Amoji

2 Jihova wambe kiki:

‘“Mukonda dya akwa Mowabe ku ngibhukumukina lutatu, ni mukonda dya ku ngibhukumukina mu luwana, kinganda lungulula o kibanzelu kyami kya ku akastikala,

Mukonda ene oha o ifuba ya sobha ya Idomo kate ki yakituka utokwa.*

 2 Mukyenyiki, o mbanza ya Mowabe nganda ita túbhya,

O túbhya twanda bwika o jisabhalalu jakatunda jala mu ixi ya Kidiyote.

Mowabe wanda fwila mu kavwanza,

Mu kwivwa nzongo ya ita ni jibuya ja koloneta.

 3 O nguvulu* wa mutumina, nganda mukatula-mu,

Nganda bwika Mowabe ni ilamba yoso ya mutokala.” Kyene kyambe Jihova.’

 4 Jihova wambe dingi wixi:

‘Mukonda dya akwa Judá ku ngibhukumukina lutatu, ni mukonda dya ku ngibhukumukina mu luwana, eme kinganda lungulula o kibanzelu kyami kya ku akastikala.

Mukonda ene aditunu o kijila kya Jihova,

Kabelesela o jingonge jê,

A anganala kala kya nganalele o jikuku jâ.

 5 O mbanza ya Judá nganda ita túbhya,

O túbhya twanda bwika o jisabhalalu jakatunda jala mu Jeluzaleme.’

 6 Jihova wambe kiki:

‘Mukonda dya akwa Izalayele ku ngibhukumukina lutatu, ni mukonda dya ku ngibhukumukina mu luwana, eme kinganda lungulula o kibanzelu kyami kya ku akastikala.

Mukonda o muthu wayuka, a musumbisa mu phalata,

O ngadyama, a musumbisa mu jihayi.

 7 O muthu walenduka, ene a mudyota-dyota,

O yó walenduka a muxitila o njila yê.

O tata ni mona, azeka ni kilumba kimoxi,

Ene axidisa o dijina dyami dikôla.

 8 Ku mbandu a kalatódyu, ene adisununa ku thandu a mavunga atambula kwa yó a adi makongo.

O vinyu yanwa mu inzo* ya jinzambi jâ, a isumba ni kitadi kyabhinga ku athu.

 9 ‘Maji éme ngabwika akwa Mamodi bhu pholo yâ,

Ene alebhele kyavulu kala o mixi ya misedulu, exile ni nguzu yavulu kala o mixi ya kaluvadyu.

Eme nga abwika kala kyabwika o muxi ni ibundu ni jindanji jê.

10 Eme nga mikatula mu ixi ya Ijitu,

Nga myendesa mu kikangalakata, mu makwinyi awana a mivu,

Phala mutambule o ixi ya akwa Mamodi.

11 Jihova wambe kiki: ‘Ngasolo amoxi ku an’enu, phala akale jipolofeta,

Ni amoxi ku minzangala ya mala phala akale Jinazilé.

12 Maji enu mwabhana vinyu ku Jinazilé,

Mwatangela o jipolofeta, mwixi: “Kanenu kuta maka a upolofeta.”

13 Mukyenyiki, eme nganda mitutujula bhu mwalo-bho,

Kala kibhanga o dikalu dyambata o ita ya tiliku, ditutujula yoso yala bhoxi.

14 O yó ulenga kyavulu, kanda sanga kididi kya kulengela,

O yó waswina, kanda kala ni nguzu,

Séku dizonda dyanda bhuluka.

15 O yó utakula o sosa, bhu kididi kyê wanda lenga-bhu,

O yó ulenga kyavulu, anda mukwata.

O yó wendela ku kabalu, kanda bhuluka.

16 Kate mwene ni dizonda dyabeta-kota mu kuswina,

Mu kizuwa kyenyokyo, wanda lenga ni thuxi.’ Kyene kyambe Jihova.”