Matendelelu
21 “Se asanga muthu wafwila mu mukáwu mu ixi ya mu mibhana Jihova Nzambi yenu kala undundu, maji kimwejiya nanyi wa mujibha, 2 o adyakime ni afundixi atokala kuzonga o dikanga, tunde bhwala o kimbi kate mu jimbanza jazukama. 3 Kyenyiki, o adyakime azukama dingi bhwa sange o kimbi, atokala kukwata kangombe kamukaji mu kibhanga, kabhangena-ku luwa ikalakalalu, kikambata we luwa imbamba,* 4 o adyakime a mbanza yenyoyo, atokala kwambata o kangombe kamukaji mu honga mu kunguluka o menya, honga ka idimi luwa né kukuna-mu jimbutu, ene atokala kubula o dikoxi dya kangombe mu honga mwenyomo.
5 “O akunji atokala ku Jilevita anda zukama, mukonda Jihova Nzambi yenu, wa asolo phala ku musidivila, phala kubhana dibesá mu dijina dya Jihova. Éne anda zwela kyebhi kyatokala kubatula o maka oso alungu ni ujibhangânga. 6 Mukyenyiki, o adyakime oso a mbanza yazukama dingi bhwexile o kimbi, atokala kusukula o maku mâ ku thandu a kangombe kabulu o dikoxi mu honga, 7 ni kwamba: ‘O maku metu k’ene azunzumuna o manyinga yá, o mesu metu kamono we kyoso kya azunzumuna. 8 Éye u Jihova, loloka o mundu wé Izalayele u wabhulula mu ixi ya Ijitu. Kana kwehela o mundu wé akwa Izalayele, kukala ni kikuma kya kufwa kwa muthu wa kambe o kikuma.’ Kyenyiki, ene kanda kala ni kikuma kya manyinga. 9 Mukubhanga kiki, mwanda zubha o kikuma kya manyinga bhukaxi kenu, mukubhanga o ima yafwama ku mesu a Jihova.
10 “Se muya mulwa ita ni jinguma jenu, o Jihova Nzambi yenu anga u mitolwela-nawu, anga mwambata-ku amoxi phala ku akwika, 11 umoxi mudyenu umona-ku muhatu wawabha o pholo anga u muzola, hé umesena kusakana-nê, 12 mwene utena-phe ku mwambata kubhata dyê. O muhatu watokala kubhuta o ndemba ya mútwe, kusesa o yala, 13 kuzula o izwatu ya mukwika-nayu ni kukala ku bhata dyê. O muhatu wanda dila o thambi ya tat’ê ni man’yâ mu mbeji ya muvimba, ku disukilu, mwene wanda tena kuzeka-nê. O diyala wanda kala mwadi wê, mwene wanda kala muhatu wê. 14 Maji se kamuwabhela dingi, a mwehele kuya kwoso-kwoso kwamesena. Kuma wa mujijidika kusakana-nê, katokala ku musumbisa, katokala ku mutalatala kyayibha.
15 “Se kukala diyala disakana ahatu ayadi, mwene anga uzola dingi umoxi, o mukwa ndenge, o ahatu ayadi a muvwalela an’a mala, o mona wa phande-kumbi ukala wa yó kamuzolo kyavulu, 16 mu kizuwa kyanda wanena o undundu ku twana twê, o diyala katokala kutambula o undundu wa mona a muvwala ku muhatu kamuzolo kyavulu, n’a ubhana ku mona wa muvwala ni muhatu wa muzolo dingi, mukonda mwéne o phande-kumbi. 17 Mwene watokala kubhana o ujitu wa phande-kumbi ku mona wa muvwala ni muhatu ka muzolo kyavulu. Ku yoso yala nayu, watokala ku mubhana dingi o ana amukwa ndenge, mukonda mwéne mon’ê wadyanga. O ujitu wa phande-kumbi wa mutokala.
18 “Se diyala dikala ni mona wabhukumuka, wahuku, uxibhaka tata ni mama, ene anga a mubazela maji o mona kabelesela, 19 o tat’ê ni man’yâ atokala ku mwambata ku adyakime bhu mwelu wa mbanza, 20 ni kwambela adyakime a mbanza: ‘Mon’etu yú wabhukumuka, wahuku, kene we mutubelesela. Udya kyavulu, holwa.’ 21 Mukyenyiki, mayala oso a mbanza atokala ku mububa ni matadi kate kyanda fwa. Mu kubhanga kiki, o kuyibha bhukaxi kenu kwanda bhwa. O akwa Izalayele oso anda kwivwa o maka yá, anda kala ni wôma.
22 “Se diyala a mujibha mukonda dya kuta kituxi, o kimbi anga a kinyenga ku muxi, 23 o kimbi kikyatokala kubhita o usuku woso ku muxi. Mwatokala ku mufunda mu kizuwa kyenyokyo, mukonda woso a munyenga ku muxi a mu bhubhidila kwa Nzambi. Kimwatokala kukasanesa o ixi ya mu mibhana Jihova Nzambi yenu kala undundu.