Dya Kayadi Dya Malunda
15 O nzumbi ya Nzambi yeza ku thandu dya Azadiya mon’a Odede. 2 Kyenyiki mwene wayi kwa Aza yu wa mwambela, wixi: “Eye Aza, ni enu enyoso mu akwa Judá ni akwa Bejamí, ngivwenu! Jihova wanda kala n’enu se mukala jinga ni mwene. Se mu musota mwanda musanga, maji se mu muxisa, mwene wanda mixisa we. 3 Mu mivu yavulu akwa Izalayele kexile mubheza o Nzambi yakidi, kexile ni akunji phala ku alonga, kexile we ni ijila. 4 Maji kyoso ene kyexile mutala hadi, avutuka kwa Jihova o Nzambi ya Izalayele, a musoto, ya a musange. 5 Mu thembu yenyoyo, o athu katenene kwenda njila ni kutululuka,* mukonda kwakexile kavwanza kavulu mu jixi jenyojo. 6 Kifuxi kimoxi kyexile mubwika kifuxi kyamukwa, akwa mbanza imoxi exile mubwika o mbanza yamukwa, mukonda Nzambi wa abhekela kavwanza ni ku atatesa kyavulu. 7 Maji enu-phe swinenu, kimubhwile,* kuma anda mibesowala mukonda dya ibhangelu yenu yambote.”
8 Kyoso Aza kyazubha kwivwa o izwelu yiyi ya polofeta Odede ni kikanenu kyê, mwene waswina dingi, wabulu o iteka yoso yayibha yexile mu ixi ya Judá ni mu ixi ya Bejamí ni mu jimbanza jatambula mwene jexile ku milundu ya Efalayíme. Mwene watungulula dingi o kalatódyu ka Jihova kexile mu mbalanda ya inzo ya Jihova. 9 Wongeka akwa Judá ni akwa Bejamí ni akwa jixi jengi atungile mwaxaxi kâ, ni akwa Efalayíme, ni akwa Manasa ni akwa Ximinyá, mukonda athu avulu alengele mu Izalayele, ya ayile mudibunda ni Aza kyoso ene kyamono kwila Jihova Nzambi yê wexile mu mukwatekesa. 10 Kyenyiki-phe, mu mbeji ya katatu ka muvu wa dikwinyi ni katanu ka utuminu wa Aza, ene adibhongolola mu Jeluzaleme. 11 Mu kizuwa kyenyokyo, ku ima yatundu-nayu mu ita, abhakula-ku ujitu kwa Jihova. Ene abhakula hama sambwadi ya jingombe ni sambwadi dya midi ya jimbudi. 12 Ate we kikutu kya kubheza Jihova o Nzambi ya jikuku jâ ni muxima wâ woso ni mwenyu wâ woso. 13 Woso waditunine kubheza Jihova o Nzambi ya Izalayele, atokalele ku mujibha kikale se mwadyakime, mon’a ndenge, dyala mba muhatu. 14 Kyoso kyakexile muxika o jikoloneta ni jibuzina, akanena kwa Jihova ni dízwi dyaswina ni kusanguluka kwoso kwila, eji musidivila jinga. 15 Athu oso mu Judá asanguluka ni kikanenu kiki kyabhange, mukonda a kibhange ni muxima woso. Ene avutuka kwa Nzambi ni kidi kyoso, mwene yu wa axikina. Jihova wasuluka ni ku abhana dinyohenu phala o jinguma jâ joso ja akondolokele kabhânge-nawu.
16 Kate mwene kukwê Mahaka, sobha Aza wa mukatula mu kididi kyê kya mvwale* mukonda wabhangele kiteka kikwatesa jisonyi phala ku kibheza. Mwene wabwisa o kiteka* kiki, wa kibatujula, yu wakyohela mu honga ya Kidelone. 17 Mwene kabulu o ididi ya kubhezela yexile mu Izalayele. Maji Aza wasidivila Nzambi ni muxima woso, mu izuwa yoso ya mwenyu wê. 18 Mwene wambata o imbamba yoso mu inzo ya Nzambi yakidi yakitula mwene ni tat’ê kala ima ikôla. O ima yenyiyi: phalata, ulu ni imbamba yamukwa. 19 Kikwakexile ita, kate ku muvu wa makwinyi atatu ni katanu wa utuminu wa Aza.