Dya Kayadi Dya Malunda
13 Ku muvu wa dikwinyi ni kanake wa utuminu wa sobha Jelobowamu, Abiya wakituka sobha ya Judá. 2 Mwene watumina mu Jeluzaleme mu mivu itatu. O dijina dya manyâ Mikaya, mon’a Udiyele mukwa Ngibeya. Kwakexile jinga ita bhukaxi ka Abiya ni Jelobowamu.
3 Kyenyiki, Abiya wayi mulwa ita ni kifuxi kya hama jiwana ja midi a mazonda a ita, a alongo kulwa ita. Jelobowamu wadisokejeka we ni hama anake a midi a mayala a alongo kulwa ita, ene exile mazonda. 4 Abiya wemana ku mulundu wa Zemalayíme wazukama ni Efalayíme, yu wambe: “Eye Jelobowamu ni Izalayele yoso, ivwenu! 5 Enu mwejiya kwila Jihova o Nzambi ya Izalayele, wabhana kwa Davidi ni ku an’ê o ungana wa kutumina Izalayele kate ku hádya ni hádya, kyoso kyate-nê o kikutu kya môngwa.* 6 Maji Jelobowamu mon’a Nebate, selevende ya Solomá, mon’a Davidi, wabhukumukina ngana yê. 7 Sayi mayala ayibha, adibundu-nê kumoxi. Ene abetele dingi kota mu nguzu, o Lobowamu mon’a Solomá ndenge, mukonda Lobowamu wexile munzangala, kaswinine kyavulu. Mwene katenene ku atolola.
8 “Enu mwa mufika kwila mutena kubhânga ni utuminu wa Jihova wala bhu maku ma an’a Davidi sé kumitolola, mukonda mwala mu mundu wavulu ni kwila Jelobowamu wa mibhangela tu iteka twa ngombe twa ulu phala tukale jinzambi jenu? 9 K’enu mwakaye o akunji a Jihova, o mbutu ya Alá ni an’a Levi, énu mwasolo athu engi phala kukala akunji enu, kala kibhanga o athu a ifuxi yamukwa? Kabasa muthu wexile mukwiza ni kangombe kamoxi ni sambwadi dya tumbudi, weji tena kukala mukunji wa iteka, o jinzambi ja makutu. 10 Maji etu-phe, Jihova mwéne o Nzambi yetu, ki twa mubhana dikunda. O akunji etu, o mbutu ya Alá a musidivila Jihova. O Jilevita a mu akwatekesa mu ikalakalu yâ. 11 Ene, éne mubhakula jisata kwa Jihova izuwa yoso, mu kamene ni mu ngoloxi ni kwoha o wasu wa dizumba. Éne we, ene muwika o tundeya mu mausuku oso. O jimbolo jikôla jala ku meza yobhange ni ulu yambote. Etu twene mubhanga o ikalakalu yetu phala Jihova o Nzambi yetu, maji enu mwa mubhana dikunda. 12 Kindala, talesenu! O Nzambi yakidi wala n’etu wa mu tutwamenena ku pholo, o akunj’ê ala we n’etu ni jikoloneta jâ phala kuta o nzongo ya kulwa ita n’enu. Enu mu mayala akwa Izalayele, kanenu kubhânga ni Jihova o Nzambi ya jikuku jenu, mukonda kimwanda zediwa!”
13 Maji Jelobowamu wa abatamena kudima dyâ. Kyenyiki, o kifuxi kya masoladi kya Jelobowamu kyexile ku pholo ya mbanza ya Judá, o mayala abatamene exile kudima dya mayala akwa Judá. 14 Kyoso o mayala akwa Judá kyalunguluka, amono kwila o jinguma jejile mubhânga-nawu, jexile ku pholo ni kudima dyâ. Kyenyiki, amateka kudikola kwa Jihova, o akunji exile muxika o jikoloneta ni nguzu yoso. 15 O masoladi akwa Judá adikola ni dízwi dyaswina. Kyoso o mayala akwa Judá kyadikola ni dízwi dyaswina, o Nzambi yakidi watolola Jelobowamu ni Izalayele yoso bhu pholo ya Abiya ni ya Judá. 16 Akwa Izalayele alenge akwa Judá, Nzambi anga wa abhakula bhu maku mâ. 17 Abiya ni masoladi mê ajibha athu avulu, kwafu hama jitanu ja midi a mayala akwa Izalayele a alongele kulwa ita. 18 Mu kithangana kyenyokyo, o mayala akwa Izalayele a atolola, maji o mayala akwa Judá aswinine dingi mukonda adyelele kwa Jihova, o Nzambi ya jikuku jâ. 19 Abiya wasuluka ni kuzukutisa Jelobowamu yu watambula o jimbanza jiji: Betele ni jimbanza jazukamene, Jezana ni jimbanza jazukamene, Efelone ni jimbanza jazukamene. 20 Mu izuwa ya Abiya, Jelobowamu kexile dingi ni kutena kala m’ukulu. Mukusuluka, Jihova wa mukastikala, yu wafu.
21 Maji o kutena kwa Abiya kwayi ni kudibandekesa. Mu kubhita thembu Abiya wakazala ni dikwinyi ni kiwana kya ahatu, yu wavwala makwinyi ayadi ni kiyadi kya an’a mala ni dikwinyi ni kisamanu kya an’a ahatu. 22 O ima yamukwa yalungu ni musoso wa Abiya, o ibhangelu yê ni izwelu yê, a isoneka mu divulu dya polofeta Idu.