodi atungile mu mbandu yenyoyo, ayi mumisanga ya a mikaye kala kibhanga o jinyuki, a mibhangesa kulengela ku Seyile kate ku Holoma. 45 Mwavutuka-phe, enu mwamateka kudidila bhu pholo ya Jihova, maji Jihova kamivu, kamisuwu we. 46 Kiki kyene kya mibhangesa kukala izuwa yavulu ku Kadexi.