Dya Kayadi Dya Malunda
30 Ezekiya watumikisa njimbu ku akwa Izalayele ni ku akwa Judá, yu wasoneka mikanda phala akwa Efalayíme ni akwa Manasa, n’eze mu inzo ya Jihova mu Jeluzaleme, n’a bhange o Fesa ya Phasu ya Jihova, o Nzambi ya Izalayele. 2 O sobha ni ilamba ni mundu woso mu Jeluzaleme, asolo kubhanga o Fesa ya Phasu mu mbeji ya kayadi. 3 Mukonda ene katenene kubhanga o Fesa ya Phasu mu kithangana kyatokala, kuma o akunji a dizelesele, atolele. O mundu ki u dibhongolwele hanji mu Jeluzaleme. 4 O sobha ni mundu woso awabhela o kima kyasolo. 5 Kyenyiki, ene abhana o ngolokela mu Izalayele yoso, tunde ku Beleseba ndu ku Dane phala o mundu woso eze, n’a bhange o fesa ya Phasu ya Jihova, o Nzambi ya Izalayele, mu mbanza ya Jeluzaleme. Mukonda o mundu ki ubhangele luwa o Fesa ya Phasu kala kyosoneke mu divulu dya Kijila.
6 O yó a atumu kwambata o njimbu ni mikanda ya sobha ni ya ilamba, a nyungu o mbanza ya Izalayele ni Judá, kala kya atendelesa o sobha mu kwamba: “Enu mu mundu wa Izalayele, vutukenu kwa Jihova o Nzambi ya Mbalahamu, ya Izake ni ya Izalayele, phala mwene avutuke kwa yó abhuluka bhu maku a sobha ya Asídya. 7 Kanenu kukayela o phangu ya jikuku jenu ni ya jiphange jenu, abhukumukina Jihova, o Nzambi ya jikuku jâ. Kala ki mwa mumona, mwene wa abhekela wíndwa. 8 Kanenu kukala mu akwa kujiza kala o jikuku jenu. Beleselenu Jihova, zenu mu tembulu yazelesa mwene, kate ku hádya ni hádya. Sidivilenu Jihova, Nzambi yenu, phala o njinda yê itunde ku thandu dyenu. 9 Mukonda se muvutuka kwa Jihova, o jiphange jenu ni an’enu anda kwa kwatela henda kwa yó a akwika. Ene anda tena kuvutuka mu ixi yiyi, mukonda Jihova Nzambi yenu, mukwa henda, mukwa kuloloka. Se muvutuka kwa mwene, mwene wanda mixikina.”
10 Kyenyiki, o yó ambata o njimbu, ayi sanzala ni sanzala ni kutula o njimbu, mu madyembu a Efalayime ni mu madyembu a Manasa ndu mu madyembu a Nzebulone. Maji o athu exile mwa olela ni ku a sebhulula. 11 Sayi-phe athu ku akwa Azele, ku akwa Manasa ni ku akwa Nzebulone, axikina o njimbu, ya eza mu Jeluzaleme. 12 O lukwaku lwa Nzambi lwexile ku thandu a akwa Judá, phala ku a ongeka n’a kumbidile o ima yatumu o sobha ni ilamba kala kyatumu Jihova.
13 Mu mbeji ya kayadi, athu avulu adyongeka mu Jeluzaleme phala kubhanga o Fesa ya Jimbolo ja kambe Felemendu. Ene exile kifuxi kyadikota. 14 Amateka kubula o jikalatódyu jexile mu Jeluzaleme, abulu we o jikalatódyu jakwohela o wasu wadizumba, ya a jitakula mu honga ya Kidelone. 15 Mukusuluka, abhakula jisata ja phasu mu kizuwa kya dikwinyi ni kiwana mu mbeji ya kayadi. O akunji ni Jilevita jisonyi ja akwata. Kyenyiki, adizelesa ya abheka maujitu mu inzo ya Jihova. 16 Amateka dingi kubhanga o ikalakalu yâ kala kyambele o Kijila kya Mozé, o diyala dya Nzambi yakidi. Mukusuluka, o akunji anyakena o manyinga a abhekela o Jilevita. 17 Mwaxaxi ka mundu mwexile athu avulu kadizelesa, o Jilevita exile ni kikalakalu kya kubhakula o jisata ja Phasu phala o yó akasana, akale athu azele bhu pholo ya Jihova. 18 Kwexile mundu wavulu kadizelesele, benge-benge ku akwa Efalayime, ku akwa Manasa, ku akwa Isakale ni ku akwa Nzebulone, maji ne kiki, ene adi ku sata ya Phasu, ya abhukumukina o kijila. Ezekiya-phe, wasambe phala o mbote yâ, mu kwamba: “Jihova, eye u muthu wambote, loloka o kituxi 19 kya yó eza mu kusota ni muxima woso, eye u Jihova, u Nzambi yakidi, o Nzambi ya jikuku jetu, sumbala ene kadizelesa kala kituma o kijila.” 20 Jihova wevu o musambu wa Ezekiya, yu waloloka o mundu.
21 Kyenyiki, o akwa Izalayele exile mu Jeluzaleme abhange o Fesa ya Jimbolo Jakambe o Felemendu mu sambwadi dya izuwa ni kusanguluka kwoso. O Jilevita ni akunji exile muximana Jihova izuwa yoso, mu kuxika o iselekete ya kwimba phala Jihova. 22 Ezekiya waximana we o Jilevita joso jexile musidivila Jihova ni unjimu. Ene abhange o fesa mu sambwadi dya izuwa, abhakula jisata ja paze, ya asakidila Jihova, o Nzambi ya jikuku jâ.
23 Maji, o mundu wasolo kubhanga dingi o fesa mu sambwadi dya izuwa. Kyenyiki abhange mwene o fesa mu sambwadi dya izuwa ni kusanguluka. 24 Ezekiya sobha ya Judá wabhana midi ya tungombe, ni sambwadi dya midi ya jimbudi phala o mundu. O ilamba abhana we midi ya tungombe, ni dikwinyi dya midi ya jimbudi phala o mundu. Kyenyiki, akunji avulu exile mu dizelesa. 25 O mundu woso wa Judá, o akunji, o Jilevita ni mundu woso watundu mu Izalayele ni akwa jixi jengi ejile mu Izalayele ni yó atungu mu Judá asanguluka kyavulu. 26 Mu Jeluzaleme mwexile kusanguluka kwavulu, mukonda tunde mu izuwa ya Solomá mon’a Davidi, sobha ya Izalayele, mu Jeluzaleme kabhangele-mu fesa kala yiyi. 27 Mukusuka-ku, o akunji atokala ku mwiji wa Levi, abalumuka ya abesowala o mundu. Nzambi wa evu, o musambu wâ wabhixila kate ku dyulu.