Nehemiya

9 Mu kizuwa kya makwinyi ayadi ni kiwana kya mbeji ya kasambwadi akwa Izalayele adibhongolola phala kujila.* Azwata izwatu ya jisaku ya adikungu uthôkwa. 2 Kyenyiki, o mbutu ya akwa Izalayele yadisandula mwaxaxi ka akwa jixi jengi anga emana phala kufisala o ituxi yâ ni ikuma ya jitata jâ. 3 Ene emana bhenyobho, atange o divulu dya Kijila kya Jihova Nzambi yâ ni dízwi dyaswina, mu ola jitatu. Abhange we ola jitatu ni kufisala o ituxi yâ ni kufukamena bhu pholo ya Jihova Nzambi yâ.

4 Jesuwa, Bani, Kadimiyele, Sebaniya, Buni, Selabiya, Bani ni Kenani, emana ku ditala dyatokalele ku Jilevita dyobhange ni mabaya, ya adyondela kwa Jihova Nzambi yâ ni dízwi dyaswina. 5 O Jilevita Jesuwa, Kadimiyele, Bani, Hasabeneya, Selabiya, Hodiya, Sebaniya ni Petaya ambe, exi: “Balumukenu, muximane Jihova Nzambi yenu kate ku hádya. Nzambi tata, ehela-u kuximana o dijina dyé dyonene dyatundu o diximanu dya muthu woso-woso.

6 “Éye ngo u Jihova. Éye wabhange o dyulu, kyene mwene, o dyulu dya dileka ni yoso yala-mu,* o ngongo ni yoso yala-mu, o musanza wa kalunga ni yoso yala-mu. Enyoso wa abhana mwenyu, o kifuxi kya dyulu ki kala mu ku kubheza. 7 Éye u Jihova, o Nzambi yakidi wasolo Mbalamu, wa mukatula ku Ule o mbanza ya Kaladeya, éye wa muluku o dijina dya Mbalahamu. 8 Eye wamono kwila, mwene wexile mu kubelesela ni muxima woso. Mukonda dya kiki, wate-nê kikutu kya ku mubhana o ixi ya akwa Kanana, ya akwa Hiti, ya akwa Mamodi, ya akwa Mapelezi, ya akwa Jebuze ni ya akwa Jidingaze. O kikutu wakite ni mwene ni mbutu yê. Eye-phe wakumbidila yoso i wakanena mukonda u muthu wayuka.

9 “Eye wamono o kutata kwa jikuku jetu ku Ijitu, wevu o kudikola kwâ kyoso kyabhingi o kikwatekesu bhu mbandu a musanza wa Kalunga Kakusuka. 10 Kyenyiki, wabhange ijimbwete ni madiwanu phala kukastikala Falawó ni jiselevende jê ni mundu wê woso ku ixi yê. Mukonda wejidile kwila, o mundu wé exile mu atalesa hadi. Eye wafumanesa o dijina dyé, adijiya kyambote kate lelu. 11 Wa wanuna o musanza bhu pholo yâ, ene azawuka o musanza wa Kalunga mu mavu akukuta. Wabobesa o jinguma jâ mu menya azongo, kala ditadi dyotakule mu menya. 12 Mu mwanya wa endesa bhukaxi ka dituta, mu usuku wa endesa bhukaxi ka philadi ya túbhya phala ku amwikina o njila yatokalele kwendela. 13 Watula ku mulundu wa Sinayi, éye wazwela-nawu tunde ku dyulu. Wa abhana ijila phala kufundisa ni kuyuka, ijila yakidi, jingonge ni itumu yambote. 14 Wa alongo kubhaka o kizuwa kya sábhalu mukonda kizuwa kikôla. Wa abhana itumu, jingonge ni ijila bhukaxi ka selevende yé Mozé. 15 Kyoso kyexile ni nzala, eye wa abhana kudya. Kyoso kyexile ni dinyota, wabhangesa kutunda menya ku ndanji,* éye wa abhangesa kubokona mu ixi i wakanena* ku abhana.

16 Maji-phe o jikuku jetu abhukumuka. Ene ahukile, kabelesela o itumu yé. 17 Ene kamesenene kwivwa, kalembalala we o ima ya madiwanu i wabhange mwaxaxi kâ. Abhukumuka ya asolo muthu phala ku atwamenena n’a vutuka ku ubhika, ku Ijitu. Maji-phe, eye Nzambi u mukwa kuloloka, u mukwa kukwatela henda, u mukwa kubhanga mbote, u mukwa mwanyu, o henda yé yakalela-ku. Eye ki wa ehelela, kana. 18 Né mwene kyoso kyabhange o kiteka kya kangombe ya ambe, exi: ‘Yiyi yene o Nzambi yetu yatukatula mu ixi ya Ijitu’, anga akamba ku kuxila, 19 maji mu henda i wa akwatela, ki wa abwazeka mu kikangalakata, o dituta dyexile mwa endesa mu mwanya, ki dyasondoloka, o philadi ya túbhya yexile mwa mwikina o njila yatokalele kwendela, kiyasondoloka we. 20 Eye wa abhana o nzumbi yé ikôla phala akale ni kwijiya, wa abhana maná ni menya kyoso kyexile ni dinyota. 21 Wa abhana kudya mu kikangalakata, mu makwinyi awana a mivu. Ki ku akambele kima. O izwatu yâ kiyakukile, inama yâ kiyajimbile ni kwenda.

22 “Eye wa abhana mautuminu ni athu, mu kwa awanena o jixi. Kyenyiki, atambula o ixi ya Sihone, kifwa, o ixi ya sobha Hexebone. Atambula we o ixi ya Hoke sobha ya Basane. 23 Eye wasokolola o twana twâ kala o jithéthembwa ku dyulu. Kyenyiki, wa ambata mu ixi i wakanena kubhana ku jikuku jâ phala ku ilundula. 24 Ene abokona ya alundula o ixi, wa akwatekesa kutolola akwa Kanana, kifwa, o athu atungile mwenyomo. O jisobha ni mundu watungile mwenyomo, wa abhakula bhu maku mâ, phala akwa Izalayele a abhange yoso yamesena. 25 Ene atambula jimbanza jexile ni ilumbu ni mavu abhana idima yambote. Atambula we jinzo jezala ni jimbote ni ixima yokande kya, mixi ya midiva ni mixi ya mivide, ni mixi ibhana ibundu yavulu. Adi, ekuta, anete ni ima yoso i wa abhana.

26 “Maji ene kabelesela, a kubhukumukina, ya a bhukumukina we o kijila kyé. O jipolofeta jé jiwatumikisa phala ku adimuna n’a vutuka kwokwé, ene a jijibha. A kusebhulula bhukaxi ka ibhangelu yâ. 27 Mukonda dya kiki, wa ehelela bhu maku a jinguma jâ jexile mu atatesa. Maji mu kutata kwâ, ene exile mudikola kokwé mu kubhinga kikwatekesu. Eye wexile mwa evwa tunde ku dyulu. Wa abhana atwameni phala ku abhulula bhu maku a jinguma jâ, mukonda dya henda yé yadikota.

28 “Maji kyoso ki kwexile mutululuka, ene exile mubhanga dingi o ima ya kuyibhila. Eye wexile mwa ehelela dingi bhu maku a jinguma jâ jexile mu atatesa. Maji kyoso kyexile dingi mudikola kokwé ni ku kubhinga kikwatekesu, eye wexile mwa evwa tunde ku dyulu ni ku akwatekesa lwavulu mukonda dya henda yé yadikota. 29 Eye wa adimuna phala kabhukumukine o Kijila kyé, maji ene aditunu kubelesela o itumu yé, mukonda dya ukumbu wâ. Ene kabelesela o jingonge jé jibhana o mwenyu kwa yó u jibelesela. Ene ajiji ni ku kubhukumukina, kakubelesela. 30 Wa akwatela mwanyu mu mivu yavulu, wasuluka ni ku adimuna bhukaxi ka jipolofeta jiwabhana o nzumbi ikôla, maji ene kaxikina kwivwa. Ku disukilu, wa ehela bhu maku a ifuxi ya akondolokele. 31 Kuma wa akwatela henda, ki wa ajimi o mbutu mba u a ehelela, mukonda eye u Nzambi ya henda, u mukwa kuloloka.

32 “Nzambi yetu tata, eye u Nzambi yonene, wala ni kutena, wafwama ku kukwatela o wôma, u kumbidila o kikutu kyé, u mukwa kubhanga o mbote.* Kana kujimba o hadi i twatale, yatale o jisobha jetu, o ilamba yetu, o akunji etu, o jipolofeta jetu, o jikuku jetu ni mundu wé woso, tunde mu izuwa ya jisobha ja Asídya kate mu kizuwa kya lelu. 33 Ima yoso i twabhiti-nayu, ki kikuma kyé, mukonda wa kumbidila o kikanenu kyé. Étu twabhange ima yayibha. 34 O jisobha jetu, o ilamba, o akunji ni jikuku jetu, kabelesela o Kijila kyé, kabhana we mátwi ku itumu ni itendelesu yé. 35 Né mwene kyoso jisobha kyexile mutumina ni kusanguluka ni ima yoso yambote i wa abhana mu ixi yadikota, mwala mavu abhana idima yambote, ene kakusidivila, keha we o ibhangelu yâ yayibha. 36 Kyenyiki, lelu twala tu abhika. Kyene mwene! Tu abhika mu ixi i wabhana ku jikuku jetu phala adye-mu o idima yê. 37 Mukonda dya ituxi yetu, idima yoso i tubhongolola mu ixi yiyi, twene mu ibhana ku jisobha ja mu tutumina. Ene a tutumina* kala kyamesena, abhanga we yoso yamesena ni ibhaku yetu. Twabhondalala kyavulu.

38 “Mukonda dya ima yoso yiyi, twate kikutu, étu twa kisoneka. O ilamba ni Jilevita ni akunji etu, a mu kijika kala muthu ni kidimbu kyê.”