Dya Kayadi Dya Malunda
12 Kyoso Lobowamu kyakexile kya ni kutena kwavulu kwa kutumina, mwene wabhukumukina o Kijila kya Jihova. O mundu woso wa Izalayele kyene we kyabhange. 2 Kuma ene abhukumukina Jihova, mu muvu wa katanu wa utuminu wa sobha Lobowamu, Sizake sobha ya Ijitu weza mulwa ita ni akwa Jeluzaleme. 3 Sizake wexile ni midi ni hama jiyadi ja makalu a ita ni makwinyi asamanu a midi a mayala akwa kwendela ku jikabalu ni nzungule ya masoladi atundile-nê kumoxi ku Ijitu, kifwa, akwa Líbya, akwa Suke ni akwa Itiyopya. 4 Mwene watambula o jimbanza ja Judá jala ni ilumbu, yu wabhixila mu Jeluzaleme.
5 O polofeta Semaya wayi kwa Lobowamu ni ku ilamba ya Judá ya dyongekele mu Jeluzaleme, mukonda dya Sizake, yu wa ambela: “Jihova wambe kiki: ‘Enu mwa ngixisa. Mukonda dya kiki nganda mibhakula bhu maku a Sizake.’” 6 Mukyenyiki, o sobha ni ilamba ya Izalayele adyela, ya ambe, exi: “Jihova walungwé! Mwene muthu wayuka.” 7 Kyoso Jihova kyamono kwila ene adyela, Jihova wambela Semaya, wixi: “Ene adyela. Kinganda kwabwika dingi, kwakambe ngo nganda kwabhulula. Akwa Jeluzaleme kinganda ku akwatela dingi njinda. Kinganda kwehela Sizake kubwika Jeluzaleme. 8 Maji-phe, ene anda kala abhika a Sizake, mukiki anda kwijiya kyebhi kikala o ku ngisidivila ni kyebhi kikala o kusidivila jisobha ja jixi jengi.”
9 Kyenyiki, Sizake sobha ya Ijitu weza mulwa ita ni akwa Jeluzaleme. Mwene wambata o jimbote joso jexile mu inzo ya Jihova ni jimbote joso jexile mu inzo* ya sobha. Wambata o ima yoso kate mwene ni jingubu ja ulu jabhangele Solomá. 10 Mukonda dya kiki, o sobha Lobowamu wabhange jingubu ja ngondo, yu wa jibhana ku atwameni a alangidi, exile mulanga o mwelu wa inzo ya sobha. 11 Kyoso sobha kyexile muya mu inzo ya Jihova, o alangidi exile mu muxinjikila, exile mu kwiza ni jingubu jâ, mukusuka-ku, o jingubu jiji exile mu jibheka dingi mu dixilu dya alangidi. 12 Kuma o sobha waditulula, o njinda ya Jihova kiyeza dingi ku thandu dyâ. Mwene ka ajikinisa we mukonda o mundu wa Judá wexile hanji mubhanga ima yambote.
13 O kutena kwa sobha Lobowamu kwa dibandekesa mu Jeluzaleme yu wasuluka ni kutumina. Kyoso kyakituka sobha, Lobowamu wexile ni makwinyi awana a mivu ni umoxi, watumina mu dikwinyi ni sambwadi dya mivu mu Jeluzaleme, o mbanza yasolo Jihova mwaxaxi ka miji ya Izalayele phala kujingisa o dijina dyê. O many’a Lobowamu dijina dyê Nahama, mukwa Amone. 14 Maji mwene wabhange ima yayibha mukonda kamesenene kusota o itendelesu ya Jihova ni muxima woso.
15 O musoso wa Lobowamu tunde ku dimatekenu ndu ku disukilu, a usoneka mu divulu dya polofeta Semaya ni mu divulu dya Idu, o mukwa kumona o isumwa ni mu mikanda ya majina a miji. Lobowamu ni Jelobowamu exile jinga mulwa ita. 16 Mukusuka-ku, Lobowamu wafu, a mufundu mu Mbanza ya Davidi. O mon’ê Abiya mwéne wa mubhingana ku usobha.