Amoji
5 “Ivwenu o izwelu ya kuditenda ya mitokala enu mu dibhata dya Izalayele:
2 ‘O muzeletete Izalayele, wabu bhoxi,
Mwene katena dingi kubalumuka.
A mubwazeka mu ixi yê,
Kibhwala muthu u mubalumuna.’
3 “Kiki kyene kyambe Ngana Jihova, Sukeku:
‘Mu mbanza mutunda midi ya mayala phala kuya mu ita, mwanda subhuka ngo hama ya mayala,
O momo mutunda hama ya mayala, mwanda subhuka ngo dikwinyi dya mayala, phala o dibhata dya Izalayele.’
4 “Jihova wambela o dibhata dya Izalayele, wixi:
‘Ngisotyenu ni munangenene ku mwenyu.
5 Kanenu kuya mu mbanza ya Betele,
Kanenu kuya ku Jidingale, kanenu we kuya ku Beleseba,
Mukonda akwa Jidingale anda kwa ambata mwene phala ku akwika,
O mbanza ya Betele anda ku ibwika.
6 Sotenu Jihova ni mukale ku mwenyu,
Phala mwene kabwike o mbutu ya Zuze, kala kibhanga o túbhya,
Ni kuta túbhya ku mbanza ya Betele, hé kibhumoneka muthu utena kujima o túbhya.
7 Enu o kuyuka mwa kukitula kulula,
Kimwaxikina kubatula o mulonga mukidi.
8 Sotenu yó wabhange o jithéthembwa ja Kimane* ni jithéthembwa ja Kezili,
Mwene o kitombe ukikitula mukengeji wa kamene,
Yó ubhangesa o kizuwa kuvunda kala usuku,
Yó wixana o menya a musanza wa kalunga,
Phala ku alundulula ku thandu a mavu a kukuta,
Dijina dyê, Jihova.
9 O mazonda wanda ku atukumwisa ni kibwika,
O ididi yofikidile wanda ibwika.
10 Ene azembe o afundixi ene mwabazela,
Azembe we yó azwela o kidi.
11 Kuma enu mwene mujijidika o jingadyama kufuta o mavu a kudima,
Anga mutambula o tiliku yâ kala lubhaku,
Kimwanda kala dingi mu jinzo ja matadi osete ji mwatungu.
Kimwanda nwa o vinyu yanda tunda ku mixi yenu ya mividi i mwakunu.
12 Eme ngejiya kyambote o itondalu* yenu,
Ngejiya kwila o ituxi yenu yavulu.
Mwene mutatesa o muthu wayuka,
Mutambula kitadi phala kufundisa ni mangonya.
Mudituna kufundisa o ngadyama mu ukexilu watokala.
13 Mu thembu yenyoyo, o jinjimu anda dixibha,
Mukonda kyanda kala kithangana kya malamba.
14 Sotenu kubhanga ima yambote, kanenu kubhanga ima yayibha,
Phala munangenene ku mwenyu.
Mukyenyiki, Jihova o Nzambi ya ifuxi, wanda kala n’enu.
Kala ki mwene muzwela kwila mwene wala n’enu.
15 Zembenu o ima yayibha, zolenu o ima yambote,
Bhangenu o ima yambote bhu mwelu wa mbanza.
Nange yó asubhuka ku mwiji wa Zuze,
Jihova o Nzambi ya ifuxi, u akwatela henda.’
16 Kiki kyene kyambe Jihova, o Nzambi ya ifuxi, Jihova wixi:
‘Mu ididi yoso, o athu anda kala ni malamba,
Mu ikoka yoso, o athu anda dikola, exi: “Ayiwe taté! Ayiwe taté!
Anda kwixana o idimakaji n’eze mudila,
Anda kwixana we yó ala ni uhete wakudila mu jithambi n’eze mudila.’
17 ‘Mu mabhya oso a mividi o athu anda kala ni malamba,
Mukonda eme nganda bhita mwaxaxi kenu, phala ku mikastikala.’ Kyene kyambe Jihova.
18 Lamba dya yó oso amesena kwila, o kizuwa kya Jihova kibhixila kya!
O kizuwa kya Jihova kyanda lombolola ihi phala enu?
Kyanda kala kizuwa kya kitombe, ki kya mukengeji, kana.
19 Kyanda bhita kala kibhita ni muthu wa mulenga o hoji, anga utakana ni ulusu,
Kyoso mwene kyabokona m’onzo, kyaxamenena o lukwaku lwê ku phalelu, a mu numata ku nyoka.
20 O kizuwa kya Jihova kyanda kala kizuwa kya kitombe, ki kya mukengeji, kana.
Kwanda vunda, kikwanda zela, kana.
21 O jifesa jenu eme kingijisuwu, nga jiyibhila,
Kingiwabhela o dizumba dya jisata ji mwene mubhakula mu yônge yenu yonene.
22 Né mwene se mu ngibhakwila jisata ja kwoha,
Eme kinganda jisuwa,
O jisata jenu ja paze, ja ibhaku yanete jimwanda ngibhakwila, kinganda jixikina.
23 Tundenu bhabha ni jibuya ja mimbu yenu,
Kingamesena kwivwa o mikumbi yenu i muxika ni tungoji.
24 O kufundisa kwakidi, ku kunguluke kala menya,
O kubatula o mulonga mukidi, kwile kala menya a ngiji akunguluka.
25 Enu mu akwa Izalayele, manyi mu makwinyi awana a mivu u mwakexile mu kikangalakata,
Enu mwa ngi bhakwila jisata?
26 Kyenyiki, enu mwanda kwambata o sobha yenu Sakute ni Kayivane,
O iteka ya théthembwa i mwabhange phala enu, kifwa, o jinzambi jenu.
27 Eme nganda tuma ku mibalakala ku Damasku,’ kyene kyambe yó wavu o dijina dya Jihova, o Nzambi ya ifuxi.”