Amoji
4 “Ivwenu o izwelu yiyi, énu mu ahatu, mwedi kala o jingombe ja akaji jala ku Basane,
Ku milundu ya Samadiya.
Enu mwene mu nyana yó watate, mwene mutatesa o jingadyama.
Mwene muzwela ku anumyenu, mwixi: Tubhekelenu uholwa phala kunwa!’
2 O Ngana Jihova, Sukeku, ukôla, waloka,
‘“Talesenu! Kizuwa ki kiza, anda minyenga ni jinzolo ja nyenga naju o xitu.
O yó anda subhuka, anda ku anyenga we ni jinzolo.
3 Jihova, wambe: “Kala muthu mudyenu wanda tundila bhu dibhululu dya ilumbu dyala ku pholo yê.
Anda mikaya phala muye ku Helemone.’”
4 Zenu ku Betele ni mute ituxi
Ni ku mbanza ya Jidingale ni muvudise o ituxi yenu!
Bhekenu o jisata jenu mu imene yoso,
Bhekenu o madijimu* menu mu kizuwa kya katatu.
5 O Ngana Jihova, Sukeku, wambe wixi: Ohenu o jimbolo jobhange ni felemendu, kala sata ya kusakidila.
Bhanenu ngolokela ya jisata jenu ni dízwi dyaswina!
Mukonda kyene ki mwawabhela o kubhanga, énu mu mundu wa Izalayele.
6 ‘Ki ngimibhana kudya, nga mibhitisa nzala mu jimbanza jenu joso.
Ngabhangesa kwila mu jinzo jenu kimukale kudya.
Né kiki, ki muvutuka kokwami,’ kyene kyambe Jihova.
7 Ki nga abhana mvula mu mbeji jitatu, ande dya kithangana kya kubhongolola o idima.
Ngaxile mubheka mvula mu mbanza imoxi, o mbanza yamukwa, kana.
Dibhya dimoxi mwakexile mu noka,
Maji o dya mukwa, kimwakexile mu noka mvula, mwakexile mu kukuta.
8 Athu a mbanza jiyadi mba a mbanza jitatu, exile mu bhendujuka mu kuya mu mbanza yamukwa phala kunwa menya,
Maji o dinyota kidyexile mubhwa.
Né kiki, ene kavutuka kokwami,’ kyene kyambe Jihova.
9 ‘O idima yenu nga ikukutisa ni mwanya, yasotama* we .
Mwexile mu kuna ji njaludim javulu ni mixi ya mividi,
Maji o mahoho akexile mudya o mafwe a mixi ya mufiku ni ya midiva.
Maji ne kiki, enu kimuvutuka kokwami, kyene kyambe Jihova.
10 ‘Nga mibhekela dibhebhu kala di ngabhekele ku Ijitu.
Ngajibha o minzangala yenu ni xibhata, ngambata o jikabalu jenu.
O kibuzu kya imbi, mu jibalaka jenu, ngakitukumwina mwene mu mazulu menu.
Maji né kiki, kimuvutuka kokwami,’ kyene kyambe Jihova.
11 ‘Ngamibhekela kibwikilu,
Kala ki ngabhekele mu mbanza ya Sodoma ni Ngomola.
Enu-phe mwexile kala o kadibaya kokatule mu túbhya.
Maji né kiki, enu kimuvutuka kokwami,’ kyene kyambe Jihova.
12 Mukyenyiki, kiki kyene ki nganda mibhanga, enu mu akwa Izalayele.
Kuma nganda mibhanga o ima yiyi,
Disokejekyenu phala kudisanga ni Nzambi yenu, enu mu akwa Izalayele.
13 Mukonda, mwéne wabhange o milundu, wabhange we o kitembwe.
Mwene utangela o ixinganeku yê ku athu,
Mwene ukitula o mukengeji wa kamene mu kitombe,
Udyota mu ididi yadileka ya ixi,
Dijina dyê Jihova, o Nzambi ya ifuxi.