Dya Kayadi Dya Malunda
31 O kyabhiti o ima yoso yiyi, o mundu woso wa Izalayele wexile mu fesa, ayi mu mbanza ya Judá, abulu o jiphiladi ni iteka yoso, abulu we o ididi ya kubhezela ni jikalatódyu joso jexile mu mbanza ya Judá ni mu mbanza ya Bejamí ni mu mbanza ya Efalayíme ni ya Manasa, kate kyazubha kubula o ima yoso. Mukusuluka, akwa Izalayele avutuka mu jimbanza jâ ni mu mabhata mâ.
2 Kyenyiki, Ezekiya wasokejeka o akunji mu ibuka-ibuka, wasokejeka we o Jilevita mu ibuka-ibuka phala kubhanga o ikalakalu yâ. Ene atokalele kubhakula o jisata ja kwoha, o jisata ja paze ni kubhanga o ikalakalu yamukwa. Ene atokalele we kusakidila ni kuximana Nzambi ni mimbu bhu myelu ya kithádi kya Jihova. 3 Ku jimbote jê, o sobha wexile mukatula-ku mbandu phala ku jibhana kala jisata ja kwoha mu kamene ni mu usuku, ni jisata ja kwoha ja jisábhalu, ja mbeji ya thethama ni ja jifesa, kala kya kisoneka mu divulu dya Kijila kya Jihova.
4 Mwene watendelesa we o mundu watungile mu Jeluzaleme, kubhana o lubhaku lwatokalele ku akunji ni ku Jilevita, phala ene adibhakule ngo mu kubhanga o ikalakalu kala kyambe o kijila kya Jihova. 5 Kyoso kya abhana o itendelesu yiyi, akwa Izalayele abheka idima yavulu ku jimbutu ja dyanga o kubhongolola ku mabhya mâ. Abheka we vinyu ya ubhe, máji, wiki ni idima yoso ya mabhya. Ene abheka o mbandu ya kakwinyi ya idima yoso. 6 O mundu wa Izalayele ni wa Judá, watungile mu jisanzala ja Judá, abheka we o mbandu ya kakwinyi ya jingombe ni ya jimbudi, ni mbandu ya kakwinyi ya ima yokitule ima ikôla phala Jihova Nzambi yâ. Ene abheka maujitu avulu. 7 Mu mbeji ya katatu, ene amateka kutula o lubhaku lwoso mu kididi kimoxi, azubha kubhanga kiki mu mbeji ya kasambwadi. 8 Kyoso Ezekiya ni ilamba kyabhixila, ya amono o ima yabheka o mundu, aximana Jihova, abesowala o mundu wa Izalayele.
9 Ezekiya webhwidisa o akunji ni Jilevita, se kwebhi kwatundile o maujitu oso. 10 O mukunji wadikota Azadiya mukwa dibhata dya Zadoke, wa mutambwijila wixi: “Tunde kyamateka kubheka o lubhaku mu inzo ya Jihova, o mundu wene mudya, wene mu kwikuta, kwene hanji musubhuka kudya kwavulu, mukonda Jihova wene mubesowala o mundu wê. Tala o kudya kwoso kuku kwasubhuka!”
11 Kyenyiki, Ezekiya wa atumu kuyudika ididi ya kubhakela kudya mu inzo ya Jihova. Mukiki, ene ayudika o ididi. 12 O mundu wexile mubheka o lubhaku, o jimbandu ja kakwinyi* ni ima yoso ikôla. Konaniya a musolo phala kukala ku pholo, o phang’ê Ximeyi mwéne wexile o muthu wa kayadi. 13 O akwatekexi a Konaniya ni a phang’yê Ximeyi, a asolo kwa sobha Ezekiya, enya: Jiyele, Azaziya, Nahate, Azayele, Jedimote, Jozabade, Ediyele, Iximakiya, Mahate ni Benaya. Azadiya mwéne wexile ku pholo mu kulanga o inzo ya Nzambi yakidi. 14 Sayi levita amwixana Kole, mon’a Iminahe wexile mulangidila o dibhitu ku mbandu kutundila o dikumbi, mwéne a mubhele o kikalakalu kya kulangidila o maujitu exile mubhana o athu kwa Nzambi mu vondadi yâ. Mwene wexile muwana o lubhaku lwexile mubhana kwa Jihova ni kuwana o ima ikôla. 15 Mu jimbanza mwatungile o akunji mu Edene, Kole mwéne wexile mubhana o itendelesu kwa Miyamine, Jesuwa, Semaya, Amadiya ni Sekaniya. Ene a adyelele mu kikalakalu kiki kya kuwanena o ima ku jiphange jâ mu ukexilu wafwama, kikale ku ana-ndenge kikale ku adyakime. 16 Akexile muwanena we o kudya ku mayala exile mukwiza mukalakala mu inzo ya Jihova izuwa yoso, mu kubhanga o ikalakalu yatokala ku ibuka yâ. O twana twâ, exile ni mivu itatu mba asombokele mu kitala kiki, a asonekene kya o majina mâ kala kyatokala ku miji yâ.
17 O akunji a asoneka o majina mâ, kala kyatokalele ku mabhata a jitata jâ. Kyene kimoxi we ni Jilevita exile ni makwinyi ayadi a mivu ni yó asombokele mu kitala kiki. Asoneka o majina mâ kala kyafwama mu ikalakalu yexile mubhanga mu ibuka yâ. 18 O Jilevita exile mu asoneka o majina mâ, exile musoneka we o majina a ahatu’â, a twana twâ twa mala ni twana twâ twa ahatu, kate mwene ni ana-ndenge. Kifwa o miji yâ yoso. Ene exile mudizelesa phala kubhanga o ikalakalu yâ ikôla, kuma exile athu a adyelela. 19 Asoneka we o majina a an’a Alá o akunji, atungile mu ididi ya kwingila o ibhaku, yazukamene mu jimbanza jâ. Mu jimbanza joso asolo-mu mayala phala kubhana kudya ku mayala oso atokala ku miji ya akunji ni athu oso atokalele ku mwiji wa Levi, a asonekene o majina mâ.
20 Ezekiya wabhange o ima yoso yiyi, mu jisanzala joso ja Judá. Wasuluka ni kubhanga ima ya wabhela Jihova Nzambi yê ni ufiyele. 21 O ima yoso yabhange mwene phala kubheza Nzambi yê, kikale mu kikalakalu kya inzo ya Nzambi yakidi, kixi mu kutumaka o Ijila ni itumu, yoso wa ibhange ni muxima woso. Mwene anga uzediwa.