Amoji
6 “Lamba dya yó atungu mu Ziyone, adyelela mu nguzu yâ.*
Yó adivwa kala ala mu kididi kyakondama ku mulundu wa Samadiya.
Lamba dya atwameni a kifuxi kiki kyadikota,
Kwene mulengela akwa Izalayele, mu kusota o kikwatekesu.
2 Ndenu mu mbanza ya Kalene ni mutale.
Kyoso ki mwanda bhixila kwenyoko, muya ku mbanza yadikota ya Hamati,
Ni mu kulumuke ku ixi ya Ngate, ya akwa Fidíxa.
O kwila ene abeta-kota, o maungana* menu ndenge?
O kwila o jixi jâ jabeta-kota mu kusanzumuka, o jixi jenu ndenge?
3 Enu mwa mujimba o kizuwa kya kibwikilu.
Enu mwa mukwizalesa o ixi ni usweya.
4 Ene azeka mu jihama jâ, jobhange ni mazu a nzamba, adisununa ku yalu yâ.
Adya o xitu ya tumbudi ni tungombe twanete twa ibhanga yâ.
5 Ene emba mimbu, axika tumbánza.
Adiyudikila iselekete ya kwimba, kala kyabhangele Davidi.
6 Anwa vinyu mu jikopho jamakota.
Adiwaya máji ambote,
Maji kamusuwa o dibhata dya Zuze, mu ibhidi ya mudibhana-nayu.
7 Mukyenyiki, éne anda dyanga kwa ambata phala ku akwika.
O yó adisununa mu yalu yâ, kanda bhanga dingi jifesa.
8 ‘O Ngana Jihova, Sukeku, wadilokela. Kiki kyene kyambe Jihova, o Nzambi ya ifuxi:
‘“Ngazembe o ukumbu wa Jakobo.
Ngazembe o jisabhalalu jé jakatunda.
Nganda bhakula o mbanza ni ima yoso yala-mu ku jinguma jâ.
9 “‘“Se mu inzo imoxi musubhuka dikwinyi dya mayala, ene we anda fwa. 10 Kwanda kwiza ndandu phala kwambata o imbi bhu kanga phala ku yoha. Mwene wanda kwambata o ifuba yâ dikanga. Mu kyenyiki, mwene wanda kwibhula yó wala m’onzo, wixi. ‘O kwila sayi-ku dingi muthu wala n’eye?’ Mwene wanda tambwijila: ‘Kana, séku dingi muthu!’ Bhenyobho, mwene wanda zwela: ‘Dixibhe! Kiki kikithangana kya kutumbula o dijina dya Jihova.’”
11 Mukonda Jihova wa mubhana itumu.
Mwene wanda bwika o inzo yadikota, wanda ikitula matumbu a matadi.
O inzo yofele wanda ku ibula-bula.
12 O kwila o kabalu katena kulenga bhwala o matadi?
O kwila ku matadi, o kidimakaji utena kudima-ku ni jingombe?
Enu kimwene mu batula o maka ni kuyuka, maji mwene mutatesa o athu.
O kubhanga ima yambote mwa kukitula kulula.
13 Enu mwene musanguluka ni ima kiyala ni valolo.
Mwamba, mwixi: “Etu twatolola mu nguzu yetu mwene.”
14 Enu mu akwa Izalayele, Jihova o Nzambi ya ifuxi wambe, wixi: ‘Nganda bheka kifuxi phala kubhânga n’enu,
Ene anda mitatesa, tunde ku Hamati* ndu ku honga ya Halabá.’”