Matendelelu
33 Ande dya kufwa, Mozé o selevende ya Nzambi yakidi, wabesowala akwa Izalayele. 2 Mwene wambe:
“Jihova watundu ku Sinayi,
Mwene wa amwikina tunde ku Seyile.
O fuma ni kubhenya kwê, kwadimonekena tunde ku mbandu ya milundu ya Palane,
Makwinyi a jimidi ja jianju jexile-nê,
O ku mbandu yê ya kadilu, kwexile o mazonda mê.
3 Nzambi wazolo o mundu wê,
Athu oso akôla, ala bhu maku mê.
Ene axikamene bhu mbandu a inama yê,
Amateka kwivwa o izwelu yê.
4 (Mozé watubhana kitumu, watubhana kijila,
Kala undundu phala o mundu wa* Jakobo.)
5 Mwene wakituka sobha ku Jesulume,*
Kyoso o atwameni a mundu kyadibhongolola,
Kumoxi ni miji yoso ya Izalayele.
6 Lubene akole mwenyu,
O mbutu yê idisokolole.”
7 Mozé wabesowala Judá ni izwelu yiyi:
“Ngana Jihova! Ivwa o musambu wa Judá,
Mubheke dingi ku mundu wê.
Judá wazokela o ima yamutokala ni kutena kwê,
Mukwatekese kubhânga ni jinguma jê.”
8 Yalungu ni Levi, Mozé wambe:
“O Tumini ni Udimi yê, yatokala ku muthu wa kulondekesa ufiyele,
Yó wa mupolovala ku Masahe.
Wamateka kuzoka-nê bhu mbandu a menya a Mediba,
9 O muthu wambela tat’ê ni mam’ê, wixi: ‘Ki nga asuwu.’
Mwene kejiya o jiphange jê,
Kabhana valolo ku an’ê.
Kuma akumbidila o kizwelu kyê,
Ya abelesela o kitumu kyê.
10 Ene alonge Jakobo ni jingonge jé,
Izalayele a mulonge ni Kijila kyé.
A kubhakwile wasu wa dizumba dyambote,
Ni sata yatenena ku kalatódyu ké.
11 Jihova tata! Mubesowale, mubhane nguzu,
O ikalakalu ya maku mê, ikusangulukise.
Bukujula o inama* ya yó asota kubhânga-nê,
Phala o athu amuzembe kabhânge-nê dingi.”
12 Yalungu ni Bejamí mwene wambe:
“O yó a muzolo kwa Jihova atunge ni kukondama bhu mbandu yê,
Kyoso kyaya ni ku mulanga kizuwa kyoso kya muvimba,
Mwene wanda butamena bhu isuxi yé.”
13 Yalungu ni Zuze, Mozé wambe:
“Jihova abesowale o ixi yé,
Ni ima yambote itunda ku dyulu,
Ni dimume ni menya a jifixi atunda koxi a mavu,
14 Ni ima yambote ikula mukonda dya mwanya,
Ni idima yambote ya mbeji ni mbeji,
15 Ni ima yambote itunda ku milundu yokulu,*
Ni ima yabetakota ya milundu yakalelaku,
16 Ni ima yoso yambote ya ixi ni idima yé yoso,
Ni dibesá dya Yó wamoneka mu kisasa.
Mabesá oso yá, eze ku thandu a mútwe wa Zuze,
Kyene, ku thandu a mútwe wa yó a musolo mwaxaxi ka jiphange jê.
17 O nguzu yê yedi kala ya mon’a ngombe adyanga o ku muvwala,
O jingela jê, jingela ja phakasa.
Wanda kwama-naju ifuxi,
Ifuxi yoso bhwamoxi, kate ku maxokololo a ixi.
Éne o makwinyi a jimidi ja Efalayíme,
Ni jimidi ja Manasa.”
18 Yalungu ni Nzebulone, Mozé wambe:
“Sanguluka éye Nzebulone, mu ikalakalu yé.
Éye Isakale, sanguluka mu jibalaka jé.
19 Ene anda bhongolola athu ku mulundu.
Kwenyoko anda bhakula-ku jisata mu ukexilu wayuka.
Mukonda anda katula nzungule dya jimbote ku musanza wa kalunga,
Ni jimbote josweke mu museke.”
20 Yalungu ni Ngade, Mozé wambe:
“Atane-ku yó usanzumuna o mbambe ya Ngade.
Mwene uzeka kala hoji,
Yamesena kudya o lukwaku, kyene, o mútwe wa kyama kyanda kwata.
21 Wanda sola o mbandu ya dyanga phala mwene,
Mwene wanda kala o mbandu yatokala kwa yó ubhana o kijila.
O atwameni a miji anda dibhongolola.
Mwene wanda fundisa ni kuyuka mu dijina dya Jihova,
Ni jingonge jê phala akwa Izalayele.
22 Yalungu ni Dane, Mozé wambe:
“Dane mon’a hoji.
Mwene wanda lwa ita tunde ku Basane.”
23 Yalungu ni Nafitali mwene, wambe:
“Nafitali wasanguluka,
Wezala ni mabesá a Jihova,
Utambula o mbandu ya ixi ku tundila o dikumbi ni ku lwiji.”
24 Yalungu ni Azele, Mozé wambe:
“Nzambi wabesowala Azele ni ana avulu.
A muximane ku jiphange jê,
Abonde* o inama yê mu máji.
25 O jiphapha ja mabhitu mê ja felu ni ngondo,
Wanda tunga ni kukondama izuwa yoso ya mwenyu wê.
26 Séku muthu wasokela ni Nzambi ya Jesulume,
U kukwatekesa tunde ku dyulu,
Yó waxikama ku matuta ni unene wê.
27 Nzambi dilengelu tunde mu izuwa ya xahulu,
Mwene wanda kukwatekesa, wanda kulanga kate ku hádya ni hádya.
Mwene wanda kukwatekesa kutolola o jinguma jé,
Ni kwamba: ‘Bwikisawu!’
28 Izalayele wanda tunga ni kukondama,
O mbutu ya Jakobo anda tunga ubheka wâ,
Mu ixi mwala kudya* ni vinyu ya ubhe,
Ku dyulu kwanda lawuka mbundu anga mukala dimume.
29 Eye wazediwa Izalayele!
Nanyi wasokela n’eye?
Kifuxi kyobhulule kwa Jihova,
Mwene o ngubu i kufikidila,
Mwene we o xibhata yé yonene.
O jinguma jé janda dikoteka ni wôma bhu pholo yé,
Eye wanda titidila o makunda* mâ.”