Dya Kayadi Dya Malunda
14 Mukusuka-ku, Abiya wafu ya a mufundu mu Mbanza ya Davidi. Mon’ê Aza mwene wa mubhingana ku usobha. Mu izuwa ya Aza, o ixi yexile ni kutululuka mu dikwinyi dya mivu.
2 Aza wabhange ima yambote bhu pholo ya Jihova, Nzambi yê. 3 Wabulu o jikalatódyu ja jinzambi ja jixi jengi, o ididi ya kubhezela, o jiphiladi, yu wasasujula o iteka. 4 Mwene watumina akwa Judá kubheza Jihova, o Nzambi ya jikuku jâ ni kubelesela o Ijila ni itumu yê. 5 Aza wabulu o ididi ya kubhezela, o jikalatódyu ja wasu wa dizumba jakexile mu mbanza ya Judá, yu wasuluka ni kutumina ni kutululuka. 6 Mwene watungu jimbanza mu Judá jofikidile kyambote, kuma mu mivu yoso yiyi o ixi yatululukile, mukonda Jihova wa mubhanene dinyohenu. 7 Mwene wambela akwa Judá, wixi: “Ndokwenu, tutungyenu o jimbanza jiji ni ku jikondoloka ni ilumbu ni matala ni mabhitu ala ni jiphapha. Kuma o ixi yatululuka hanji, mukonda twasoto Jihova Nzambi yetu. Twamusoto, mwene watubhana dinyohenu phala o jinguma jetu joso jatukondoloka kabhânge n’etu.” Kyenyiki, ene atena kubhanga o kikalakalu.
8 Aza wexile ni hama jitatu ja midi a mayala akwa Judá exile mukwambata jingubu jamakota ni jisosa. O ku mwiji wa Bejamí, kwexile hama jiyadi ni makwinyi anake a midi a mazonda, exile mukwambata o jingubu jofele ni mifula.
9 Ku pholo dya kwenda, Nzelá mukwa Itiyopya, weza ni kifuxi kya masoladi kyatenesene kazunda kamoxi ka mayala ni hâma jitatu ja makalu a ita, phala kulwa ita ni Aza. Kyoso kyabhixila ku Malesá, 10 Aza watundu phala kubhânga-nawu, ene adisokejeka phala kubhânga mu honga ya Zefata ku Malesá. 11 Mukusuluka, Aza wadikola kwa Jihova Nzambi yê, wixi: “Jihova tata, phala eye kikikubhonzo se o athu u wanda akwatekesa avulu o nguzu* mba atolo o nguzu. Tukwatekese-phe eye u Jihova Nzambi yetu, mukonda twadyelela* kokwé, tweza mubhânga ni kifuxi kiki mu dijina dyé. Jihova, eye u Nzambi yetu, kana kwehela kwila o muthu mu xitu ubeta dingi kota mu kuswina, eye ndenge.”
12 Kyenyiki, Jihova watolola akwa Itiyopya, bhu pholo ya Aza ni ya akwa Judá. Akwa Itiyopya anga alenga. 13 Aza ni kifuxi kyê kya masoladi,* akayela akwa Itiyopya kate ku Jelale, ya ayi ni ku ajibha. Ki kusubhuka muthu ni mwenyu. Mukonda Jihova ni kifuxi kyê, atolola akwa Itiyopya. Bhenyobho, akwa Judá akatula imbamba yavulu yatokalele ku akwa Itiyopya. 14 Aza ni kifuxi kyê atolola o jimbanza jexile mu jimbandu ja Jelale, kuma akwa Itiyopya exile muteketa ni wôma mukonda dya Jihova. Ene ambata imbamba yavulu mu mbanza, mukonda mwexile ima yavulu phala ku ikatula. 15 Ene ayi kate ku jibalaka ja yó exile ni ibhaku, ya ambata nzungule ya jimbudi ni jikamelu, mukusuluka avutuka mu Jeluzaleme.