Dya Kayadi Dya Malunda
29 Ezekiya wexile ni makwinyi ayadi ni kitanu kya mivu kyoso kya kituka sobha, yu watumina mu makwinyi ayadi ni divwa dya mivu mu Jeluzaleme. O dijina dya manyâ dyexile Abiya mon’a Zakadiya. 2 Mwene wexile mubhanga ima ya wabhela Jihova, kala kyabhangele kukwê Davidi. 3 Ku muvu wa dyanga wa utuminu wê, ku mbeji ya dyanga, mwene wajikula o mabhitu a inzo ya Jihova yu wa ayudika. 4 Kyenyiki, mwene wongeka o akunji ni Jilevita bhu kididi bhwene mubhongolokela athu avulu, ku mbandu kutundila o dikumbi. 5 Mwene wa ambela, wixi: “Ngivwenu, enu mu mwiji wa Levi. Dizelesyenu kindala, zelesenu o inzo ya Jihova, o Nzambi ya jikuku jenu, katulenu o ima yoso yakasana mu kididi kikôla. 6 Mukonda o jitata jetu atondala, abhange ima yayibhila Jihova Nzambi yetu. Ene a muxisa, kaxila o balaka ya Jihova, a mubhana dikunda. 7 Ajika we o mabhitu exile mu dibokwenu dya mbalanda ya tembulu, ya ajimi o tundeya. Eha o kwoha o wasu wa dizumba ni kubhakula jisata ja kwoha kwa Nzambi ya Izalayele bhu kididi kikôla. 8 Kyenyiki, Jihova wakwatela njinda yavulu ku akwa Judá ni ku akwa Jeluzaleme, yu wa abhekela wíndwa phala woso wívwa mba umona o ima yiyi, adiwane ni ku asebhulula* kala ki mwa mutala ni mesu menu. 9 Kyenyiki, o jikuku jetu a ajibha ni xibhata, o an’etu a ahatu ni an’etu a mala ni ahatu etu, a ambata ku ubhika mukonda dya ima yiyi. 10 Mukonda dya kiki, ngamesena kyavulu kuta kikutu ni Jihova, o Nzambi ya Izalayele, phala o njinda yê itunde ku thandu dyetu. 11 Ana’mi tata! Kindala ki kithangana kya kukala ni usudi,* mukonda Jihova wa misolo ni mukale bhu pholo yê, phala ku musidivila ni kwoha o jisata jê.”
12 Kyenyiki, o Jilevita jamateka kukalakala, enya: Ku akwa Kohate: Mahate mon’a Amazayi ni Jowele mon’a Azadiya. Ku akwa Meladi: Kiji mon’a Abidi ni Azadiya mon’a Jehalele. Ku akwa Ngelexone, Jowa mon’a Zima ni Edene mon’a Jowa. 13 Ku an’a Elizafane, enya: Nzidi ni Jeyele; ku an’a Azafe, Zakadiya ni Mataniya. 14 Ku an’a Hemane, Jiyele ni Ximeyi. Ku an’a Jedutune, Semaya ni Uziyele. 15 Ene ongeka o jiphange jâ, adizelesa, ya ayi muzelesa we o inzo ya Jihova, kala kyatumine o sobha mu kukumbidila o izwelu ya Jihova. 16 Kyenyiki-phe, o akunji abokona mu inzo ya Jihova phala ku izelesa. Akatula o ima yoso yakasana yasange mu tembulu ya Jihova, a yambata mu kithádi kya inzo ya Jihova. O Jilevita akwata ku imbamba yenyiyi a yambata mu honga ya Kidelone. 17 Kyenyiki, amateka kuzelesa o tembulu mu kizuwa kya dyanga kya mbeji ya dyanga, anga abhixila mu mbalanda ya tembulu ya Jihova mu kizuwa kya dinake kya mbeji yenyoyo. Ene azelesa o inzo ya Jihova mu dinake dya izuwa, azubha ku izelesa mu kizuwa kya dikwinyi ni samanu kya mbeji ya dyanga.
18 Ene anga ayi kwa sobha Ezekiya, ya a mwambela: “O inzo yoso ya Jihova twa izelesa kya, twazelesa we o kalatódyu ka jisata ja kwoha ni ima yoso yala ku kalatódyu ni meza a jimbolo ni ima yoso yala-ku. 19 O ima yoso yatexile sobha Akaji bhu kanga, mu kutondala kwê, kyoso kyakexile mutumina, twa isokejeka we ni ku izelesa. Yene yala bhu pholo ya kalatódyu ka Jihova.”
20 Sobha Ezekiya wabalumuka mu kamene-mene kaselu, wexana o ilamba ya mbanza, ene abande kumoxi mu inzo ya Jihova. 21 Ene abheka sambwadi dya twana twa jingombe ni sambwadi dya ilumbe* ya jimbudi ni sambwadi dya tumbudi twa ndumbe ni sambwadi dya isutu ya jihombo, a jibhakula kala sata ya ituxi phala o mbote ya athu oso mu utuminu ni mbote ya kididi kikôla ni ya mundu wa Judá. Kyenyiki, mwene watumina o akunji, o mbutu ya Alá, kubhakula o jisata jenyiji ku kalatódyu ka Jihova. 22 Ene anga ajibha o jingombe, o manyinga mê, a anyakena* ku thandu a kalatódyu. Ajibha we o ilumbe ya jimbudi, o manyinga a anyakena ku thandu a kalatódyu. Mukusuluka, ene ajibha o tumbudi twa ndumbe, o manyinga a anyakena ku thandu a kalatódyu. 23 Abheka o isutu ya jihombo phala o sata ya ituxi bhu pholo ya sobha ni ya mundu, ya ate o maku mâ ku thandu a sata. 24 O akunji ajibha o ibhaku. Abhakula o sata ya ituxi ni manyinga a ibhaku, mu kalatódyu, phala kuloloka o ituxi ya Izalayele, mukonda o sobha wambele kwila, o sata ya kwoha ni sata ya ituxi, atokalele ku ibhakula phala o mbote ya mundu woso wa Izalayele.
25 Mwene watumu o Jilevita kukala mu ididi yâ mu inzo ya Jihova ni kukwata o tumbánza ni jingoji ni misaxi, kala kyatendelesele Davidi ni Ngade, o mukwa kulombolola o isumwa ya sobha ni polofeta Natane. Mukonda kyene kyatendelesele Jihova ku jipolofeta jê. 26 Kyenyiki, o Jilevita jemanene ni iselekete ya kwimba ya Davidi. O akunji exile ni jikoloneta.
27 Mukusuluka, Ezekiya watumu kwoha o jisata bhu kalatódyu. Kyoso kyamateka kubhakula o jisata ja kwoha, amateka we kwimbila Jihova ni kuxika o jikoloneta ni iselekete ya Davidi, sobha ya Izalayele. 28 O mundu woso wexile mufukama kyoso o akunji ni Jilevita kyakexile mu kwimba ni kuxika o jikoloneta. Ene asuluka ni kubhanga kiki kate kyazubha kubhakula o jisata ja kwoha. 29 Kyoso kyazubha kubhakula o jisata, o sobha ni yó exile-nê kumoxi, afukama ni jipholo bhoxi. 30 Sobha Ezekiya ni ilamba, atumu o Jilevita kuximana Jihova mu kutumbula o izwelu ya Davidi ni ya Azafe, o mukwa kumona o isumwa.* Kyenyiki, a muximana ni kisangu-sangu kyoso, anga a mufukamena ni pholo bhoxi.
31 Mukusuluka, Ezekiya wambe: “Kuma a misolo phala kubhanga o kikalakalu kya Jihova, bhekenu o jisata ja kusakidila, mu inzo ya Jihova.” Kyenyiki, o mundu woso wamateka kubheka o jisata ja kusakidila. Enyoso abhana o jisata ja kwoha ni muxima woso. 32 O jisata joso jabheka o mundu jatenesa makwinyi asambwadi a jingombe, hama ya ilumbe ya jimbudi, hama jiyadi ja tumbudi twa ndumbe. Jene joso jiji a jibhakula kala sata ya kwoha phala Jihova. 33 O jisata jamukwa jatenesa hama samanu a jingombe ni midi jitatu ja jimbudi. 34 Maji kikwakexile akunji asoko phala kutála o ibhaku ya jisata ja kwoha. Kyenyiki, o jiphange jâ, o Jilevita a akwatekesa kate kyazubha o kikalakalu, kate o akunji kyazubha o kudizelesa. Mukonda o Jilevita adizelesa ni lusolo, maji o akunji kana. 35 Kwexile we jisata javulu ja kwoha ni banya ya jisata ja paze ni jisata ja uholwa, exile mu jibhakula kumoxi ni jisata ja kwoha. Kyenyiki, amateka kubhanga dingi o ikalakalu mu inzo ya Jihova. 36 Ezekiya ni mundu woso asangulukile mukonda dya ima yabhange o Nzambi yakidi ku mundu. Mukonda o kikalakalu kiki akibhange ni lusolo.